خاطیره‌لری سرمیشم یاغیشا
خاطیره‌لری سرمیشم یاغیشا
گولناره ایلهام‌دان منثور شعر
کؤچورن: حسین واحدی
یادلاشماق‌دان قورخدوقجا قورخولاری یادلاشدیردیق...
زامانی عقرب‌لردن اوغورلادیق.
گوناه یازماغا باشلادیق هر ساعتیمیزا.
بیر واخت بوغازیمیزدا دوگونله‌ییب آزادلیق‌دان محروم ائتدیگیمیز سؤزلری آزادلیغا قوووشدوردوق.
داها هیجانلانیب تیترمه‌دی اللریمیز. یوخ، عادی‌لشمه‌دیک. سئوگی‌نین آدینی قویدوق ساده‌جه.
ساغول‌لاریمیزین عؤمرو قیسالماغا باشلادی. هله‌لیک‌سیز بیتیردیک هر تئلئفون زنگینی. چوخ خبیس اولدوق. سالامات قال سؤزونو ده قییمادیق بیر-بیریمیزه.
سوسا‌راق آییردیق بیزی.
لال سوکوت‌لاری سونونجو اومیدلر بیلدیک.
ایندی یاغیش یاغیر. من ایسه خاطیره‌لریمیزی او یاغیشین آلتینا سرمیشم.
زامان قازان‌دیریرام اونلارا، عؤمرونو اوزاتدیغیمی سانیرام بلکه.
بیر واخت سیخیب قوروداجاغام اونلاری... سون داملاسینا قدر...
هله‌لیک...
زامانین ایچینه آتیرام سنی...
زامان‌سیز گلن بختیم...
Ramazan bayramı رمضان بایرامی
بیسکویت/ چئویریلمیش حیکایه
بیسکویت
تورکجه‌یه حاضیرلایان:
حسین واحدی
بیر گنج قیز هاوا آلانی‌نین[فرودگاه‌ین] گؤزلمه سالونون دا اوچوشو[پروازی] گؤزله‌ییردی. اوچوشونا نئچه ساعات قالدیغی اوچون، واختین سوووشماسینا گؤره گئدیب بیر کیتاب آلدی. او بیر پاکئت بیسکویت ده آلیب بیر اوتوراجاغین اوستونده ایله‌شیب کیتاب اوخوماغا باشلادی.
یانیندا بیر کیشی ده اوتورموشدو. اودا قزئته اوخویوردو. گنج قیز بیرینجی بیسکویتی یئینده، کیشی نین ده بیردنه بیسکویت یئمه‌سینی آنلادی. او چوخ حیرصله‌نیب آنجاق هئچزاد دئمه دی.
اؤز یانیدا، «راحاتسیز اولماسام یاخشی دیر. اولا بیلر یالنیش ائدیب دیر» دئدی.
بو ایش بیرداهادا تئکرار اولدو. هردفعه قیز بیسکویت یئیینده، کیشی ده بیر بیسکویت یئییردی، کیشی‌نین بو ایشی اونو لاپ حیرصله‌ندیرمیشدی، آنجاق تپکی [عکس العمل] گؤسترمک ایسته‌میردی.
پاکئت‌ده تکجه بیردنه بیسکویت قالاندا، اؤز یانیندا دئدی، «گؤروم ایندی بو ادب‌سیز کیشی نه ائده جک؟».
کیشی سون بیسکویتی یاری بؤلوب، یاریسین یئدی. بو ایشه چوخ اوز ایسته ییردی! او چوخ حیرصله‌نمیشدی. بوآن هاوا آلانین یوکسلته‌جی [ایسپیکئری] اوچاغا مینمک زامانیدی، دئدی.
قادین کیتابی بوکوب، کیشی‌دن آجی باخیش‌لاری ایله آیریلدی. اوچاغین ایچینده صندلینده ایله‌شدی. گؤزلوگونو چانتاسینا قویاندا، چوخ تعجب ائتدی. آلدیغی بیسکویت چانتاسیندایدی. آچیلمامیش و ال دیمه‌میش!
چوخ اوزولموشدو! اؤزوندن آجیقلاندی...
آلدیغی بیسکویتی چانتاسینا قویدوغونو اونوتموشدو. او کیشی، بیسکویت‌لرینی حیرص یئمه‌دن اونلا پایلاشمیشدی.
