قیسمت اولسا گلر یمن‌دن
قیسمت اولسا گلر یمن‌دن
حاضیرلایان: حسین واحدی
قدیم زامان بیر تاجیر یمن‌دن پارچا گتیریب ساتاردی. بیرگون یمن‌ده آلدیغی پارچالاری توپ-توپ تلیسه ییغماغا مشغول اولدوقدا، یمن‌دكی تاجیر طرفی، بیر بادامی سیندیریب ایچینی تاجیر یئسین ایسته‌ییر. بادامین ایچی تاجیرین دوداغیندان زویوب تلیسین ایچینه دوشور. پارچالاری تلیسدن چیخارتماق زحمتی، بادام ایچینی تاپماغا ده‌یمزدیر.
تاجیر گتیریب اؤز شهرینده پارچالاری تلیسدن چیخارداندا، تاجیرین اوغلو بادام ایچینی گؤروب گؤتوروب یئیه‌ر.
تاجیر دئیه‌ر: قیسمت اولسا گلر یمن‌دن، قیسمت اولماسا، دوشر آغیزدان!
قیرمیزی سئوگی / مرتضی مجدفر
“قیرمیزی سئوگی – عشق سرخ” مرتضی مجدفرین یئنی کیتابی یاییلدی …
تانینمیش آذربایجان یازیچیسی و ژورنالیستی دوکتور مرتضی مجدفرین “قیرمیزی سئوگی – عشق سرخ” آدیندا یئنی کیتابی نشره بوراخیلدی. بو کیتابا یازیچی‌‌نین آذربایجانین فوتبال تیمی تراکتورسازی‌نین آزارکئشلری باره‌ده یازدیغی قیسا حیکایه‌لری داخیلدیر. حیکایه‌لرین آذربایجان تورکجه‌سینده یازیلماقلارینا رغمن، اونلارین فارسجا ترجومه‌لری‌ده وئریلیبدیر. کیتاب “امرود” نشریاتی طرفیندن یاییلیب و ۳۳۰۰ تومن قیمتینده کیتاب ماغازالاریندا ساتیشدادیر.
قایناق: ایشیق
اوزون گولسون اوشاق...üZüN gÜlsÜn uşaq
اوزون گولسون اوشاق...
بئش یاشلی اوشاق تئلفونون زنگ سسینی ائشیدیب دسته‌گی قالدیریر:
ـ آلو، بویورون.
ـ آتانی یوخسا آنانی چاغیر.
ـ ائوده یوخدورلار.
ـ اوندا، ائوده سندن باشقا بیر آدام وار؟
ـ بلی وار، باجیم ائوده دیر.
ـ اوندا اونو چاغیر.
بیر دقیقه سونرا اوغلان دئییر:
ـ آلو، او چوخ آغیردیر، بئشیکدن چیخارا بیلمه‌دیم.
شانس‌سیز اوغرو
شانس‌سیز اوغرو
یازان: حسین واحدی
گئجه‌نین لاپ او شیرین یوخو گلن زامانی، دووراین یاپیشیغینداكی آغاجدان دیرماشیب ائوین حَیَطینه آتیلدی. سینه-سینه ائوه ساری گئدیب، الین یاپیشاجاغا آتیب قاپینین آچیق اولدوغونو گؤروب، سئویندی!
ایچه‌ری گیرنده، بیر كیشی‌نین اوتاقدا یوخودا اولدوغونو گؤردو. آیین ایچه‌ری‌یه دوشن ایشیغیندا ائوی آلت-اوست ائتدی، آما آپارماق اوچون درده ده‌ین بیرزاد تاپا بیلمه‌دی. اومودو پوزولوب قاچماق ایسته‌دیگی آن، ائو ییه‌سی یوخولو-یوخولو، "آی باشی داشلی اوغرو گون ایشیغیندا من بو ائوده بیرزاد تاپا بیلمیرم، سن، آی ایشیغیندا تاپماق ایسته‌ییرسن؟" دئییب، یورقانی تپه‌سینه چكدی!
