كندیمیزده آنامین تندیری
كندیمیزده آنامین تندیری
كندیمیزده، گؤز آچدیم دونیایا، دیل آچدیم دانیشدیم و آنامین لای - لای لاریندان موسیقی اؤیرنیب نغمه لر اوخودوم. گونلرین بیر گونون ده تندیریمیزین تؤكولوب داغیلان بیر چاغیندا ، آنام دئدی: آی منیم نازلی بالام آرتیق داها تندیریمیز تؤكولوب – داغیلیب دیر، گل گئدك تندیر توپراغی گتیرك و یئنی دن بیر تندیر قویاق (دیكك)، دئدیم: آی آنا جان تندیر توپراغی ندیر؟ آنام دئدی: گول بالام بیر قیرمیزی توپراقدیر یاخشی بیر پالچیغی (چومورو) اولار و اوندان گؤزل تندیر قوروب قویماق اولار بونون اوچون ده بو توپراغا تندیر توپراغی دئییریك ،آنجاق اوزون سؤزون قیساسی بیز یولا دوشدوك ، كندین شمال تاییندا بیر تپه وارییدی، بیز تپه یه دوغرو یولاندیق و یئتیشدیك. تپه نین چوخلو یئرلری قازیق- قازیق ایدی من سوروشدوم: آناجان بو تپه ندن بؤیله قازیلیبدیر، آنام سؤیلدی: دوزلو بالام بو تپه نین توپراغی چوخ یاخشی قیرمیزی توپراق اولدوغو اوچون كندین هامیسی بوردان توپراق آپاریرلار. آناملا بیرلیكده توپراغی قازیب بیر ائششك ایله بیر قاتیرا یوكلییب ائوه قاییدیق. ائوده باشلادیق پالچیق توتماغا و پالچیغی بوللو (چوخلو) آیاخلاماغا، بیر گون سونرا (پالچیق یئتیشندن سونرا) آنام باشلادی تندیری قویماغا (دوزلتمگه)، آنجاق تندیر دوزلیب بیتدی. آنام تندیرده اود یاندیریب اونون پالچیغینی بیشیریب ساخسی(سفال) دك بركیتدی بیر گون سونرادا خمیر دوزلدیب چورك یاپدی ،آنام تندیریمیزده یئدی چئشیت (نوع) چؤرك یاپاردی: 1- ساج لاواشی 2- تندیر لاواشی و بئش چئشیت قالین چؤرك : 1- یالین قالین (خمیریله اولونموش قالین چؤرك)، 2- یاغلی فتیر (ساری یاغ ایله دوزلمیش خمیردن اولونان قالین چؤرك)، 3- سوت فتیری (سوت ایله اولونموش خمیردن اولونان قالین چؤرك) 4- قاتیق فتیری (یالین خمیرین اوزونه قاتیق یاخیب اونو قالین یاپاردی و بو فتیر هامیسیندان آرتیق قیزاراردی)، 5- ته ته (tƏ tƏ) (بو قالین چؤریی ده اؤزللیكله یاز چاغیندا داغ تره سینین واختیندا یاپاردی. آنام گئدیب داغدان یئملی اوتلاردان او جمله دن: یاغلیجا، قاز آیاغی، ماندا، سیغیر دیلی و باشقا دادلی – یئملی اوتلاردان دریب گتیریب و خمیرین ایچینه قویوب و بیر قالین و بؤیوك چؤرك یاپاردی بو قالین چؤرك هامیسیندان دادلی اولاردی. بو چؤرك لر كندیمیزین دییرمانیندا دارتیلان اونلاردان اولدوغو اوچون و بو اونلاتر كپكلی (سبوسدار ) اولدوغو اوچون بیرده یاناجاقلاری آغاج و تزك (حئیوانلارین فضولاتی) اولدوغو اوچون چوخ دادلی اولاردی. آنامین تندیرینده چوخلو شیرین آن لاریم اولوبدور، یاز ایله یای دا مكه، ات كابابی، یئر آلما كابابی بیشیرردیك، پاییزایله قیش دا ایسه چؤرك یاپاندان سونرا هامیمیز بیرلیكده آیاقلاریمیزی تندیره ساللاییب، آنام ایسه بیزه ناغیل دئیردی.
