گول ساتان
گول ساتان
آی گول ساتان هایانداسان؟ گل توكانا. «سونای گلیر» گول باغلا سئوگیلیمه. آی گول ساتان، باغلا قیرمیزی قیزیل گوللری. سئوگیلیم منی گؤزله ییر. گول لری بَزه. عطیرلی گول قوی، قوخوسو داغیلسین یوللارا، بیلسین هامی، «سونای» گلیب دیر. گول وئرك سئوگیلیمیزه، گول ساتان هایاندا قالدین؟ یامان داریخدیم، تئز آچ توكانی!
یازان: حسین واحدی
«سونای» سئوگیلیلر گونون قوتلو اولسون سئوگیلیم
«سونای» سئوگیلیلر گونون قوتلو اولسون سئوگیلیم
ده یرلی سئوگیلیم، یاشیللیق لار گونو، سئوگینین سونسوز یولو، سایغینین قایغی ایله بیر اولان گونو، سنه وارلیغیمسان دئمه یه بهانه اولان گون، وفالی یام سنه بونو بیرداها خاطیرلادان گون، اوره ییم سنه چیرپینیری بیلن گون، سنی منی یاشادان ان بؤیوك بهانه سن دئین گون، یالنیز سنی سئویرم سسله ین گون، اؤلورم سنین اوچون هارایلانان گون، بیرتانم سن آنجاق بیلمه لیسن دئین گون، سنین اوچون یارانمیشامی آنان گون، سونایی قوناق ساخلاییب سئوگیلیلر گونون توتان گون سن عزیز سئوگیلیمه قوتلو اولسون!
یازان: حسین واحدی
sonay mübarək - سونای قوتلو اولسون
سونای آذربایجانین سئوگیلیلر گونو شکیل لری
sonay sevgililər günü şəkilləri
سونای 31 زومار (شهریور)
سونای قوتلو اولسون
سونای
سونای
سونای
«سونای» یوردوما خوش گلیبسن. بیزی یامان یئرده یوخلاییبسان، كولتورمون آزقینلیغیندا گونش اولدون یوردوما. سئوگیلیله لر چوخداندی سنی اونوتموشدولار. نئچه واختدی بیر اؤزگه والئنتاین آدلی بیریسی اولوسومو آلداتمیشدی. دئمه سنین یئرینه كئچمك ایسته ییرمیش، یوخسا سن دورمو آنلاییب، قارا بولودلاری قیراغا آتیب، ساری ساچلی گونشیمیزی بیزه گتیردین. سن بیرداها منیم وارلیغیمی منه آنلاتدین. من اؤز وارلیغیمی اونوتماق ایسته میرم. سن گلن گون، 31 زومار (شهریور) یئر- گؤی سئوگی له نیر. سئوگیلیلر سئوگی دونو گئییر. سئوگیسیزلرده سئوگی نی آختاریر. هامی قیرمیزی بویالی اورك، قیزیل گول، سئوگی مكتوبو، ... و بوتون سئوگی قوخوسو وئرن شئی لری آلیر. آنجاق سن بو گؤزللیگی یارادیسان. سئوگیلیلر بو گونده گرچكدن بیر- بیری دوشونولر. آیریلیق لار كوسوب گئدیرلر. باریش ایسه یورد سالیر. گونش ساچلارین داریر. اورك لر بیرگه دؤیونور. سئوگی هر یئره یاغیر. سارای لار، خان چوبان لاری هارایلیر. آنجاق سن هر ایل زومارین سون گونونده گل. هامی سنی گؤزله ییر. سن اولدوغوندا سئوگی یاشانیر. گؤزل آذربایجان توركجه سینده نغمه لر قوشولور. آشیق لار، سازلاریندا اصلی- كرم سسلندیریرلر. یوردوم جننته دؤنور، گئجیكمه هئچ زامان، آمان دیر تئز گل!
یازان: حسین واحدی
ـ سونای، آذربایجاندا سئوگیلیلر گونون آدیدیر و هر ایل زومار (شهریور) آیینین 31-نده اولور.