نذیر ییغان
نذیر ییغان
حاضیرلایان: حسین واحدی
مصرده کاسیب‌لار اوچون نذیر ییغان آدام وار ایدی. چوخ یوخسول بیر آدامین اوشاغی دوغولور. او، نذیر ییغان‌دان پول ایسته‌ییر. نذیرییغان چوخ آداما آغیز آچیر، آنجاق هئچ کیم کؤمک ائتمیر. او، یوخسوللا بیرگه قبیریستانلیغا گئدیب، مزارا یاخینلاشیب دئییر: "آللاه سنه رحمت ائتسین! واختیله چوخ چالیشمیسان، من ایسه کؤرپه اوشاغا یاردیم ایستدیم، هئچ نه وئرمه‌دی‌لر". نذیرییغان بیر دیناری چیخاریب ایکی یئره بؤلوب، یاری‌سینی یوخسولا وئریب، دئییر: "بونو سنه بورج وئریرم، الینه پول گلسه قایتارارسان". همین گئجه نذیرییغان مزارینا گئتدیگی آدامی یوخودا گؤرور. مرحوم اونا دئییر: "سنی ائشیتدیم. گئت ائویمه و اوشاق‌لاریما دئ، اوجاغین آلتینی قازیب اورا‌دان بیر قین (غلاف) چیخارسین‌لار. اونون ایچینده 500 دینار وار. بو پولو وئر او یوخسولا"...
سحر نذیرییغان مرحومون ائوینه گئدیب، یوخوسونو دانیشیر. ائودکی‌لر گؤستریلن یئری قازیب، اورا‌دان قینی چیخاریرلار. گئرچكدن‌ده اورادا 500 دینار وار ایدی. نذیرییغان دئییر: "اصلینده بو پول‌لار سیزین‌دیر، منیم یوخوم حؤکم ائده بیلمز". آنجاق مرحومون یاخین‌لاری دئییر: "رحمت‌لیک عزیزیمیز اؤلو اولا-اولا الی آچیق‌لیق گؤستردیگی حالدا، بیز ساغ اولا-اولا الی آچیق اولا بیلمه‌ریک؟". نذیرییغان 500 دیناری گؤتوروب همین یوخسولا وئریب، هر شئیی اولدوغو کیمی اونا دانیشیر. لاکین یوخسول یالنیز بیر دیناری گؤتوروب ایکی یئره بؤلوب، یاری‌سینی واختیله نذیرییغانین اونا وئردیگی یاریم دیناری قایتاریر: "منه بو کیفایت ائدر، قالانینی ایسه یوخسول‌لارا پایلا".
یادیمدادیر...
یادیمدادیر...
حاضیرلایان: حسین واحدی
قریب‌دیر، ایندی عینی اؤلکه‌نین تورپاغینداییق، عینی هاوانی اودوروق. یئرین عینی نقطه‌سین‌دن سمایا باخیریق. بلکه ده 9 ایل بوندان اول بئله وضعیت اوچون نلری قوربان وئرمزدیم. ایندی ایسه هر شئی تام فرق‌لی‌دیر.
ماراق‌لی‌دیر، هئچ بیر زامان الیم-الینه توخونمادی، جان‌لی شکیلده بیر-بیریمیزی‌ده گؤرمدیک. آما حیاتیمین ائله گون‌لری اولوب، سنی گؤرمه‌سم اؤلجه‌ییمی دوشونوردوم. هاوا، سو کیمی احتیاج دویوردوم سنه. آرامیزداکی سئحیرلی شوشه مسافه‌لری، اوزاق‌لیغی، اؤلکه‌لری یوخ ائتمیشدی سانکی! اول-اول آرابیر گؤروشردیک او پنجره‌نین اؤنونده. دانیشمازدیق. یازیشاردیق. سن سئوگینی اعتراف ائتدیک‌دن سونرا منده‌ده باغلی‌لیق یاراندی. داها تئز-تئز گؤرمه‌یه باشلادیق بیر-بیریمیزی....
