ان یاخین یولداشیم كیتاب
كیتابی سئونلرین هامیسی، كیتابی اؤزلرینه ان یاخین یولداش بیلرلر. و نه گؤزل! كیتاب عزیز اولسادا، ان یاخین یولداش اولسادا، خبرینیز اولسون، بو ایل اورمیه ده كئچیریلن ایللیك كیتاب سرگی سی (نمایشگاهی) لغو اولوب!
بو سرگی هر ایل خزل (مهر) اییندا اولاردی... تراختورون شرفلی یانداش لاری بئله واخت لار اوچون اورك سویودان بیر شوعار دئییب لر... عیبی یوخ!!
روحوم منیم
روحوم منیم
یازان: حسین واحدی
روحوملا یولداش اولموشام، دویغولاریمی اونلا پایلاشیرام، روحوم ایسه من له. گئجه- گوندوزوموزو بیر ائتمیشیك. بیز بؤیوك باشاریلارا یئتیرمه یی دوشونوروك.
بیز بیر اولموشوق، روحوم منه، من ایسه روحوما، « هر زامان سنین له یم» دئییرم. گله جكده بوتون هدف لریمیزه ایله باشاریلارا ال تاپمایا گؤره آنلاشمیشیق.
بو یوكسك گوجه ال تاپدیغیمیز اوچون ایكیمیزده موتلویوق. بو دوزگون آنلاشماق ایله یوزده- یوز گله جك من له روحوموندور ...!
كئچل-كئچل
كئچل-كئچل
كئچل كئچل بامیه
گئتدی مریض خانیه
مریض خانا باغلیدی
كئچلین باشی یاغلیدی
كئچل دئیر وای باشیم
قازان دا قاینار آشیم
آشیمی ایچن اولایدی
باشیما دولان(دولانان) اولایدی ...
باهالیق سالان!
باهالیق سالان!
یازان: حسین واحدی
یئره- گؤیه باهالیق دوشوب، دئیه اود قویورسان! هر یئرده باهالیق دان دانیشیرسان!! هئچ بیر آزدا اوتوروب دوشونمه ییرسن. باهالیغی سالان، سن ایله سنه تای لاردیرلار!! آدینی اینسانمی قویوبسان؟! وطن سئونمی آدلاندیریبسان؟!!
یوخ! گئت، اؤزونه دؤن. بیر آز بؤركونو اؤنونه قوی، دوشون! بیر، آرا سؤزو (شایعه) ائشیتدین دئیه، بازاردان آلمادیغین زاد قالماییر!! تای-تای دوگو آلیرسان، یاغ آلیرسان، چای آلیرسان، بئله چؤرگی ده چوخ آلیرسان، آجلیق دوشه جك، سنه هئچ زاد چاتمایاجاق دان باشقا، هئچ نه یی آنلاماییرسان!!
بو آرادا سن یالقیز دئییلسن. بازاردا، محلله ده، هر یئرده سنه تای چوخدور!! آرا سؤزو، قولاق لارا گلمه میش، هر نه یی آمبارا باسیر، باهالیق آلوولانسین دئیه! باهالیغی سالاندان سونرا گتیریب ساتیر! آخیرتینه قازانج آلیر!!
داها بس دیر! باهالیق سالماقدان، باهالیغین دوشمه سینه كؤمك ائتمكدن واز گئچ. یوخودان اویان! او، ایشسیز آداملاری دوشون! گلیری آز اولانلاری! گئجه نی آج یاتانلاری دوشون! اؤزونه گل، اویان!! دونیا هئچ كیمه قالمایاجاق، اینان!
