تیراختور سئوگیسی
تیراختور سئوگیسی
یازان: حسین واحدی
نئچه ایل بوندان اؤنجه، یولداشیم ایله بیرلیكده، كیتاب آلماق اوچون، اورمودان تبریز گئتدیك. اومو گؤلونو گمی ایله كئچدیك. (او زامان كؤرپو قورتولماییب، اورمو گؤلو ایسه سولویدو!)
ایكی ـ اوچ ساعاتدان سونرا تبریزه یئتیشدیك. گون اورتایادك ایسته دیگیمیز یئرلره گئدیب، ایشلریمیزی بیتیردیكدن سونرا، بیر آز یئمك یئییب، اورمویا قاییتماغی دوشوندوك. ساعات مئیدانینا یئتیشدیكده، ایچی تیراختور یانداشلاری ایله دولو اولان اوتوبوسلار ایله شوشه لریندن قیرمیزی بایراق لارین ائشیگه چیخماسی بیزیم ماراقیمیزی اؤزلرینه چكدیلر. بوندان- اوندان سوروشاندان سونرا، بوگون تیراختورون بیرینجی لیگ ده اویونو اولدوغونو آنلادیق. (او زامان تیراختور اوستون لیگ ده دئییل دی). یولداشیم لا بیرلیك ده استادیوما گئتمك قرارینا گلدیك. اوچ كیشی، آیری یانداش ایله بیرلیكده بیر تاكسی توتوب، استادیوما ساری یولا دوشدوك.
استادیوما یاخینلاشدیقجا، یول داها باساراق اولوردو. استادیومون اؤز یولونون باشلانیشی باغلانمیشدی و بیزده تاكسی دن دوشوب، دره- تپه ایله اؤزوموزو بیرینجی دؤنه اولاراق گؤردویوموز "یادگار امام" استادیومونا یئتیردیك. استادیومون چوخو دولموشدو. بیلئط آلیب ایچری گیرمه یی باجاردیق. اورگیمیزده سئوینج الیندن یئر یوخویدو!
اویون باشلانمیشدی و تیراختور نه قدر یورویوردو، رقیبین باغلی قاپیسینا توش گلیردی. بوتون استادیوم بیرلیكده "یاشاسین آذربایجان"، "یاشاسین تیراختور" دئییردی. گؤزلریمدن سئوینج سویو داشیب-آشیردی!
ایكینجی یارینین اورتالاریندایدیق. گونش گئتمك ایسته ییردی. بیز ایسه اورمویا قاییتماغا گئجیكمیشدیك. استادیومو ترك ائدیب، اؤزوموزو ترمینالا یئتیریب، اورمویا قاییتدیق. نئچه ساعاتدان سونرا اورمویا چاتیب، ائولریمیزه دؤندوك. ائوده تلویزیونون ایدمان خبرلرین گودوب، تیراختورون اودما خبرین ائشیدنده داها چوخ سئویندیم...
ایندی، او ایلدن 5-6 ایل كئچیر. آزی اون دؤنه ایلك گئتدیگیمیز استادیوما گئتمیشیك. تیراختور اوستون لیگ گلیب و رقیب لرین آمانین كسیب. بوتون آذربایجان تیراختور اولوب. بوتون استادیوم لار تیراختور یانداشینین آیاغی آلتیندا قالیب. رقیب لرین اوره گی، قورخودان پارتلامایا قرار وئریب. كوچه لرده دووارلار تیراختور آدی ایله بزه نیب. اورمودا، تبریزده، زنگاندا، اردبیل ده و ...، هر یئرده آذربایجانلی واراوره گینده تیراختور سئوگیسی یارانیب و تیراختورو یاشادیر...!
- بو یازی، فوتبالیست ها نشریه سینین 73-ونجو ساییسیندا چاپ اولوبدور.