كاش او گونلر بیر ده قاییتسایدی! ... كاش!
یازان - گؤنده رن: بهرام حسینی – ماكی شهریندن
سئوگیلیم
سئوگیلیم
گئجه-گوندوزوم، جانیم- اؤزوم، سئوگیم- سؤزوم، اونوتمارام سنی، هئچ آن سیلمه یه جم آدینی اوره ییمدن، گتیر مه یه جم باشقاسینین آدینی دیلیمه، قویمایاجام بیری گیرسین اوره ییمه، سون نفسیم قالانا قدر آدین قالاجاق دیلیمده، حتتا اؤلندن سونرا بئله یازدیراجام گؤزل آدینی كفنیمه، دویسون اینسانلار، ائشیتسین بوتون سئوگیلیلر، من سئوگیلیمی سئویرم، اونو اونوتماق ایسته میرم، اونوتمایاجام، اونسوز آن لاری آتاجام، آنیلاریما هر زمان آدینی قاتاجام، سسی نی دویاجام، آجیلارینا قاتیلاجام، اؤزو بئله بیلمه دن جیسمینده كی روحو اولاجام.
یازان: حسین واحدی
یاشامین پیس اوزو
یاشامین پیس اوزو
آنا، اوشاغین، قولوندان، چكه-چكه، كوچه دن آپارماق ایسته ییردی، اوشاق ایسه منه دوندورما آل دئیردی. آنا قونشولارین یانیندا اوزو قیزارا-قیزارا اوشاغی ائوه آپاردی، چورویوب، پاسلانمیش قاپیلارین ایشیلله ییب ایچه ری گیردیلر، اوشاغین آغلاماق سسی ائوی آلتینا آلمیشدی، اوشاق حه یه طده قالدی، گؤز یاشلاری اونون تكجه یولداشییدی!
آنا اوتاقدان، گئجه یاغیش یاغان زامان ایچه رییه قویان قابلاری حه یه طه گتیردی و تاواندان دامان سولاری كردی یه بوشالدیردی، اوشاق، باشین حه یه طده اولان گولدانا دایاییب، درین یوخویا آددیم آتمیشدی!
قاپی دؤیولدو، آنا قاپینی آچماغا گئتدی، اؤزگه دئییل، ائوین آتاسیدیر!
آنا «كیشی نه اولدو؟» «قاییتدین؟» -دئدی!
آتا: «اوچ ساعاتدی فهله مئیدانیندا بونا-اونا یالوارماقدان یورولدوم، ایش یوخدویدو» -دئدی!
یازان: حسین واحدی
اورمو گؤلو، سنده خاطیره لریمیز وار!
اورمو گؤلو، سنده خاطیره لریمیز وار!
منه تای باشقا گؤلون یانیندا یاشایان بوتون اینسانلارین اوشاقلیق و عؤمور سورمه نین چئشیتلی واختلارینین خاطیره لریندن سوروشساق یقین اورمو گؤلونه چیممك اوچون گئتمك، یوخسا گئدیب اوردا گونون باتماسینا باخماق ان شیرین و یادلاردا قالان خاطیره لردن ساییلیر، هئچ اونوتمارام اوشاقییدیم، یایدا قارداشیملار جمعه گونلری كوچه قاپیمیزین آغزیندا اوتوراردیق، قونشولارین چوخو یایین ایستیسیندن قاچماق اوچون گؤله گئدردیلر، بیزیم ماشینیمیز یوخویدو و بونا گؤره مظلومجا اوتوروب اونلارا باخاردیق، ائله سئوردیم بیزده گئدك اومور گؤلونه، آمما نه فایدا! كاسیبچیلیق بئله دئمكدیر و بونو تجروبه ائدن اولماسا منیم نه دئدییمی آنلایا بیلمه یه جك!!