اورمونون قاجار ائوله ریندن
ندن هئچ كیم بئله نچی تاریخ دن قالان ایزلری قورماغا چالیشمیر؟ ندن اورمیه نین یئنی دوروموندا تاریخ ایزی سیلینمكده دیر؟ شهره قوناق گلنده هارانی گؤسته ریب تاریخیمیزدن دانیشاق؟ كیمسه نین قئیرتینه توخونمورمو؟
اومود ائدیرم بیری بو هارایلاری ائشیدیب بیر ایش ائتسین.
- شكیل: اورمیه، شورا خییاوانی، مجیدی افشار ائوی (قاجار دؤورو)
90/6/27
2011- یای- زومار آیی
شهریار شعر تانری سی
حاضیرلایان: حسین واحدی
شهریار اورتا تحصیلاتینی بیتیردیكدن سونرا تئهرانا گئدیب، اورادا دار الفنون اوخولوندا درسینه آرد (داوام) وئریب سونرا دوكتورلوق قولوندا یوكسك تحصیل آلماغا باشلاییب. او دوكتورلوغو بیتیرمه ییب، سئوگی آجی سی و باشقا ندن لره گؤره درسی یاریدا بیراخار.
شهریار درسی ترك ائدندن سونرا دؤرد ایله دك خوراسانا گئدیب مشهد و نئیشاپورون سند یازدیرما (ثبت اسناد) ایداره سینده چالیشار. سونرالار شهریار تئرانا قاییدیب 1315-جی گونش ایلینده اكینچیلیك بانك-یندا ایشه باشلاییر. بیر مدت دن سونرا تبریزه داشینیر.
بو اولو (والا مقام) شاعیر عؤمرونون سونلاریندا آلیز (مریض) اولوب تئهراندا خسته خاناسیندا معالجه ا.چ.ن ساخلانیلیر. سونوندا زومار (شهریور) آیینین 27-سینده یاشاما سون نوقطه نی قویوب، تبریزین مقبرة الشعرا-سیندا توپراغا تاپشیریلیر.
شهریارین یارادیجیلیغی
بؤیوك شعر اوستادی شهریاردان فارسجادا یاقلاشیق (تقریبا) 28 مین بئیت و توركجه ده یاقلاشیق 3 مین بئیت شعر یادیگار قالیب. اونون شعرلری چاغداش (معاصر) ایله كئچمیشده اولان شاعیرله رین هامیسین یانیندا یوكسك (برتر) ساییلیب همده رقیب سیز ساخلاییب دیر.
شهریارین شعرلری همیشه خالقین دیلینده اوخونوب، دیللر ازبری اولوب، اونون آدینی دیری ساخلاییب دیر. حضرت علی (ع)-ا اولان شعری كسین لیكله ایماملارا اولان تایسیز شعرلردن بیریدیر و بو عزیز شاعیری ائمه اطهاری سئونلرین یانیندادا عزیز ائدیب دیر. شهریار توركجه ده-ده «حئیدر بابایا سلام» یارادیجیلیغی ایله توركجه یه، یئنی بیر جان وئریب، پهلوی رئژیمینین او ظولوم و ازمك چاغلاریندا توركجه میزی دیری ساخلاییب دیر.
بو قیسا یازیدا بو اولو شاعیری تانیتماق و اونون یارادیجیلیقلاریندان سؤز آچماغا یئر اولمایاجاق و تكجه زومار آیینین 27-سی بو عزیزیمیزین اولوولاما (عزیزلمه) گونو موناسیبت ایله ایسته دیم شهریار-ا اولان بورجوموزو یئرینه یئتیریب، عزیز شاعیریمیزین آدینی دا دیری ساخلایام.