اورمو
اورمو
آذربایجانیمین یاشیل اؤلكه سی
بؤیوك تورك ائلینین مهربان سسی
دده میز قورقودون ایستی نفسی
سنده دیر، سنده دیر ای گؤزل اورمو
گؤزللر یوردوندا سن اؤزل اورمو
گؤزللیكلرینی تانیان اولسا
زرینین محكین سینایان اولسا
تئز تانیار اونو، تانیان اولسا
گؤزللر ایچینده گؤزلدیر اورمو
اوزون بیر قصیده، غزلدیر اورمو
گؤزللیكلری بیر، ایكی، اوچ دگیل
دولودور، هئچ نهیی اونون بوش دگیل
زنگین وارلیقلاری اونون هئچ دگیل
تورك دیلین دانیشار دیلی اورمونون
اوغوزدان یارانیب ائلی اورمونون
دولاشماق ایسته سن سن بیزیم ائلی
اییلهمك ایستهسن سن بیزیم گولو
اوخوماق ایستهسن سن بیزیم دیلی
بیزیم دیل شیپ-شیرین اورمو دیلیدیر[1]
تاریخی چوخ درین اورمو دیلیدیر
بؤیوك سومئرلرین[2] یادگاریندا
نئچه آشیقلاری[3] وار كناریندا
تورك موسیقیسینین كتابلاریندا
بیر اوزون مطلبدیر اورمو آشیغی
اؤزونه مكتبدیر اورمو آشیغی
)اورمونون یوللاری دوزوم-دوزومدور
اورمو كاروانینین یوكو اوزومدور([4]
وطندیر، ایشیقلی ایكی گؤزومدور
اینجیلره بنزر اورمو اوزومو
تاباقلاری بزر اورمو اوزومو
جمعه مسجدیمیز بیزه عزیزدیر
سؤیومبت[5] بیناسی آبیدهمیزدیر
كاظمخانین داشی سودان تمیزدیر
اوُلولارا چاتیر اورمو تاریخی
دولولارا چاتیر اورمو تاریخی
نازلی چای، باراندوز، كندلری بزر
دره چای، ،شهرچای، شهری گزر
اوچ گؤزلو كؤرپویه كیم دوداق بوزر؟
صفالی، گزمهلی اورمونون بندی
گئیینیب سوزمهلی اورمونون بندی
اورمونون گؤلونه دوشن دوزلانار
اوستونده سئیریشن[6] قوشلار نازلانار
آدالاری[7] گزن قیشدا یازلانار
سولاری دوزلودور باخ اورمو گؤلو
دنیزجه سؤزلودور باخ اورمو گؤلو
باغچالاری اولار میوه یه دولو
آغاجی بار وئرر بوداق دولوسو
انسانین الینین امگیدیر بو
خونچالاری بزر اورمو آلماسی
الدن اله گزر اورمو آلماسی
گل توت باغلاریندا گزمگه دادان
آغزی شیرین اولار كیشمیشین دادان
دادلیدیر دوشابی، حالواسی بالدان
دیلی تك شیریندیر اورمو نوغولو
یاد یوخ، بو یئریندیر اورمو نوغولو
الده كی بودور، چوخ ایتمیشی واردیر
یئددیسین آختارسان یئتمیشی واردیر
بادرشبیسی وار، بیتمیشی واردیر
خاصیتلی اولار اورمو آراغی
درده درمان قیلار اورمو آراغی
بوردا وار حقیقت، حقّین جاداسی
آلپ ارتونقا[8] یوردو، زردشت اوباسی
دانیال درهسی، امامزاداسی
درویشلر مكانی اورمو داغلاری
ارمیشلر مكانی اورمو داغلاری
وطندیر، وطنه گووهنریك بیز
چون اجدادیمیزدان اوندا واردیر ایز
چؤكریك آدینین قارشیسیندا دیز
آذربایجانیمین گؤزودور اورمو
گؤزل آذربایجان سؤزودور اورمو.
بهرام اسدی
[1] آذربایجان فولكلوروندا گلیبدیر:
................
گل اوخو بیزیم دیلی
بیزیم دیل اورمو دیلی
......................
[2] یئنی تاپینتیلارا اساساً سومئرلر، اورمو منطقهسیندن كؤچموش انسانلار اولوبلار.