سن منه شوشه‌نین او طرفین‌دکی حیاتین نئجه گئتدیگینی، عائله‌نی، یاشادیغین یئرین عادت عنعنه‌لرینی دانیشیردین. من‌ده اؤزومونکولرینی. قریبه‌دیر، محض همین شوشه اؤنونده من بیری اوچون آغلاماغی، دلی کیمی سئوینمه‌یی اؤیرندیم. بوتون دویغوسال حیس‌لریمی اورادا یاشادیم. اطراف‌داکی‌لار منه دلی کیمی باخیردی‌لار.
قهرمان
قهرمان
یازان: حسین واحدی
قهرمان، دونیایا گؤز آچیب، تئز بویا-باشا چاتیب، گئجه-گوندوز چالیشاراق، قهرمان اولدو. او، ایلده نئچه سئری مختلف مسابقه‌لرده قهرمانلیق كاپینی باشی اوسته آپاریب، اؤلكه‌سی ایله خالقینی باش اوجا ائتدی.
قهرمان یاشاییش بویو یالنیز قالیب اورك‌سؤزونو دئمه‌یه كیمسه‌نی تاپا بیلمه‌دی. او، سس‌سیز بیر گئجه‌نین قارانلیغیندا دونیا ایله ساغوللاشیب گئتدی!
ایندی ایسه، هامی قهرمان-قهرمان دئییب اونون آدینی دیری ساخلاماغا چالیشیر!!
-----------------------------------------------------------------------
بو حیكایه جیك همشهری ده (91/11/25) سایی 5908ده چاپ اولوبدور. دئمه لییم هرگون غربی آذربایجان همشهری سینده بیر توركجه حیكایه جیك چاپ اولور
اونودولماز كاپیتان
سونولور، آذربایجانین قورخماز آسلانی كاپیتان "هوشنگ شهبازی" جنابلاری ایله آذربایجانین قهرمان بئجه رن خالقینا:
اونودولماز كاپیتان
یازان: حسین واحدی
گونش گؤیون اورتاسینا یوكسه‌لیردی. اوچاق‌دا موسافیرلرین بیری كیتاب اوخویوردو، بیری بولودلارا باخیردی، بیری ایسه شیرین یوخودا ایدی!
كاپیتان یانینداكی یاردیمجیسینا گولومسه‌ییب، "بیر آزدان یئتشیریك، تانری‌یا شوكورلر اولسون" دئدی.
ایكینجی كاپیتان ایسه سئوینج سس ایله "بلی، شوكورلر اولسون، اینشاللاه بیرداها ساغلیق ایله یئتیشه‌ریك" دئیه جاواب وئردی.
كاپیتان هاوا آلانینین كنترل مركزی ایله دانیشماغا باشلادی:
ـ سلاملار، بیز هاوا آلانینا قونماق ایسته‌ییریك!
ـ یورولمایاسینیز كاپیتان، هر زاد اویغون، قونا بیلرسینیز.
كاپیتان، حاضیرلیق آپاراراكن، آنلادی قونا بیلمك اولمایاجاق‌دیر، اوچاق‌دا بالاجا بیر ایراد تاپیلیب، بیرداها هاوا آلانی ایله ایلگر قوردو:
ـ كنترل مركزی، اوچاق‌دا بالاجا بیر ایراد واردیر، قونماق اوماییر.
ـ كاپیتان، چالیشین قوناسینیز!