بو دونیا فانیدیر فانی
بو دونیادا قالان هانی
داوود اوغلو سولئیمانی
تخت اوستوندن سالان دونیا
بیر گونش حیکایه سی
بیر گونش حیکایه سی
یازان: آیدین اوجال
کؤچورن: حسین واحدی
گون او گون ایدی. صبیرلرین داشدیغی گون... اومیدلرین تؤکندیگی گون... دونیا گونشین یولونو گؤزله ییردی. ظولمت‌دن چیخماق ایسته ییردی. ظولمتله چارپیشماق‌دان یورولموشدو. گونش دوغا‌جاق و بوتون دونیانی ایشیغا بورویه‌جکدی ...
و بیر صاباح گونش دوغدو. ظولمتین سارای‌لاری باشینا چؤکدو. آددیم-آددیم دونیانین گؤزدن اوزاق یئرلرینه چکیلمه یه باشلادی. اونونلا گلن نه واردیسه، ائله اونونلا دا گئتدی. تکجه اوردا- بوردا قالان کؤلگه لردن باشقا ...
گونش نورونو یایدیقجا یاییردی. کؤلگه لر ایسه قورخوردو. کؤلگه لر بیر گون گونشین اونلاری دا یوخ ائده جه یین دن قورخوردولار. ائله بو قورخو ایله ده گونشه لکه یاخماغا باشلادیلار. آنجاق گونش لکه گؤتورموردو. اونلار, گونشین لکه گؤتورمزلیگینی بیلمه ییردیلر...
گونش قالخدیقجا کؤلگه لر اریمه یه باشلاییردی. بیر- بیر اریگیب یوخ اولدولاقلاریندان, چوخ کئچمه دی. آنجاق گونش نورونو یایدیقجا یاییر، گئت- گئده ظولمتین سیغیندیغی یئرلره قدر اوزانیردی...
گونش اوزاقلاشدیقجا کؤلگه لر باش قالدیریردی. سونرا کؤلگه لر بؤیومه یه باشلادی. و بؤیویه- بؤیویه هر بیری اؤز یئرینی آلدی. سئوینیردیلر. نئجه اولسا، خلاص اولموشدولار. نئجه اولسا، بیر آزدان ظولمت ده گله‌جکدی. چونکی گونش اوزاقلاشدیقجا اوزاق‌لاشیردی. بئله گئتسه، داغ لارین آرخاسیندا گؤرونمز اولا‌جاقدی...
دادلی ـ دوزلو دانیشیقلار
دادلی ـ دوزلو دانیشیقلار
طنزیم: منصور خانلو
بوتیك ده:
آرواد: ائله بیل بوینوما دار گلیر!
كیشی: هانی او آللاه...!
***
- اوره ییم دولودو
- حتمن جیبین بوشدو
***
-قوناقلار: ایشیق گئتدی
- ائو صاحیبی: ایشیغین ساغ الی سیزین باشینیزا!
***
- دئنه سن اؤله سن.
- من اؤلویه آند ایچمه رم!
***
- او قدر یاتمیشام، یاتماقدان یورولموشام.
- گئت بیر آز یات یورقونلوغون گئتسین!
***
هفته بازاریندا:
ـ بو كوت نئچه دی؟
ـ اون مین تومن.
ـ چوخ باها دئییرسن! اؤلو كُوتودو دا!
ـ منده دیری یه ساتمیرام كی!
***
ـ چایینیزدان تشككور ائدیرم.
ـ اؤزومدن یوخ؟!
***
ـ گؤزلرین چوخ شیشیبدی؟
ـ تازا یوخودان دورموشام.
ـ كؤهنه یوخودان یوخ؟
آذربایجان اوشاقلارینا آنیت
آذربایجان اوشاقلارینا آنیت
(اؤزل یازی/یادواره كودكان آذربایجان)
انجمن حمایت از حقوق کودکان برگزار می کند :
یادواره کودکان آذربایجان
و گزارش فعالیت های انجمن حمایت از حقوق کودکان در آذربایجان
دوشنبه ، دهم مهر ماه از ساعت ۱۶:۳۰ الی ۱۹:۳۰
آدرس : شهرک قدس (غرب) ، تقاطع بلوار فرحزادی و شهید دادمان ، بیمارستان آتیه
ورود برای عموم علاقمندان آزاد است.