سونوندا شهریاردان بیر گؤزل شعری سیز عزیزلریمه سونورام (تقدیم ائلیرم):
تورکون دیلی
تورکون دیلی تک سئوگیلی ایسته کلی دیل اولماز
اؤزگه دیله قاتسان بو اصیل دیل اصیل اولماز
اؤز شعرینی فارسا – عربه قاتماسا شاعیر
شعری اوخویانلار ، ائشیدنلر کسیل اولماز
فارس شاعری چوخ سؤزلرینی بیزدن آپارمیش
« صابیر » کیمی بیر سفره لی شاعیر پخیل اولماز
تورکون مثلی ، فولکلوری دونیادا تک دیر
خان یورقانی ، کند ایچره مثل دیر ، میتیل اولماز
آذر قوشونو ، قیصر رومی اسیر ائتمیش
کسری سؤزودور بیر بئله تاریخ ناغیل اولماز
پیشمیش کیمی شعرین ده گرک داد دوزو اولسون
کند اهلی بیلرلر کی دوشابسیز خشیل اولماز
سؤزلرده جواهیر کیمی دیر ، اصلی بدلدن
تشخیص وئره ن اولسا بو قدیر زیر – زیبیل اولماز
شاعیر اولابیلمزسن ، آنان دوغماسا شاعیر
مس سن ، آبالام ، هر ساری کؤینک قیزیل اولماز
چوخ قیسسا بوی اولسان اولیسان جن کیمی شئیطان
چوق دا اوزون اولما ، کی اوزوندا عاغیل اولماز
مندن ده نه ظالیم چیخار ، اوغلوم ، نه قیصاص چی
بیر دفعه بونی قان کی ایپکدن قزیل اولماز
آزاد قوی اوغول عشقی طبیعتده بولونسون
داغ – داشدا دوغولموش ده لی جیران حمیل اولماز
انسان اودی دوتسون بو ذلیل خلقین الیندن
الله هی سئوه رسن ، بئله انسان ذلیل اولماز
چوق دا کی سرابین سویی وار یاغ – بالی واردیر
باش عرشه ده چاتدیرسا ، سراب اردبیل اولماز
ملت غمی اولسا ، بو جوجوقلار چؤپه دؤنمه ز
اربابلاریمیزدان دا قارینلار طبیل اولماز
دوز واختا دولار تاختا – طاباق ادویه ایله
اونداکی ننه م سانجیلانار زنجفیل اولماز
بو « شهریار » ین طبعی کیمی چیممه لی چشمه
کوثر اولا بیلسه دئمیرم ، سلسبیل اولماز
آشیق قوربان لا دانیشیغیمیزدا: آشیق سؤزو ائلین سؤزودور
آشیق قوربان لا دانیشیغیمیزدا:
آشیق سؤزو ائلین سؤزودور
آشیق موسیقی سینه یئنیدن باخمالیییق
آشیق موسیقی سی نین زحمت چكن لریندن بیری اولان، آشیق قوربان لا موصاحیبه ایسته دییمیز زامان، صمیمیت له بیزی اؤز ائوینه دعوت ائتدی و اورك سؤزلرینی سیز عزیز اوخوجولاریمیزا چاتدیرماق اوچون، بیزله پایلاشدی. آشیق قوربان غربی آذربایجانین ده یرلی آشیق لاریندان ساییلیر، بو اوستاندا دونیایا گؤز آچماسادا، ایستر- ایسته مز بو اوستانین آدینا مقام لار قازانیب ده یرلی ایشلر ائدیب دیر، بونلاردان:
75- نجی ایلده «ساری تئل» آشیقلار قروپونون یاراتماسی
80،79 و 81 – نجی ایللرده ایرانین رادیو – تلویزیون مركزلرینین موسیقی ایشلرینده بیرینجی یئری توتماسی
82 – نجی ایل توركیه نین آنكارا شهرینده اورمیه و تبریز صنعتچی لری ایله اوچ گونلوك كنسرتین ایجراسی
2007 – نجی ایل باكی شهرینده بئشینجی اولوسلار آراسی موسیقی سمینارینا قاتیلماسی
2008 – نجی ایلده قیبریس ده سازلی – سؤزلو چیخیش
2009 – نجو ایلده توركیه ده، آشیقلار یاریشماسیندا 17- دی اؤلكه نین ایچینده، ایكینجیلیك مقامینین اله گتیرمه سی
2010 – نجو ایلده دانماركدا آنا دیلی اوچون مراسیمه قاتیلماسی
- سؤال: آشیق، دئمك اولار سیزی چوخلاری تانیر، آمما بیرداها اؤزونوزو اوخوجولاریمیزا تانیتدیرین لوتفن؟
من آشیق قوربان پور ولی علیار، 1348 – نجی گونش ایلینده مؤحتشم قاراداغین دیزمار ماحالینین علیار كندینده آنادان اولموشام، 12 یاشیما كیمین اورادا یاشامیشام و سونرا 1363- نجو ایلده عاییله وی اورمیه یه كؤچوب گلمیشیك.