[3] موسیقیچیلرین آراشدیرمالارینا گؤره اورمو ساز شیوهسی سومئرلر ایله عینیدیر.
[4] دیرناق آراسینداكی بئیت شاه اسماعیل صفوی زامانیندا یاشایان آشیق قوربانیدندیر.
[5] آدینی سهگنبد یازسالار دا بو آبیدهنین آدی سؤیومبتدیر.
[6] ناز ایله اوچانلار، یئریینلر. فارسجا: خرامیدن.
[7] آدا: جزیره، یاریم آدا: شبه جزیره.
[8] توركلرین(ساكالارین) بؤیوك سركردهسی، فارس دیلینده افراسیاب آدلانیب. روایتلره گؤره آلپ ارتونقا بیر مدت كاظم داشیدا اولوبدور.
قیلقمیش ناغیلی
قیلقمیش ناغیلی
بو ناغیلین بیر قسمی اسکی آذربایجاندا یعنی اورمو گولونون غربی قسمت لرینده زاگرس داغلارینین اتکلرینده باش وئریر.
اسکی زامانلاردا بین النهرین ده (اوروک) آدلی شهرین باشچیسی وشاهی اولموش
قیلقمیش.چوخ سئودیگی یولداشی(انکیدونون) اولومونده ن صونرا جاویدانلیق(اولمزلیک) فیکرینه دوشور.کاهن لرین مصلحتینه باخاراخ بو ائشین سری
خزر دنیزینده یاشیان (اوتنا پیشتیم) آدلی بیر کیشینین الینده گمیش.
قیلقمیش او ادامی تاپماخ اوچون بین النهرینین (اوروک) شهرینده ن یولا چیخیر.
قهر مان یولو اوستونده ارتته نین(ایندی کی غربی اذربایجان) شرقینده یئرله شن
(مئشو) داغیندان گئچیر.(مئشو داغی بو گونکی مرند و گونی ماحالینین آراسیندادی)
قیلقمیش افسانه سینده بو داغ ایکی زئروه لی (ایکی قلله لی)گوسته ریلیر.
نهایتده قیلقمیش بو یولدان خزر دنیزینین کناریندا یئرلشمیش (دیلمانا) چاتیر .و اورادان
بیر گمی نن دنیزین ائچینده جاودانه لیقه چاتمیش آختاردیغی آدام(اوتا پیشتیمی)تاپیر.
و دنیزین ائچینده اوز ائسته دیگینی اونا دئییر.
جاودانه لیقه چاتمیش آدام اونا دئییر کی :
چون سن یاتیرسان و یاتماق سنین یاشایشین بیر قسمی اولموشدور بو نا گوره داها سن
جاودانه لیقه چاتا بیلمرسن و یاخشی سی بودور کی اوز خالقیین اراسینا قئیدیب و قالان
عومرویون خالقا خدمت ائده سن.
قیلقمیش اوتنا پیشتیمده ن ایریلاندا آروادی اونا دئییر کی :
قیلقمیش بیر بئله زحمت چکیب گلمیشدیر سن اونا بیر شئی وئرمه دین.
اوتنا پیشتیم قیلقمیشه دئییر کی :خزر دنیزینین معین یئرینده. سویون ترکینده بیر تیکانلی اوت (بیتگی )وار کی اونو یئین قوجا جاوانلاشار .
قیلقمیش گمی نن قئیدنده او یئری تاپیب قیچینا بیر داش باغلیب سویون ترکینه گئدیر ونهایت او اوتی تاپیر .لکن بیر ایلان او اوتون ائیسی نی آلیب و اونی تمامیله یئییرو قیلقمیش نه جاودانه لیق تاپیب ونه ده جاوانلاشیر بلکه اوز خالقی آراسینا قئید یب واونلارا خدمت ائتمه گه باشلیر .