«حیدربابا» منیم خاطیره بئشیگیم دیر
|
«حیدربابا» منیم خاطیره بئشیگیم دیر |
| یازان: اوستاد سید محمدحسین شهریار
|
|
 شكیل: http://www.exposin.com/i/1434 |
|
|
او شاعیرلركی داغ اورمان گؤروب و پاك طبیعتین قوینوندا بویا باشا چاتیب‌دیرلار، بیلیرلركی، اؤ شیرین و گؤزه‌ل چاغلار تؤكنمز بیر خزینه‌دیركی، یازیچی‌اولان زامان همیشه اونلاردان فایدالانماق اولار. منده بو سایاق اؤز دؤغما دیاریما هامیدان آرتیق بورجلویام، اثرلریمده یئری گلدیكده وطنیمدن خاطیرلامیشام، لاكین بو خاطیر لامالار هله منی قانع‌ائتمه‌میشدیر. بو فكیره دؤشدوم محلی ترانه‌لری كیمی بیر اثر یارادیم كی «محلی»لر ذائقه سینده» خصوصی اولاراق همبازیلاریمین داماغین چاق ائله‌سین لاكین اوزون‌مدت تهراندا اوتوراق ائله‌دیگیمه گوره آنا دیلیمده اولان اینجه‌لیین و خصوصیتین یاددان چیخاریب دئمك اولاركی بیر ذره‌ده یابانجی اولموشام. حتی‌اوشاقلیق خاطیره‌لریم ذهنیمده سیلینیب، رنگ‌سیز بیر تابلویا اوخشاییر. او زامان كی رحمتلی آنام مندن اؤتر تهرانا گلدی، اونون ساده دانیشیقلاری، كئچنلردن سویله دیگی ناغیل‌لار، داستانلار منیم اوشاقلیق چاغلاریمدان، آستا- آستا ذهنیمده اؤلموش خاطیره‌لری چانلائدیردی. 1320 نجی ایل شهریوردن بویانا، كی منیم ناخوشلوق، امیدسیزلیك، تك لیكده كئچینمه زمانیم باشلادی آنام بیر پرستار كیمی یانیمی كسدی، منی‌مشغول ائتسین دئیه، شیرین صحبتلره باشلادی. بو ساده دئییم‌لر شراب كیمی منه توختاخلیق وئرر، روحومون هیجانیندان آزادلدیردی، ایچیمده گیزلی بیرشادلیق یارالدیردی. |
ائله فرق ائتمه ییب!
یازان: حسین واحدی
دئییردیم من ایلین ایلك گونوندن 500 مین آلیرام. تویوق او زامان 1500 ایدی. سونرا من یئنه 500 مین آلدیم. تویوق اولدو 3000 تومن. نئچه آیدان سونرا من یئنه 500 مین آلدیم. تویوق اولدو 4000. سونرادا 4500. ایندی من هله ده 500 مین تومن آلیرام تویوق 5000 تومن اولوب. هله من تویوق دان مظلومون تاپا بیلمه دیم. یوخسا هر نه یی میثال چكمك اولاردی!!! دئدیم دا ائله فرق ائتمه ییب. من ایلین اولیندن 500 مین آلمیشام. هردن بیر چوخ چالیشان دا 520 مین ده آلمیشام. ایلین سونوناجان ایش بئله گئده جك...!!
“کوراوغلو” داستانی آذربایجان توركجه سینده
یازان: احمد شاهیدوو
كؤچورن: حسین واحدی
تورک خالق‌لاری‌نین بؤیوک اکثریتی‌نین (تورک، تورکمن، اؤزبک، قازاق، باشقیرت، تاتار، قاراقالپاق، آذربایجان تورک‌لری و ...) شیفاهی عنعنه‌سینده مؤوجود اولان “کور اوغلو” داستانی تونا‌دان بالکان‌لارا، سیبیردن سوریایا قدر گئنیش بیر جوغرافی ده یاییلیب. یاییلما میقیاسینا، حجمینه و شؤهرتینه گؤره “کوراوغلو” یئگانه داستان‌دیر کی، مختلف نسخه لرینین سایی بئش یوزدن چوخدور.