بعضن ماشینی اولان قوهوملار –ماشینلاریندا یئر اولسایدی- بیزیده گؤله آپاراردیلار، اورا گئدن زامان دوغروداندا ان خوش چاغلاریمیز اولاردی، دئیردیك، گولردیك، شور سویو بیر- بیره سه پردیك و سانكی بوتون شنلیك لر تكجه بیزیمدیر بیله ردیك، هئچ بیلمزدیك بیر گون گلر گؤل بیزدن كوسر!! سوفراسین اؤزویله چكیب آپارار! شنلییی بیزه چوخ گؤرر!
او قورخونج دالغالار، یوخ اولاجاغینی كیمسه دوشونه بیلمزدی، آمما او گونلر گلیب چاتیب و بیز گؤلون مظلومیتینه دوروب باخیریق، یالانداندا گلین گئدك آغلایاق، اورمو گؤلون دولدوراق دئییریك!! آخی ندن آغلایاق گلین قوللاریمیزی چیرمالایاق، هر یولویلادیر بو عزیز گؤلو اؤلومدن قورتاراق، آخی گله جك نسیل لره نه دئیه جه ییك؟؟ باشیمیز آلچاق اولمایاجاق می؟ اوره ییمیزه قان دولمایاجاق می؟؟
هامی گرك یاردیم ائده، من، سن ، او و هامی، ایشچی دن توت مجلیسه یوللادیغیمیز بوتون نوماینده لر، هامی!!
غیرتیمیز وارسا گؤلوموزده اولاجاق!!
یازان: حسین واحدی
ایكی قوردون دؤیوشو
ایكی قوردون دؤیوشو
بیر گون، بیر قیزیل دریلی قوجا، نوه سینه یاشاییش حقیقت لریندن بئله دئییر: «هر اینسانین ووجودوندا همیشه ایكی قوردون دؤیوشو كیمین، بیر دؤیوش آخینی وار. قوردلارین بیری پیسلیك سمبوللاردیر؛ اؤرنك اوچون یالان، پاخیللیق، گیجیكلیك و .. -دیر و باشقاسی ایسه، سئوگی، اومود، یاخشیلیق و حقیقت سمبولودور.» بؤیوك آتانین دانیشیقلاری نوه نی دوشونجه یه سالیب، سونرا سوروشدو: « بؤیوك آتا، سونوندا هانسی قورد دؤیوشو قازاناجاق؟» بؤیوك آتا گولومسه ییب، « یئمك وئردییین قورد» - دئدی.
توركجه یه چئویرن: حسین واحدی
منیم اورمو گؤلوم قوروما!
منیم اورمو گؤلوم!
گؤلوم نه اولار قورما، سنینله، خاطیره لریم وار، سنینله یاشامیشام، من
سن اولموشام، سنده من!
یوردومون بركتی، آبیریسان سن،نه اولار قوروما..
داریخان گونلریمی،سنین یانینا گلیب،سنینله پایلاشمیشام،شنلیك گونلریمی ایسه گلیب سندن آپارمیشام،
نه اولار قوروما..
سنینله هارای چكیب باغیرمیشام اینسانلار سیزین هر نه یینیزده وارسا،منیم دوزلو اورمو گؤلوم وار،
نه اولار قوروما..
شهریمه،گونشی سن وئریبسن، سنده گونش باتماییب، باتمایاجاق، سن گونشی دوغورسان،..
نه اولار گؤلوم قوروما گؤلوم..
سن قوروسان، بوتون اوشاقلیغیم ایته جك! خاطیره لریم پوزولاجاق! شنلیك بوردان قاچاجاق!
داریخمالار دام-دوواردان آشاجاق!سنجه آبیر-حیثیت می قالاجاق؟!..
آرخامیز بوشالاجاق،آرتیق هارای لار اوركلرده یاتاجاق،قارانلیقلار شهریمه دولاجاق...آرتیق بوردا گونش ده دوغولمایاجاق...!!
نه اولار اورمو گؤلوم قوروما..!