بهمن وحدتی (باهار )
---------------------------------------------------------------------------------------------------------
یازینین قایناغی
بیرینجی شكیلین قایناغی
ایكینجی شكیلین قایناغی
شاعیرلر مجلسینین سون نشانلاریندان "علی نشانی"
شكیل لر: حسین واحدی
شاعیرلر مجلسینین سون یادیگارلاریندان بیریسی ده بو گون اورمو شهرینده یاشایان قوجامان شاعیریمیز اوستاد علی نشانی اولموشدور . بو آغ ساققال شاعیریمیز گونش ایلی 1305 ینجی ایل آذربایجان جمهوریتینین قازاق شهرینده دوغولموشدور . تقریبا 17 یاشیندان شعر دئمه یه باشلایان علی نشانی 1312 ینجی ایل بو تای آذربایجانا آتلایب ؛ اورمو شهرینده مسکونلاشمیشلار . گنج شاعیرین ایلکین شعرلری گئچمیش شوروی لرین یوردوموزا باسقین ائتدییی ایللر اورمودا نشر اولان " اورمیه " گونده لیینده چاپ اولوردو . آنجاق سونرالار علی نین شعرلرین " شاعیرلر مجلسی " توپلوسوندا گورمک مومکون اولور . 1324-1324 ینجی ایللر شاعیر علی نشانی نین شعرلرینه آذربایجان ؛ وطن یولوندا و بیر سیرا باشقا گونده لیک لرده راست لاشماق اولار . اونون شاعیرلیینین ان قیزغین چاغلاری ائله میللی حوکومت چاغلاری ایدی . نه یازیق کی بو حوکومت بیر ایلین عرضینده زاوالا گلدی . علی نشانی نین ده بیر چوخلاری کیمی ایستی آشینا سانکی سویوق سو قاتیلدی . میللی حوکومت دن سونرا اودا بیر چوخلاری کیمی یاخالانیب ایرانین اورتاسیندا یئرلشن یزد شهرینه تبعید اولونور . او چتین فضادا شاعیره شعردن باشقا نمنه ذوق وئره بیلردی ؟ اوئله بونا گوره ده شعرلرینین بیرینده او آغیر ایللر و گونلری بئله یاد ائدیر :
نیم فرسخ راه مازاری پیاده می روم
هی زپایم در می آید گیوه های پاره ام
صبح تا شب جای آجیل می خورم افغان و غم
قوت بازو ندارم تا بیدنجیر بشکنم
اشتران تیمار کنم یا بار سنگ بالا زنم ؟
=+=
گوشت پشتم خرد کرده لنگه های بیت من
پوست دستم زخم کرده چوب بیل بارکن
بارها در روز کارم بر سر چاه است من
منبع اصطبل را از آب باید پر کنم
اشتران تیمار کنم یا بار سنگ بالا زنم ؟
=+=
صبح نصفی نان سنگگ می خورم شام همچنان
ظهر نصفی نان خالی آب داغ چار استکان
دو تومن کفشم شود یا پیرهن یا خرج نان
مزد شاگردی است این یا حلم اشتر کندنم
اشتران تیمار کنم یا بار سنگ بالا زنم ؟
=+=
دیگر آیا بهتر از این بگذرد دنیای من ؟
این همه نعمت فرو پاشیده پیش پای من
گوله های لرد مازاری شده خرمای من
مختصر ننشینم از جا بر خزم کاری کنم
اشتران تیمار کنم یا بار سنگ بالا زنم .
تابستان 1326
علی نشانی نین شعرلری ان گنج چاغلاریندان مراقلا اوخونموش حتی میللی حوکومت دوورو درس لیک کیتابلارادا یول تاپمیشلار . اورنک اولاراق قوجا باغبان شعری مکتب اوشاقلارینین بیرینجی کیلاس دا اوخونان درس کیتابلاریندا چاپ اولموشدور . همین شعردن ئئجه دیر ایکی کوبلئت اوخویاق ؟
قوجا باغبان ایشله دایانما بیر آن
ایشله ین ال باغچا گورر بار گورر
بو بللی دیر سعی ائیله سه باغبان
آلما گورر ؛ هئیوا گورر ؛ نار گورر
=+=
باهاردان یارانیر هر لاله هر گول
مرامه یئترسن غم ائتمه کونول
چون هر زامان قیشین سونوندا بولبول
لاله لی سونبوللر بیر باهار گورر ...