بو یازینین یازاری بللی دئییل
حیکایه حاقیندا
حیکایه حاقیندا
یازار: آیخان آیواز
کؤچورن:حسین واحدی
حیکایه‌نی چوخ چتین ژانر [نوع] آدلاندیریرلار. بو فیکیرله تامامیله راضییام. دونیادا، ائله‌جه ده آذربایجان تورکجه‌سینده حیکایه اوستا‌لاری بارماقلا ساییلا‌جاق قدردیر. بیزیم حکایه اوستا‌لاریمیز دئییلنده عقلا ایلک اولا‌راق جلیل محمدقولوزاده گلیر. میرزه جلیل حیکایه‌نین اؤزودور.
حیکایه و پووئست [روایت/آنلاتی] ژانری‌نین أن ده‌یرلی نمونه‌لرینی ایسه روس نثری یارادیب، بو شوبهه‌سیزدیر. پلاتونوو، کونستانتین پاوستووسکی، یوری کازاکوو، آنتون پاولوویچ چئخوو، واسیلی شوکشین، ایوان بونین، لئو تولستوی، یوری تریفونوو، آستافیئو و باشقا یازیچی‌لار بونون باریز نمونه‌سی اولا بیلر. اونلارین ساده سوژئت‌لی حیکایه‌لری و پووئست‌لری چوخ ماراق‌لی بیر تحکیه ایله یازیلیب و اوخوجولار طرفین‌دن رغبتله قارشیلانیب.
.
اینسانلیق قایدالاری
اینسانلیق قایدالاری
حاضیرلایان: حسین واحدی
جیسم سنین‌دیر. اونو سئو، یا دا نیفرت ائت. حیات بویو سنینله بیرلیکده اولا‌جاق. “حیات” آدلانان و یاشادیغین مدتجه داوام ائدن بیر مکتبه داخیل اولموسان. داوام‌لی درس‌لر کئچیریله‌جک و بون‌لار هئچ واخت بیتمه‌یه‌جک، هر گون یئنی حادثه‌لر یاشاماق، اؤیرنمک، تجروبه الده ائتمک فورصتین اولا‌جاق. بعضی‌لری سنین ایدارنده اولا‌جاق. بو تجروبه‌لری یا سئوه‌جکسن، یا دا بوش حساب ائده‌جکسن، آما بون‌لار اولا‌جاق. سهو‌لر یوخ، یالنیز درس‌لر وار. بؤیومک، سیناق و یانیلما مدتی‌دیر. موفقیت‌سیزلیک یالنیز موفقیتین آلت پیلله‌لری‌دیر. اوولکی موفقیت‌سیزلیک‌لر سونراکی اوغورلاری‌نین نماینده‌لری‌دیر.
درس‌لر اؤیرنیلینجه‌یه قدر تکرار ائدیلیر. درس‌لر مختلیف فورما‌لاردا اؤیرنی‌لنه قدر سنه تقدیم اولونا‌جاق. درس‌لرینی تامامیله اؤیرنن‌دن سونرا دیگرلرینه باشلاما حاقین اولا‌جاق.
اؤیرنمک اصلا بیتمز. حیاتین هئچ بیر حیصه‌سی درس‌سیز اولماز، یاشادیغین مدتجه هر آن اؤیرنیله‌جک درس‌لر اولا‌جاق.
“اورا” بورا‌دان داها یاخشی بیر یئر دئییل. حیاتی‌نین هر آنیندا اصلینده بورداسان. بوردان باشقا هر یئر “اورا” اولا‌جاق و هر واخت “اورا” “بورا‌دان” چوخ داها یاخشی گؤرونه‌جک.
سن‌سیز یا دا سنینله. باشقا‌لاری سنین آینان‌دیر. اؤزونده سئویب، یا دا نیفرت ائتدیگین شئی‌لر اولماسا، باشقا اینسانلاری سئوه بیلمز، یا دا نیفرت ائده بیلمزسن.
حیاتدا نه ائتدیگین تامامیله سنه باغلی‌دیر. احتیاجین اولان هر شئیه صاحبسن. اونلارلا نه ائدجه‌یین تامامیله سنین مسئولیتینده‌دیر. سئچیم سنین‌دیر!