یازان : حسین واحدی
اوشاق محببتی
اوشاق محببتی
سئوین، پالتارلارین گئیمك ایسته ییردی، آمما كؤینه یین باشینا كئچیرده بیلمه ییردی، تومانین ترسینه گئییردی! آناسی گلیب اونا یاردیم ائدیب گئییندیردی، یانیجا آلیب بازارا گئتدیلر، بازارین توكانلارین بیر- بیر گزیردیلر، آناسی ایسته دییی شئی لری آلیردی، قیزیل بازاریندا، توكانلارین بیرینین یانیندا، اوزو یاشماقلی، قوجا بیر قادین اونلارین یانینا گلیب یاردیم ایسته دی! سئوین- ین آناسی اؤزونو توتاراق ائشیتمك ایسته مه دی بو سسی! او حئینی قوجا آبیرلی دیله نن قادینین اوشاغی سئوین-دن دوندورماسینی ایسته دی، سئوین ایسه، ائشیتدی بو سسی! سئوین ایكی الی ایله یاپیشدی دوندورماسیندان، سئوینه- سئوینه وئردی اوشاغا!!
یازان: حسین واحدی
تئاترا ده یر وئرمه لییك..
علی ضیایی ایله دانیشیقدا:
تئاترا ده یر وئرمه لییك..
غربی آذربایجانین تئاتر دورومونو بیلمك اوچون، اورمیه شهرینین گنج و زحمت چكنلرینین بیری اولان «علی ضیایی» ایله صمیمی دانیشیغیمیزی سیز عزیز اوخوجولاریمیزا تقدیم ائدیریك، اومود ائدیریك بو دانیشیق تئاتر اوچون فایدالی اولسون.
- اؤزونوزو اوخوجولاریمیزا تانیتدیرین؟
من «علی ضیایی» اورمیه نین سید جاواد محلله سینده دونیایا گؤز آچمیشام و ابتدایی و اورتا تحصیلاتیمی قورتاراندان سونرا تهراندا نمایش قولوندا (ریشته سینده) لیسانس آلمیشام. من 1375 ایلینده نوكلر فیزیك بیلیمی (فیزیك هسته ای) قولونو ترك ائدیب سرباز گئتدیم و نمایش له تانیش اولدوغوم اوچون سربازلیقدان سونرا نمایش قولون اوخوموشام. لیسانسی بیتیرمكدن سونرا اورمیه یه قاییدیب، » نمایشخانه « مؤسسه سین آچمیشام و تئاتر و نمایشه علاقه سی اولانلارا بیر یئر اولماق اوچون بورانی آچماق منیم اؤزومون هدفلریمدنییدی. اورمیه ده بو قولا گئتمك اوچون هئچ بیر مؤسسه یا یول گؤسترن بیر یئر یوخویدو و بودا منی بو مؤسسه سنی آچماغیما ترغیب ائتدی.
- خالقیمیزلا، تئاتر و یا نمایشین رابطه سین نئجه گؤرورسونوز، تئاترین جامعه یه ائتگی سی (تأثیری) نه قدردیر؟
عاییله لر ایچینده تئاتر و نمایش یئرینه دوشمه ییبدیر و هله ده چوخلاری اویونچویا (بازیگره)، مشغول ائدیجی گؤزو ایله باخیرلار، اویونچولوق حیسسی بیر ایش دیر و آكادمیك اولدوغو اوچون، قایدالی ساییلیر. تئاتر و اویونچولوق اینسانلارین عقده سین آرادان آپارماسیندا مهم رول اویناییر، جامعه نین دردلرین تئاتر ایله گؤسترمك اولور و بو آرادا تاماشاچیلارلا یاخشی بیر ایلگی قورولسا و باخانلار اؤز دردلرینی اوردا حیسس ائده بیلسه لر، اوركلری بوشالیب، راحاتلاشاجاقلار و بودا جامعه ده جدی توتولمور، بورادا تئاتری مشغول اولماق گؤزونده گؤرورلر، یعنی تئاتر باخماق ایمكانی اولورسا! هفته نین سون گونلری گئدیب نمایشه باخماق و بیر آز گولوب، باشلارین قاتیب ائوه دؤنمك دئمكدیر!