كاپیتانین اوره‌یی پارتلاییردی. اومودونو پوزماق ایسته‌مه‌ییردی. تئز ان یاخین هاوا آلانی ایله ایلگی قوروب قونماق ایزنینی آلدی. تانری‌یا اومود ائدیب، هاوا آلانینا ساری گئتدی. خبر موسافیرلره وئریلمیشدی. اوركلر یئریندن چیخیردی. قادین‌لار ایله اوشاقلار چیغیر-باغیر سالمیشدیلار، آنجاق هر كیمسه اوره‌یینده دوعا ائدیردی.
زامان توو ایله گئدیردی. اوچاغین چرخ‌لری آچیلمادی، كاپیتان اوچاغی هاوا آلانینین باندینا یئترمیشدی. اوچاغین بورونو یئره سورتوله-سورتوله دایاندی!
موسافیرلر سئوینج ایچینده هارای چكیب، بیرلیكده "یاشاسین كاپیتان هوشنگ شهبازی" دئییردیلر. اوچاق یئره قونوب، كیمسه ضرر گؤرمه‌میشدی!
-----------------------------------------------------------------------
سؤزلوك:
سونولور: تقدیم اولور-اتحاف اولور
هاوا آلانی: فرودگاه
اوچاق: هواپیما-طیاره
یاردیمجی: كؤمك‌چی
گئرچك سئوگی
گئرچك سئوگی
حاضیرلایان: حسین واحدی
زامانین بیرینده, عالیم شخص‌لردن بیری بیر چای قیراغیندا نامازا دورموشدو...
مجنون تام او واخت‌دا، عالیم شخصین قارشی‌سین‌دان کئچر...
آدام حیرص‌له نامازینی پوزا‌راق:
ـ آی کافیر، نامازدا اولدوغومو گؤرمورسن‌می، نَیه اؤنوم‌دن کئچیرسن؟-دئیه‌ر.
مجنون ایسه بئله جاوابلایار:
ـ "من لئیلی نین سئوگی‌سی له سنین ناماز قیلدیغینی گؤرمزکن، سن مؤولانین اسئوگی‌سی له منی نئجه گؤردون...؟"
تشككورلر مهران بی/دوبله تورکی سریال "ویلای من"
|
|
به خاطر احترام به زبان مادری ام
من دوبله تورکی سریال " ویلای من " مهران مدیری را خواهم خرید. شما چطور؟!
لطفا اطلاع رسانی کنید تا همشهریان عزیز در صورت خرید ، دوبله تورکی را بگیرند. شاید و اگر دوبله تورکی فروش خوبی داشته باشد، یک تبلیغی باشد بین اهالی این صنف. و در نهایت یک آمار خوبی خواهد بود از علاقه آذربایجانی ها به زبان مادری خودشان جهت نشان دادن به مسئولان و تصمیم گیرندگان در حوزه احترام به فرهنگ و زبان سایر اقوام ساکن در ایران.
مهران مدیری'نین یئنی سئریالی تورکجه دوبله ایله!
"قهوه تلخ" سئریالی خوصوصی یاییم شبکه‌سینده اوغور قازاندیقدان سونرا، مهران مدیری'نین یئنی سئریالی، ساده‌جه فارسجا دئییل، تورکجه دوبله ایله ده ساتیلاجاق. بوندان اؤنجه فارسجا سئریال‌لاری آذربایجان اوچون دوبله ائدن دوبلورلار، بو دفعه "ویلای من" سئریالینی ایراندا یاشایان تورکلره اویغون اولاراق حاضیرلاماقدادیرلار.
بو ایش، پول قازانماق آماجی ایله اولسا دا، آنا دیلیمیزین خئیرینه اولاجاغی کسیندیر. نهایت کی بیزیم دیلیمیز و مدنیتیمیز یولو ایله ده قازانانلار اولاجاق! بو ایش اوغور قازانارسا، گله‌جکده آنا دیلیمیزده یازیلی و گؤرونتولو اولاراق بیر چوخ ماتئریالین تولیدینی بکله‌یه بیله‌ریک. اونا گؤره بونو بیر اؤنملی فورصت کیمی ده، دَیرلندیرمک اولار!