"صباحی" ایللیك اؤیكو اؤدولو
"صباحی" ایللیك اؤیكو اؤدولو(بیرینجی ایل-1392)
SABAHI SHORT STORY AWARD :2013
اؤدول: بیر میلیون تومن (بیرینجی اؤیكو اوچون)
(ایلك اون اؤیكو اوچون یادیگارلیق هدیه و تقدیر لؤوحه سی وئریله‌جك.)
- اثرلرین گؤندرمه مؤهلتی: 31 شهریور 1392
- یاریشمانین سونوجو اعلان ائدیلن گون: 1 آذر 1392
- اثرلر آذربایجان توركجه‌سینده و عرب الیفباسیندا یازیلمالی دیر.
- هر یازیچی بیر اثر گؤندره بیلر.
- اثرلرین ایندی‌یه‌دك باشقا یئرده (كیتاب، درگی، سایت) چاپ اولونماماسی گركلی دیر.
- حیكایه لر word دا تایپ اولونوب بو آدرسه گؤندر مه لی دیر: sabahi.odulu@gmail.com
- اثرله بیرلیكده اؤزونوزدن بیر قیسا بیوگرافی گؤندرین.(شكیلینیز، تیلفون نومره نیز اونوتولماسین)
- ایلك اون حیكایه بیر كتابدا چاپ اولونوب یاییلاجاق.
آرتیق بیلگی اوچون بورانی تیکلایین
دیل بلاسی
دیل بلاسی
یازار: آنتون چئخوو
کؤچورن: حسین واحدی
سحر یالتا‌دان گئری دؤنموش جاوان خانیم ناتالیا میخایلوونا ناهار سوفره‌سینده دیل-بوغازا قویما‌دان ارینه کریمین [Krımın] گؤزل‌لیک‌لرین‌دن بحث ائدیردی. بون‌دان خوشحال‌لانان اری ایسه آروادی‌نین حئیران‌لیق دولو اوزونو نوازیشله سوزه‌رک اونو دینله‌ییر و آرا-سیرا سوال‌لار وئریردی…
- دئییرلر آما اورا‌لاردا یامان باهاچی‌لیق‌دیر؟ - دئیه سؤزآراسی اری خبر آلدی.
- نئجه دئییم سنه؟ آ-آ-تام، منجه بو باها‌لیق صحبتی چوخ شیشیردیلیب. اونا قالسا، یقین هئچ "شیطان" آدلی مخلوق دا دئییلن‌لر قدر قورخونج دئییل. مثلا، بیز یولیا پئتروونا ایله گونو ایگیرمی بئش ماناتا چوخ راحت و صمیمی اوتاق کیرایلمیشدیک. عزیزیم، یاشاماغی باجارماق‌دان چوخ شئی آسیلی‌دیر. البته، اگر کؤنلون‌دن هارا ایسه داغلارا… مثلا، آی-پئترییه گئتمک کئچیرسه، اوندا سن، آیدین مسئله‌دیر کی، اؤزونه بلدچی و آت کیرایه‌له‌ییرسن و اوندا، سؤزسوز کی، خرجین آرتیر. هم ده دهشت آرتیر! آما، واسیاجان، اورا‌لاردا داغلار دا داغ‌دیر ها! تصورونه یوکسک، چوخ یوکسک داغلار گتیر، حتی کیلسه‌دن ده مین دفعه اوجا داغلار… زیروه‌لری دومان ایچینده ایتیب-باتان، اتک‌لرینده ایسه نهنگ قایا‌لار... و شام آغاج‌لاری بیتن… ائه، ایندی اورا‌لاری تصورومده جانلاندیرماغا دا عاجزم!
- هه، بیر د… سن بوردا اولمایاندا من ژورنال‌لاردان بیرینده اورا‌لارداکی تاتار بلدچی‌لر حاقدا یازی اوخوموشدوم… چوخ سیرتیقمیش‌لار! یعنی دوغرودانمی اونلار بو قدر عجایب‌دیرلر؟
عالم گؤزل
عالم گؤزل...
یازار: حسین واحدی
تانریم،
منه دینجلیک وئر، سئومک، الدن یاپیشماق، اؤز گوونج، یولداشلیق، باریش سئورلیک و بوتون گؤزلیک‌لری وئر...
بوتون اینسانلاری سئومک ایسته‌ییرم، باریشی، گؤزل‌لییی اونلارلا پایلاشماق ایسته‌ییرم...