تئاتر پیسكولوژی (روانشناسی) باخیمینداندا یوكسك (عالی) درجه ده یئری وار و نمایش قالیبینده خالقیمیزا چوخ سؤزلری دئیه بیله ریك، باخساق تلویزیون دا بعضی اؤیرتمه لری (آموزش لری) گاز،برق یا باشقا ارگان لار نمایش قالیبینده خالقیمیزا اؤیره دیرلر و بونون ائتگیسی (تأثیری) باشقا یوللاردان چوخدور.
كولتورل باسقین-ین (تهاجم فرهنگی نین) ، قاباغین آلماقدادا نمایش و تئاترین یوخاری درجه لی رولو وار، بیز اؤز كولتوروموزو دیری ساخلاماق اوچون بو موضوعیا چوخ ده یر وئرمه لیییك، میثال اوچون اورمیه نی دئسك آذربایجان بؤلگه سینین مدنییتینده بؤیوك بیر یئره مالیك دیر و شهرلشمه تاریخینده بو منطقه نین او بیری شهرلریندن داها چوخ قدیم تاریخی وار، حتتا تبریزدنده قاباقدیر و بو سبب اولور بیز كولتوروموزو ساخلاماغا لاپ چوخ زحمت چكك، آما بو مدنییتین قاباغیندا، تئاتر باخیمیندان اورمیه اؤزونه لاییق بیر یئرده دئییل و بو قُولو (رشته نی) یئنیدن دیریلدیب یوكسك یئره چاتدیرمالیییق و بو یولدادا كولتور یاراتما (فرهنگ سازی) اولماییب.
- اوشاقلارلا تئاترین ایلگیسی نئجه دیر؟
تئاترییلا اوشاقلاریمیزین عقده سین بوشالدا بیله ریك، میثال اوچون بیزیم اؤیره تیم (آموزشی) مؤسسه ده تئاتر درمانلیغی آدیندا كیلاسلاریمیز اولور و بو كیلاسدا اوشاقلارین پیسكولوژی لرینین اوستونده ایشله ییریك و نمایش قالیبینده، بوشلوق اولان یئرلری ترمیم ائدیریك و اویونلا كئچمیشده اولان عقده لر بوشالیر و بودا اوشاغی راحاتلادیر و جامعه ده راحاتجا یاشاییر و بونو یونگول توتماق، كولتوروموزه ضربه وورور.
- سیزجه عاییله لر بو قونویا نه گؤزده باخیرلار؟
عاییله لر ایچینده تاسفله هله یئرینه دوشمه ییب و نمایش یا تئاتر ایله چوخ تانیش ده ییرلر و بیلیم یوردونا (دانشگاها) گئده نده ده بونو سئچمه یی دوشونمورلر و گئتدیكجه بو دوزه له بیلر.
- بونا نه یوللارییلا و كیملر یاردیم (كمك) ائده بیلر؟
یاردیم ائتمك اوچون نشریه لر، رادیو – تلویزیون، مسئول لار و.. بئلنچی یاردیملارلا چوخ ایشلر گؤرمك اولار، مثلا، تورك دیلینده اولان «آداخلی» سریالینا باخساز، بو فیلمدن یاخشی استقبال اولونوب و یا بوندان اؤنجه یایینلانان «دومان» ، «آتا» و باشقا توركجه سریال لار، اؤز یئرلرین جامعه ده تاپیبلار و استقبال دا بونلاردان چوخ اولوبدور و بونلار كولتورل باسقین –ین قاباغیندا مهم رول اویناییرلار.
آما تاسف له تلویزیون تئاترا یاخشی ده یر وئرمه ییبدیر و تئاتر اوچون هئچ یاریم ساعاتلیق دا برنامه یوخدور و تئاتر اوچون هفته لیك برنامه اولسا او برنامه ده تئاتر جامعه ده تانینار و تئاترین خبرلری و چتینلیكلرده یاییلار (پخش اولار). بئلنچی ایشله ده گؤزلر تئاترا عادت ائدر و بودا جامعه ده احتیاج اولاراق یئرینه دوشر.