- سؤال: بو صنعتی هاردان و نئجه باشلادیز، اوستادلارینیز كیملر اولوبلار؟
من اوشاقلیقدان اوخویاردیم، همده منیم آتامدا آشیقییدی و یاخشی سسی وارییدی، پئشه كار (حرفه ای) دئییلدی آمما یاخشی اوخویاردی و اؤزللیكله قاراباغ شیكسته سین یاخشی ایفا ائدردی و اوردا اولان نئچه پارا كندده هله ده آدی دئییلر و دئمك اولار منیم ایلك اوستادیم آتام اولوبدور، او زامانلار منیده مجلیس لرده اوخوداردیلار و منده ائل ماهنیلارین اوخویاردیم و سونرا اورمیه یه گلدیك، او زاماندا هئچ یئرده كیلاس یوخویدو و سونرا خیدمته گئتدیم، بیر گون مورخصی یه گلنده گؤردوم آشیقلار قهوه خانالاردا اوخویورلار، منده ائوه گئتمك یئرینه قهوه خانایا گئتدیم و آشیق لارا قولاق آسدیم.
خیدمتدن قورتولاندان سونرا، بیر ساز باغلاتیم و اؤیرنمه یه باشلادیم، آلتی آی اوستا تاپا بیلمه دیم و سازی كؤكسوز چالدیم، نئچه واختدان سونرا بیر اوستا تاپدیم و سازین پرده لرینی اؤیرندیم و یاواش- یاواش نئچه اوستا یانیندا چئشیتلی (مختلف) پرده لر اؤیرندیم، آشیق لیغا چوخ علاقه م اولدوغو اوچون اوستالار دئیه نی تئز اؤیرنیردیم، سونرالار تبریزده رحمتلیك اوستاد سلیمی نین یانیندا، مهندیس گنجه ای آدیندا بیر اوستاددان سازی دوزگون اؤیرندیم و سونرا اوستاد فرشید جهاندیده دن سازی بیلیمسل (علمی) اولاراق اؤیرندیم و باشقا چوخلو اوستادلاردا منیم ساز اؤیرنممده اولوبلار.
1370 دن آشیق لیغی پئشه كار اولاراق باشلامیشام و ایندی ده، اون ایلدن چوخدو » ماهور« آدلی مؤسسه ده آشیق كیلاسلاریم وار و علاقه سی اولانلار بورایا گلیب بیلیمسل اولاراق آشیقلیق اؤیره نیرلر.
- سؤال: آشیق صنعتینینین دورومونو (موقعیت ین) نئجه گؤروسونوز؟
آشیق صنعتی دونیادا فولكلور صنعتی دیر و هر یئرده فولكلوریك صنعتینه ده بودجه آییریرلار و بیزیم اؤلكه ده ده گرك بو ایش گؤرونسون و بو ایشله یئنی هاوالار یارانار. بو صنعت تبلیغ اولوب تانیتدیریلمالیدیر و گرك گئنیش كوتله (مردم) تانیسین و تكجه آشیغین اؤز یاخینلاری، قوهوم لاری و دوستلاری تانیماقلا آشیق صنعتی دیری قالماز و گرك شهر مدنیتینه قاتیلسین، بو صنعت معنوی بیر صنعت دیر و تانینمالیدیر. تبلیغات اولونورسا من بو صنعتین گله جه یینی یاخشی گؤرورم.
- سؤال: اوستانیمیزدا و اورمیه نین اؤزونده بو صنعت نجور یاشانیر؟
غربی آذربایجاندا و یا اورمیه نین اؤزونده بو صنعت قهوه خانالاردا وار، اورمیه ده، اورمو آشیق هاوالاری چالینیر، آمما بوتونلوكده بو اوستاندا بو صنعت یاد اولوب، توتالیم اورمیه نین اؤزونده 3 قهوه خانادا آشیق موسیقی سی چالینیر و اورا گلن ثابیت موشتریلرین سایی 150 نفر اولسون، بوجور بؤیوك شهره 150 نفر بیرزاد دئییل و هئچ ساییلیر و گرك غربی آذربایجاندا بو صنعت تانینسین و تبلیغ اولونسون و گنج لری بو یولا علاقه ائتدیرك و بونون یانیندا همده آشیق صنعتین چاغداش لاتدیراق (معاصر لشدیرك) و نوتا كؤچورك.