ائلین اونودولماز آشیغی، آشیق درویش
ائلین اونودولماز آشیغی، آشیق درویش
توز باسیب ائشیتمیر صدفلی سازین
گلمیر قولاغیما او خوش آوازین
قاریشدی تورپاغا صؤحبتین سؤزون
یانیرام سنده كی كامالا درویش
اورمیه نین آدلیملاری كیتابیندان رحمتلیك آشیق «درویش»- ین یاشامی نی اوخویوب قورتولاندان سونرا اوره ییمی غم باسیب اوركدن آه چكدیم. ندن بئلنچی بیر اینسانلاریمیز اونودولوبلار؟!! بونا گؤره ماراقلاندیم آشیغین كندینه گئدیب، قبرینی زییارت ائدم. یولداشلاریمین بیریله بو قونویو آرایا قویوب اونون كندینه گئتمه یی قرارا گتیردیك.
قراریمیز جومعه گونونه یدی و زامانین اوچدوغونا گؤره بو گون تئزلیكله گلیب چاتدی، گون اورتادان سونرا «كوردلر» كندینه ساری یوللاندیق، كند اورمیه نین چی چست یولونون 5 كیلومترلییینده یدی،كنده یئتیشیب، اورادا یاشایانلاردان قبیرسانلیغین یولونو سوروشدوق، نئچه دقیقه دن سونرا كنددن آزجا ائشیكده اولان قبیرسانلیغا یئتیشدیق، تورپاقلی بیر یول و سس سیز بیر آخیرت ائولری.. آخیرته قاووشانلارا بیر فاتیحه وئرندن سونرا، ته له سه رك تئز قبیرلری بیر- بیر آختاریب یازیلارینا دیققت ائدیردیك، آما رحمتلیك درویش-ین قبیرینی تاپا بیلمه دیك. اورالاردان كئچن بیر چوباندان آشیغین قبیرینی سوروشدوق و كاشكی سوروشماسایدیق! ، چوبان او كندین یاشایانلاریندان اولاراق آشیغین قبیرینی تانیمیردی!!
نئیله مك دئمه آشیق ائله اؤز كندینده ده قریبییمیش.گؤی ده بو قریبلییه دؤزه بیلمه ییردی و آغلاماق ایسته ییردی.. اومودلریمیزی پوزمایاراق،بیرینین یولدان كئچمه سینی گؤزله ییردیك،او آندا بیر پیكان قبیرسانلیغا ساری گلدی،دئمه تانری یئتیردی! بیزیم یانیمیزا یئتیشه نده اوندان آشیغین قبیرینی سوروشدوق و شوكورلر اولسون سوروجو قبیری تانییرمیش و اونو بیزه گؤسته ره رك اؤزوده بیزیمله قبیرین یانینا گلدی، اللی یاشیندا اولان او معرفتلی بی (یاری جینابلاری) بیزه حورمتله یاناشیب، آشیغا فاتیحه گؤندرندن سونرا آزجا اونون یاشامینی بیزیم اوچون آچیقلادی و سورولاریما جاواب وئردی.
رحمتلیك آشیق درویشین قیساجا یاشامیندان بئله دئمك اولار:
آشیق درویش فرهاد اوغلو 1309 – نجو گونش (شمسی) ایلینده اورمیه نین «كوردلر» كندینده دونیایا گؤز آچمیشدیر. او ده یرلی اوستاد آشیق فرهاد كیمی آذربایجانین سنتی موسیقی سینین آدلیملاریندان ساییلیر. آشیق درویشین گؤزل، ایستی و صمیمی سه سینه گؤره آشیق فرهادین شاگیردی اولموشدور. درویش چالان ساز سه سی جانلارا كئچیب و گؤزل سه سیله اونودولموش اثرلره جان باغیشلاییردی. بو اونودولماز اوستاد 1372 ـ نجی ایلین قویروق دوغان(مورداد) آیینین دوققوزوندا، گؤزلرین دونیایا یوموب،اؤز دوغوم یئری اولان «كوردلر» كندینده تورپاغا تاپشیریلدی. آشیغین تشییع-ی جنازه سینده اینه سالماغا یئر یوخویموش و بو اونون خالق ایچینده نه قدر سئویملی اولدوغونو گؤسته ریردی.