عزیز تانریم، نه گؤزل اولار بئله یاشام،
یولداش اولوب، باریش ایچینده ال- اله وئریب سئوینج له یاشایاق...
اوشاقلاری سئوک، سینیرلاری قالدیراق، اورکلره ایشیق ساچاق، کیمسه‌یه ضرر وئرمه‌ییب، الدن توتاق، بیر-بیریمیزه گولمک یئرینه، بیرگه گولک، سئوینجی بوتون گؤیه، یئره سه‌رک...
عالم گؤزل، حیات گؤزل، سئونلرین گؤزلرینده...
قاندی‌نین باشماق تایی‌سی
قاندی‌نین باشماق تایی‌سی
چئویرن: حسین واحدى
بیرگون، قاندی، قاطارا میندیک‌ده باشماغینین بیر تایی دمیر یولونون اوستونه دوشدو. او قاطارین یولا دوشمه‌سینه گؤره، باشماق تایینی گؤتورمک اوچون یئره دوشه بیلمه‌دی. او آن قاندی سویوق قانلی‌لیقلا آیاغینداکی باشماق تایی‌سیندا چیخاردیب، یولجولارین چاشمیش (حیرت‌لی) باخیش‌لاری‌نین قاباغیندا، آرخایا، اوبیری تایی‌نین یانیا آتدی. یول یولداش‌لارینین بیری بو ایشین ندنین اوندان سوروشدو. قاندی گولومسه‌ییب، جاواب‌دا: «یازیق بیر کیشی، قاباقکی باشماق تایینی تاپاندا، ایندی اوبیری تایین‌دا گؤتوروب، استفاده ائده بیلر.» دئدی.
حیکایه یازماغین 8 قایداسی
حیکایه یازماغین 8 قایداسی!
مشهور یازیچی‌نین داهیانه مصلحت‌لری
یازان: کورت ووننئقوت
داها چوخ سوسیال فانتاستیکا (علمی-تخیلی حیکایه) نوعوندا یازان آمئریکا یازیچی‌سی کورت ووننئقوت ایری حجم‌لی اثرلری ایله یاناشی، هم ده حکایه‌لری ایله مشهوردور.
ووننئقوت یازماغا یئنی باشلایان‌لارا داهیانه حیکایه یازماغین سککیز قایداسینی آچیقلاییر:
1. ائله ائدین ، حکایه‌نیزی اوخویان زامانی‌نین هدره گئتدیگینی دوشونمه‌سین.
2. اوخوجویا اونون دقتینی چکه‌جک، ان آزی، بیر اوبراز وئرین.
3. هر بیر اوبراز نه ایسه ایستمه‌لی‌دیر، بیر ایستکان سو اولسا بئله.
4. هر بیر جمله بو ایکی‌سین‌دن بیرینه خیدمت ائتمه‌لی‌دیر – یا اوبرازی آچما‌لی، یا دا سوژئتی اینکیشاف ائتدیرمه‌لی‌دیر.
5. حیکاینی باجاردیغینیز قدر فینالا یاخین یئردن باشلایین.
6. سادیست (آیریلارین زجریندن لذت آپاران) اولون. اوبرازلارینیزین شیرین و گوناه‌سیز اولماغینا باخمایین، ائله ائدین، اونلارین باشینا دهشت‌لی شئی‌لر گلسین. اوخوجو یالنیز بو یوللا قهرمان‌لارینیزین نئجه خمیردن یوغورولدوغونو آنلایا بیلر.
7. یالنیز بیر نفرین ذؤوقونو اوخشاماق‌دان اؤترو یازین. سیز پنجره‌نی آچیب بوتون دونیایا عشق اعلان ائتسه‌نیز، سیزین حکایه‌نیز، بئله دئمک مومکونسه، ستلجم اولا بیلر.
اوخوجونوزا باجاردیغینیز قدر قیسا زامان کسیگینده، باجاردیغینیز قدر چوخ اینفورماسیا (بیلگی) وئرین. جهنمه قالسین قئیری-معین‌لیک هیجانی. اوخوجو نه‌یین هارادا و نئجه باش وئردیگینی او قدر یاخشی بیلمه‌دیر ، ایشدیر بیردن بؤجک‌لر سون صحیفه‌نی یئسه‌لر، حیکاینی اؤزو بیتیرمه‌یی باجارسین.
*حاضیرلایان:حسین واحدی