- سؤال: یاخین زامانلاردا اورمیه ده بیر آشیق درنه یی (انجمنی) آچیلیب اورانین ائتگیسی (تأثیری) نه قدر اولا بیلر و اورانی نئجه گؤرورسونوز؟
اورانی آچماق چوخ یاخشی ایشلردن بیرییدی، آشیق لارا كارت وئریلیب، اوردا آشیق لار تانینیر و دئمك اولار رسمی بیر یئردیر، آمما قهوه خانالار بوجور دئییل. اورا عاییله لر ده قاتیلا بیلیر، آشیق لار چالیر، اوخویور و هردنده تنقید ده اولونور، اوردا هفته ده ایكی آشیق اوخویور، البته غربی آذربایجانین چئشیتلی شهرلریندنده قوناغیمیز اولور و آشیقلار اورا دعوت اولورلار.
- سؤال: قاتیلدیغینیز فئستیواللاردان و گتیردیگینیز مقاملاردان دئیین؟
من اوچ سئری ایران رادیو- تلویزیون فئستیواللاریندا مقام گتیرمیشم، تقریبا 79، 80 و 81 – نجی ایللرینده اوچ ایل دالبادال مختلف عونوانلاردا بیرینجی اولموشام، سونرالار، آذربایجاندا بیر سئمینارا چاغیریلمیشام و آشیق مكتب لرینین ایضاحین آپارمیشدیم، توركیه ده اوچ گونلوك بیر كنسئرته گئتمیشم و باشقا یئرلرده اولوبلار و 2009 – نجو ایلده توركیه ده اون یئددی اؤلكه دن قاتیلان آشیق لار فئستیوالیندا ایكینجی اولموشام.
- سؤال: آشیق هاوارلاریندا یازیرسیزمی؟
چوخلاری بو ایشی گؤرور، مثلن آشیق چنگیز مهدی پور آشیق صنعتی نی نوتا كؤچورور و بو ایشین هله ده داوامی وار، من اؤزومده قاباقجالار كندیمیز آدیندا بیر كیتاب چاپا وئرمیشم و اؤز شعرلریمی یازمیشام، آشیق صنعتی اوچون بیلیمسل (علمی) بیر ایشده حاضیرلاییرام و اینشاللاه گله جكده چاپا وئره جه یم.
- سؤال: غربی آذربایجان دا آشیق موسیقی سی اوچون پئشه كار ساز باغلایاندا وارمی؟
بو ایش اورمیه ده، خوی و اوستانین باشقا شهرلرینده ده گؤرونور، آمما اوستانیمیزدا پئشه كار اولاراق بو ایشی گؤرن یوخدور و پئشه كار سازی آلماق اوچون تبریزه یوخسا باكی یا گئتمه لیییك.
- سؤال: سون سؤزونوز و اوره یینیزده اولان هر نه وار بویورون؟
آشیغین سؤزو ائلین سؤزودور و بو سؤزلر اؤزوموز اوچون دئییل، منجه آشیق موسیقی سینه یئنیدن باخمالیییق و بو قونودا مطالعه ائتمه لییك، بونون گؤزلیگینه، معنوی اولدوغونا یئنیدن باخاق، بیزیم كوتله میزین هرنه دری ، اورك سؤزو وار بو آشیق موسیقی سینده دیر و بونا گؤره آشیق صنعتین دیری ساخلامالییق. سونوندا بوتون اوستادلاریمدان و اؤزللیكله آشیق موسیقی سینه یئنیلیك گتیرن و دونیایا تانیتدیران آشیقلاردان، نمونه اوچون چنگیز مهدی پور،عمران حیدری، حسین اسدی، اوستاد گنجه ای و... تشككور ائدیرم و سیزه ده آشیق موسیقی سینی یوخلادیغینیز اوچون تشككورومو بیلدیریرم.