تورکییه‌ده “کوراوغلو”نون ایلک چاپی 1887-جی ایلده ایشیق اوزو گؤروب. اون بئش صحیفه‌لیک بو نشردن سونرا كوراوغلو، دؤورو و قهرمانین فعالیت گؤستردیگی تاریخی حادثه‌لرله باغلی بیر چوخ آراشدیرما‌لار آپاریلمیش‌دیر. بون‌دان بیر قدر اول ایسه “کوراوغلو” داستانی‌نین بیر حیصه‌سی ائرمنی الیفباسی ایله ایستانبولدا چاپ ائدیلمیش‌دیر. 1897-جی ایلده آشیق جمعا‌لی‌دن یازییا آلینمیش “گیزیر اوغلو مصطفی بی”، “بولو بی” قول‌لاری تیفلیسده نشر ائدیلدی.
آذربایجاندا “کوراوغلو” داستانی‌نین ایلک نشری 1913-جو ایلده اوروجوو قارداش‌لاری چاپ ائوینده رضا زاکی طرفین‌دن چاپ ائدیلمیش‌دیر. بو نثرله اولان نشرین تیتول ورقی فارسجا یازیلیب. داستانین 14 قول‌دان عبارت داها موکممل و قوشما‌لارلا زنگین دیگر بیر نسخه سی 1941-جی ایلده همت علی‌زاده طرفین‌دن نشر ائدیلمیش‌دیر.
“کوراوغلو” داستانی اورتا آسیادا دا دفعه‌لرله نشر ائدیلمیش‌دیر. اورتا آسیا وئرسیاسی دؤورو اولدوغون‌دان هله ده تام شکیلده چاپ ائدیلممیش‌دیر. اساساً ده اؤزبک کوراوغلوسو بیر نئچه نسلین قهرمان‌لیق تاریخچه‌سی جانلاندیردیغین‌دان هر دؤور مستقیل داستان کیمی فورمالاشمیش‌دیر. سون زامان‌لاردا آذربایجاندا “کوراوغلو” داستانی‌نین یئنی قول‌لاری توپلانیب نشر ائدیلمیش‌دیر. بون‌لاردان “قهرمان کوراوغلونون دیو‌لرله گؤروشو”، “کوراوغلونون تئهران سفری”، “میصری قیلینجین اوغورلانماسی”، “مرجان خانیمین چنلی بئله گلمه‌سی”، “زرنیشان خانیمین چنلی بئله گلمه‌سی”، “آغجا قوزو” قول‌لارینی گؤسترمک اولار.
“کوراوغلو” داستانی‌نین قیسا نشر تاریخی گؤستریر کی، او XIX عصرین باشلانغیجین‌دان سون دؤورلره قدر چوخ مشهور اولموش، واریانت (چئشیت) باخیمین‌دان ان چوخ یاییلان داستان حالینا گلمیش‌دیر. آنجاق هم اینگیلیس، فرانسیز (فرانسه)، هم ده ایلک روس نشرلری تحریف‌لرله دولودور. فولکلورلوق باخیمین‌دان بو نشرلرین قوسورلاری چوخدور. بون‌لارا مثال کیمی شعر حیصه‌لری‌نین نثرله وئریلمه‌سی، چئویرمه ده سربست‌لیک، یئرسیز علاوه‌لر کیمی موختلیف تحریف‌لری گؤسترمک اولار. چوخ تأسفله دئمک لازیم‌دیر کی، آذربایجان نشرلری ده آرزو ائدیله‌جک سویه‌ده دئییل‌دیر.