نشریه لرده تئاترا گؤره هئچ اولماسا بیر ستون آییریب بو موضوع یا درین باخمالیدیرلار و من اومود ائدیرم بو گئتدیكجه گؤروله جك.
مسئوللاردا مدیریت ضعفینی آرادان آپارمالیدیرلار و ده ییشیكلیك لر و برنامه سیز ایشلر تئاترین تانینماماسینا ندن (سبب) اولوبدور و اوزون مدت لی برنامه لر ایشلریمیزده یوخدور و بعضن سلیقه لی ایشلر برنامه لری قاباغا آپارمیر.
تازالیقدا دؤولتی بؤلوم لرین حمایتیده آرتیب دیر و »سازمان ملی جوانان« و »حوضه هنری« هره سی آیری – آیری فئستیواللار (جشنواره لر) آچیرلار، آمما دردیمیز بئلنچی ایشلرله حل اولمایاجاقدیر و ایشلریمیزده وحدت اولمایینجا موفق اولمایاجاییق.
تئاتر اوچون نظارت ده ضعیف دیر و بعضی خصوصی اؤیرتمه یئرلرینده اوچ آیا مدرك وئریرلر و بودا دوز ایش دئییل و تئاترا ضربه وورور.
- تئاتر نجور بیر احتیاج ساییلا بیلر؟
باخین، اینگیلیزجه (انگلیسی) اؤیرنمك نئجه یئرینه دوشوب، چوخلاری چالیشیر بو دیلی اؤیرنسین و اؤزلرینه بیر احتیاج بیلیرلر و گرك جامعه میزده تئاتردا بئلنچی یئرده اولسون، و هامی تئاترین ده یرین بیلسین. بیر مهندیش، دوكتور، بسله ییجی (پرستار) و... خالقیمیزلا داورانیش لارین (رفتارلارین) باجارا بیلسه لر چوخ چتین لیك لر قاباغا گلمز و یا بعضی آتا – آنالار اوشاقلارلا مختلف موقعیت لرده نئجه داورانسینلاری بیلمه ییرلر، یعنی نه زامان حیرصله نیب و نه زامان تشویق ائتسیملر و حیرصله ننده دوغرودان حیرصله نیرلر و بعضن ائله ایشلر گؤرورلر، اوشاقلاردا پیس خاطیره یارانیر و اؤزلریده سونرادان پئشمان اولورلار. تئاتر چون نمایش دیر بوتون داورانیشلار نمایشی دیر و هئچ كیم دوغرودان حیرصلنیب اؤزونده راحاتسیز ائتمیر و بو نمایشی حیرصلنمه یی ده اؤز داورانیشیمیزا گتیرمه لیییك و بونو دوشونسك تئاترا باخماق و بو حیسس لری باجارماق بیزه احتیاج ساییلار.
آرتیق دئسك، تئاتر احتیاج دیر، تفریح و باش قاتما دئییل، قونشو اؤلكه لرده مثلن آذربایجان جومهورییه تینده «آرشین مال آلان» و «مشدی عیباد» ، نمایش لری خالق ایچینده اؤزلرینه یئر آچیبلار و حتتا دانیشیقلاریندادا تأثیر قویوبدور و یا آوروپادا «شكسپیر» نومایش لرین میثال وورماق اولار.
حتتا فرانسه نی دئسك، بو اؤلكه ده تئاتر عاییله لر ایچینده یاخشی بیر حیسس یارادیب و دئیلر لر فرانسه لینین هفته سونو تكجه ایكی دولاری اولسا، بیر دولارین تئاتر اوچون آییراجاقدیر.
تئاتر جانلی (زنده) اولدوغو اوچون تأثیری تلویزیوندان داها قاباقدیر، چون تئاتردا اویونچویلا، باخانلار اوز – اوزه و نفس – نفسه دیرلر و هر نه جانلی دیر و حتمن ده تأثیری یوخاری اولاجاق دیر و منجه عاییله لر تئاتری اؤزلرینه احتیاج بیلمه یینجه، تئاتر یئرینه دوشمه یه جك.