آشیق درویش یاشام بویو (همیشه لیك) آذربایجانین سنتی موسیقی سینی سئورلرین اوره یینده قالاجاقدیر و بو سه س اورمیه اوچون قالارگی بیر سه س اولوبدور. رحمتلیك درویش ایرانین بوتون میللی موسیقی فئستیواللارینا قاتیلب و یوكسك یئرلره ال تاپیب،اؤدول لر قازانیب دیر. او نئچه ایللرده اورمیه رادیو، تلویزیونویلادا ایش بیرلیگی آپاریبدیر. او ده یه رلی اوستاد چوخلو شاگیردلرده موسیقی دونیامیزا تربیه ائدیب دیر، اونلاردان، آشیق اسمعلی (اورمیه – اونون بیرینجی شاگیردی)، آشیق صبور شریفی (اورمیه)، آشیق عبدالله اشرفی (قورد تپه)، آشیق ذكریا ملكی(قولونجو)، آشیق رضا پوینده (سولدوز) و ...آد آپارماق اولار.
آشیق درویش، متین، ویقارلی و عاریف بیر كیشی ایدی، دئمك اولار او خصلت ایله صنعت ده، اصیل و نمونه بیر آشیق و اوزان دیر. رحمتلیك درویش آشیق صنعتینه اؤزونه مخصوص اولان نئچه هاوا یادیگار قویوب. اونلاردان «شكر یازی هاواسی» و «غربتی هاواسی»- نی آد آپارماق اولار. بو هاوالار ایندیده اورمو آشیق لارینین آراسیندا چالینماقدادیر.
سونوندا دئمه لییم بئله نچی اینسانلاریمیزا سایغی گؤسته رمه لییك و اونون شانینده اولان بیر مزارلیق تیكیب هئچ اولماسا آدینا بیر خییاوان یارادیب هئیكلین پاركلارا قویمالییق.
منه یاردیم ائدن، «شكاری» و «یاری» جینابلارینداندا تشككور ائدیرم و اونلارا جان ساغلیغی آرزیلاییرام.
یازیب، حاضیرلایان : حسین واحدی
اورمونون والیبال تیمینی سئونلر بو تیمه عضو اولسونلار
بیرجه سن!Bircə sən
بیرجه سن!
بیر بارداق سو،
بیر فطیر،
بیر تیکه پئندیر،
یئتر دی منه یاماجلاردا،بو داغلاردا!
بیر تک سن اولسایدین ،
ائی وطن!
اولماسایدین بوقده ر ،
اوزاقلاردا
۱۳۹۰-اورمو
شعر: كریم گول اندام
كریم گول اندام (اورمولو شاعیر): گنج لریمیز، فایداسیز تعصب لاردان اوزاق قالمالیدیرلار
كریم گول اندام (اورمولو شاعیر) شهامت-له دانیشیقدا:
گنج لریمیز، فایداسیز تعصب لاردان اوزاق قالمالیدیرلار
دانیشیغی آپاران: حسین واحدی
من گول اندام كریم، علی اوغلو، 1326-دا اورمو شهرینده آنادان اولموشام. اورمو شهری دئینده منه چوخ اؤنملیسی اونون سسلنمه سیدیر. بیر دؤوره رضائیه اولوب، سونرا ارومیه، آمما نهایتده اورمیه دوزدو. اور سؤزوندن اورفا (توركیه ده)، اور (عیراق دا)، اوردوباد (آذربایجان جومهوریتینده)، اوروق (قازاقیستاندا)، اورومچی (چین ده) و اورمیه (ایراندا). تاریخ ده بورا اورمیه اولوبدور و «واو» حرفین دییشمكله تاریخی ایتیریریك. منده بو اوزدن اورمو-دا دوغولموشام.