دانیشیغی آپاران: حسین واحدی
تیراختور 3 - - - ایستیقلال 2
یاشاسین تیراختور
آلتینجی یئددیجه دن سونرا سیرالاما:
| |||||||||||
| تیم | اویونلار | اودوش | ائشیت | اودوزما | وورولموش قوللار |
یئین قوللار |
قول فرقی |
امتیاز | |||
| 1 | تراکتورسازی | 6 | 5 | 0 | 1 | 15 | 8 | 7 | 15 | ||
| 2 | استقلال | 6 | 4 | 1 | 1 | 12 | 6 | 6 | 13 | ||
| 3 | نفت تهران | 6 | 3 | 2 | 1 | 9 | 6 | 3 | 11 | ||
| 4 | صبای قم | 5 | 3 | 1 | 1 | 8 | 6 | 2 | 10 | ||
| 5 | ذوب آهن | 6 | 2 | 3 | 1 | 9 | 8 | 1 | 9 | ||
| 6 | شاهین | 6 | 2 | 2 | 2 | 6 | 3 | 3 | 8 | ||
| 7 | سپاهان | 6 | 2 | 2 | 2 | 7 | 6 | 1 | 8 | ||
| 8 | فجر سپاسی | 6 | 2 | 2 | 2 | 6 | 7 | 1- | 8 | ||
| 9 | ملوان | 5 | 1 | 4 | 0 | 8 | 4 | 4 | 7 | ||
| 10 | راه آهن | 6 | 1 | 4 | 1 | 9 | 9 | 0 | 7 | ||
| 11 | سایپا | 6 | 2 | 1 | 3 | 7 | 8 | 1- | 7 | ||
| 12 | فولاد | 5 | 2 | 1 | 2 | 4 | 6 | 2- | 7 | ||
| 13 | پرسپولیس | 6 | 1 | 3 | 2 | 10 | 10 | 0 | 6 | ||
| 14 | شهرداری تبریز | 6 | 1 | 3 | 2 | 7 | 12 | 5- | 6 | ||
| 15 | نفت آبادان | 5 | 1 | 2 | 2 | 4 | 6 | 2- | 5 | ||
| 16 | داماش گیلان | 6 | 1 | 2 | 3 | 4 | 8 | 4- | 5 | ||
| 17 | مس سرچشمه | 6 | 1 | 1 | 4 | 5 | 13 | 8- | 4 | ||
| 18 | مس | 6 | 0 | 2 | 4 | 6 | 10 | 4- | |||
گولوم من
گولوم من
آمان گؤزل حسرتیندن یانارام،
هیجران اودون شیرین جانا سالارام.
خزان ائتدین بو عؤمرومون باغینی،
هئیوا كیمی سارالیبان سولوم من.
یئتیشمه دیم نازلی یارین چاغینا
سجده قیلیم قاشلاری نین طاغینا.
قئیس كیمی چیخیم لئیلا داغینا،
مجنون اولوب صحرالاردا قالیم من.
سیاه زولفر اوزه سالمیش سایانی،
مگر بو ظولوما عاشیق دایانی.
فرهاد كیمی بركیتمیشم قایانی،
عهد ائتمیشم یار یولوندا اؤلوم من.
یار، یاردان آیریلسا البت قوجالی،
اؤلدورَر گؤزلرین وئرمز ماجالی.
میسكین دئیر یا رب حالیم نئجولو،
ایللره جن آغلاماییم گولوم من.
حسین قصاب اوغلو (بالوولو میسكین)
آتا
آتا
هر بیر اینسانین آرخاسی، قوللاریمیزین توم گوجو، اورگیمیزین اورگی،كیراللار-كیرالی، آتادیر،
گئجه-گوندوزون یوخ ائدیر، آئیله سی ایسه شن یاشاییر، جننت ایسه آنالاریندیر!
آتا، بوتون دونیالارین پادیشاهیدیر، دونیانین كؤكو بیزیمده اولسا «یئنه سولطان آتادیر»
آتا گوجدور، باشا تاج قلبه فرحدیر، او حورمت دیر، كیشیلیكدیر،تومجه لره گلمه ین بیر اینساندیر،
آتا شرفدیر، آتا شؤوكتدیر، زیروه دیر، آتا رب دیر، آتا بیزی دونیایا پای وئرندیر،
آتا، آتادیر...
یازان: حسین واحدی