- تئاتر، اوخویانلار بیزیم اوستاندا نه چتینلیكلرله اوز – اوزه دیرلر؟
تئاتر اوخویانلار اوچون ایش زمینه سی اوستانیمیزدا یوخدور و بودا، اونلاری تهرانا یا باشقا شهرلرده ایش تاپیلان شهرلره گئتمه لرینه ندن (سبب) اولور، ائله ایش گؤرمه لیییك، بئلنچی اینسانلاریمیز درس لرین قورتاراندان سونرا اؤز اوستانیمیزا قاییتسینلار.
- سونوندا نه دمك ایسته رسینیز، بویورون؟
یئری وار، كئچمیشده تئاترا زحمت چكنلرینده آدلارین آپارام، البته چوخونون آدی یادیمدا دئییل آما هر حالدا یادیمدا قالانلاردان؛ آغالار غلامرضا عزیزی، جلیل آغداشی، جلال ذوالقدر، خسرو دستگیر، رحمتلیك بهمن احمری، رحمتلیك شهریار جعفر دوست ،... و ایندیكی نسیل دن، پدرام رحمانی، بابك لطفی، حامد اسماعیل وند، كریم علی خواه (كریم بی، فجر فئستیوالینا كیمی ایش آپاریب دیر) و... بو عزیزلریمیز و آدلاری یادیمدا اولمایان چوخلو عزیزلر، تئاتردا و اؤیرتیمده (آموزش ده) زحمت چكیب و چكیرلر.
سونوندا سیزدنده بو موضوع یا ده یر وئردییینیزه گؤره تشككور ائدیرم و اومود ائدیرم، بو دانیشیق بو موضوعنون جامعه ده یئر تاپماسینا، بیر باشلانیش اولا.
دانیشیغی آپاران: حسین واحدی
شهامت نشریه سینین 3 - نجو سایی سی غربی آذربایجانین باشا باشیندا
شهامت نشریه سینین 3 - نجو سایی سی غربی آذربایجانین باشا باشیندا (سه شنبه شهریورین 2 سیندن)
توركجه - فارسجا
شماره سوم نشریه شهامت منتشر شد
از دکه های روزنامه فروشی تهیه فرمایید.
چوخ بیلمیش قولو!
چوخ بیلمیش قولو!
اؤزونو چوخ بیلیجی بیر اینسان بیلیردی و جمع ایچینده هانسی قونودان سؤز آچیلسایدی، یئردن – گؤیدن سؤز ییغیب اؤزونو بیلگیلی بیریسی گؤسته رردی، قوهوملار و تانیشلار گولونج اوزوندن آدینی « چوخ بیلمیش قولو» دئییردیلر!
گئییمیده چوخ ماراقلییدی، یایین لاپ ایستی گونلرینده ده، كوتونو چیخارتمازییدی و بو ایشله اؤزونو كیلاسلی و بیلیجی گؤسترمك ایسته ییردی!!
قولونون دیشلریده اؤز یئرینده دیققت ائلمه لییدیلر، اونون دیشلری ایللرییدی دیش فیرچاسی (مسواك) گؤرمه میشدیلر و لاپ موزه یه قویمالییدیلار و حئسابلاسایدیلار لاپ بئله گینئس كیتابیندا یازیمالییدی! آخی بیری یوخویدو دئیه: آرواد – اوشاغییین گوناهی نمنه دی سنین او پاسلی دیشلرییین تحمل ائدیلر؟!
چوخ دانیشماغی آروادیدا دیغلاتمیشدی و قولو چوخ دانیشدیغی زامان، آرواد «قیریق رادیو قورتار» دئیه ردی! گونلرین بیرینده، بحث ائلیینده، آروادا قاییدیب «هئچ سن بیلیرسن من گونده نئچه درگی (مجله)، گونده لیك (روزنامه)، ... اوخورام؟» دئدی و آرواد ایسه « آخی قیریق رادیو نییه بیز اونلاری گؤرموروك، هاردا گیزله دیبسن؟» جاواب وئردی!