اورتا مدرسه نی اورمیه ده بیتیرمیشم. عالی تحصیلاتی تئهرانین حوقوق فاكولته سینده قورتارمیشام. بانكدا چالیشماغا باشلاییب، 10 ایلدن سونرا یئنیدن آلینما (باز خرید) اولموشام. بیر موددتده آذربایجان جومهوریتینه كؤچوب نئچه ایل یاشایاندان سونرا، یئنیدن اورمویا قاییتمیشام. من اورادا تحقیقات و ادبیات ایله مشغول اولموشام. اقتصادی چتینلیك لره گؤره ده دوكتورا تئزیمی ساتمیشام.
روحوم، ووجودومومون بوتون ذره لری، وطن سئوگیسی ایله، اؤز یوردوم، دیلیمه و خالقیما و اؤز بؤیوك وطنیم ایرانا دولودور.
كؤچمن قارانقوش
كؤچمن قارانقوش
سون باهار گلمك اوزره دیر. یولداشلاریم دئییر: قالدیغیمیز یئردن باشقا یئره گئده جه ییك. آتامدان سوروشاندا: هاراگئده جه ییك؟ من تانیمادیغیم یئرلردن سؤز آچیر.
هردن اؤز- اؤزومه ائله داریخیرام! دئییرم نه اولار ائله بو یام-یاشیل یئرده قالیب یاشایاق. آمما آتام دئییر: بیر آیین ایچینده بورادان گئتمه سك هامیمیز سویوقدان اؤله ریك. قارانقوش لار ایسی یئرده یاشایارلار. ائلیمیزین بؤیوگو دئییب: ایكی گوندن سونرا اورمو گؤلونون یانینا گئده جه ییك. آتام دئییر، اورمو گؤلو، چوخ گؤزلدیر و اورادا آیاقلاری اوزون فیلامینقولار، ساری جئیرانلار، قوچ لار و... یاشاییرلار.
ایندی چوخ ماراقلی اولموشام تئزلیك له قالدیغیمیز یئردن اورمو گؤلونو گؤرمه یه گئدم... كؤچمك گونو گلیب یئتیشمیشدی و یولداشلاریم ایله بیرلیكده بیر قیراقدا اوچماغا حاضیر اولموشدوق، ائلین بؤیوگونون اوچماغی ایله هامیمیز گؤیه ساری یوللاندیق، شهرلرین اوستوندن كئچنده اوشاق لارین هامیسی بیزه ال ساللاییردیلار و ائله بیل اونلار بیزیم له بیرگه اوچماق ایسته ییرلر...
یول چوخ اوزونویدو، آمما هئچ یورولماق بیلمه ییردیم، یالنیز اورمو گؤلونه چاتماق ایسته ییردیم، بؤیوكلو-كیچیكلی داغلاری، اورمانلاری، شهرلری آشیب گئدیردیك. گئتدیگیمیز یئره آز قالیردیق، آتام، آنام ایله بیر لیك ده یانیمدا اوچوردولار و من چوخ سئوینیردیم.
... اوزون یولجولوقدان سونرا، آرزیسین چكدیگیم یئره یئتیشمیشدیك، آمما اورمو گؤلو... اورمو گؤلو من آرزیسین چكن دئیلمیش، چوخ آغلادیم بورا گلدیگیمه، بورا چؤلدن باشقا بیر زاد دئییلمیش، آتام یانیما گلیب، آغلاما قیزیم بورا سولو بیر گؤلویدو، قوروماسینین ندنین بیلمه ییرم، سنی آپاراجاغام گؤزل «وان» گؤلونه، دئییرلر اورا چوخ سولو و گؤزل دیر... سن آغلاما، گؤزل قیزیم ...
یازان: حسین واحدی
اورمو گؤلو/قیروو آیی
بورا اورمو گؤلودور!!
بو هاوایی شكیل قیروو آییندا سالینیبدیر (90/8)
گؤره سن بو گؤزل تانری نعمتینی دوشونن اولاجاق می؟
|
| ||||
تانریم یاردیم ائت اورمو گؤلوموزه...
اومودوموز سنین رحمتیندیر...