قولو : «آرواد چوخ دانیشما !، اونلار دكه لرین قیراغیندادی، من گونده ایداره دن قاییداندا، یاریم ساعات دكه لرین قاباغیندا یئریمی سالیرام» دئدی!!
ار - آروادین داعواسی، نه دئیرلر؟ بلی، عینی یازین هاواسی! قولو كیشی بیر گون ایشدن، ائوه قاییداندا، اوره یی آیران ایسته ییر و یول اوستونده بیر باققال توكانیندان دؤرد كیلو آیران آلیر.
ایندینینده آیرانلاری چوخ ایشمه لیدیرلر! آیراندان سونرا هر نه یین دادین تاپماق اولار!!
توكانچی دئیر: آغا دببه وارینیزدی؟ قولو : «ده دم دببه نی نئیلیرسن، من آیرانی بؤركومده ائله آپارارام بیر دامجی دا یئره تؤكولمز» دئدی!!
كیشی آیرانی موشامبایا تؤكنده اوره یینده « اینشاللاه تؤكولر اوستو – باشییان، اوندا بللی اولار نجور آپارارسان؟» دئییب، آیرانی قولویا وئردی!
قولو گونده كی كیمین یولو اوستونده اولان دكه دن بیلگی (معلومات) ییغماغا گئدر! آیرانیدا اوینادا – اوینادا بو الیندن او بیری الینه وئره – وئره دكه چینین یئره سردیغی نشریه لرین باشی اوستونده دورار.
ائله بیل بوگون فرقلی گوندور و بیر آز چوخ بیلگی دالیسیجادیر و درگی لری و گونده لیك لری واراقلاییردی، اورادان قاچا بیر اوغلان اوشاغینین اویونجاغی (اسباب بازی سی) آیرانین موشامباسینی ایله شیب، ییرتار، قولو اوغلانا دؤنوب باخاندا، آیران نشریه لرین چوخونون اوستونه سپیلیب ایسلادار، دكه چینین هارایی گؤیه گئدر و اوغلان اوشاغیدا آرادان یوخ اولار!
ایندی قولونون یاخاسی اوجا بویلو و قوللو – بویونلو دكه چینین الینده قالیب و گؤزلویوده (گؤزلوك =عینك) یئره دوشوب آیاقلاری آلتیندا ازیلر!
دكه چی هاوار چكیب دئیر: آخماق كیشی! سنین 500 تومنین یوخدو گونده لیییی آلیب ائوه آپاریب، آرخایینچیلیقلا اوخویاسان؟! قورخوسوندان ال – آیاغی تیتره ین قولو : « آغا گوناه او قاچان اوغلاندایدی، منی باغیشلا، هامیسینین پولون وئره جه یم» دئدی!!
دكه چی قولونو دكه نین ایچینه سالیب، آیرانلی نشریه لری آییریب، قییمتلرین چیخاردیب، قولونو ائشییه چكیب: « آخماق كیشی 10 مین تومن ائله دی، تئز پولو وئر و یوخ اول!!» دئدی.
چوخ بیلمیش قولو! هر جیبدن بیر آز چیخاردیب جریمه نی وئرر و دكه چی : « ایندی جانین راحات اولدو؟ جریمه وئردییین نشریه لر سنین دیر، گؤتور آپار ائوده اوخو!» دئییب، ایشینه گئتدی.
قولودا تؤوبه ائدیب اللری، آیاقلاریندان اوزون یولونا دوشدو، یولدا گئده – گئده، اؤز – اؤزونه : «اوجور اولار ها، 400 – 500 تومنی هر گون وئریب، گوندلییی آلیب ائوه آپاریب راحاتجا اوخوسایدید، بیر یئره ییغیشیب 10 مین تومن اولمازییدی» دئییردی!!
دئییرم نه اولار دكه لر قاباغیندا صف چكیب نشریه لره فقط باخانلارین!! هامیسینین الینده آیران اولاردی!!
یازان : حسین واحدی
