سینما – تیاتر عرصه سینین آدلیم هنرمندی : آتش تقی پور
سینما – تیاتر عرصه سینین آدلیم هنرمندی :
آتش تقی پور
یازان: رضا همراز
آذربایجانین سینما - تئاتر عرصه سینین تاریخ بویو آدلیم - آدلیم هنرمند لری اولموشدور. میرزه باقیر حاجی زاده ؛ صمد صباحی ؛ محرم بسیم ؛ محرم زینال زاده ؛ رضا ناجی ؛ محمد علی رشدی ؛ و... اونلارین هر بیریسی دوغرودان – دوغروسو ان گؤونمه لی شخصیت لریمیزدن اولموشلار. همین عرصه نین بو گونکو فعال اشتراکچی لاریندان اولان، بو گونه قدر اونلار فیلم ها بئله سریال لارینین تاماشاچیسی اولدوغوموز، اوستاد آتش تقی پورو دا گؤسترمک.
فتحی آوشار، سارایی Fəthi avşar sarayı - urmiyə
شکیل ایله یوراج (yorac /گزارش) : حسین واحدى
آتا
آتا
یازان: حسین واحدی
هر بیر اینسانین آرخاسی، قوللاریمیزین توم گوجو، اورگیمیزین اورگی،كرال لار- كرالی، آتادیر.
گئجه- گوندوزون یوخ ائدیر. عایله سی ایسه شن یاشاییر. جننت ایسه آنالاریندیر!
آتا، بوتون دونیانین پادیشاهیدیر. دونیانین كؤكو بیزیمده اولسا، «یئنه سولطان آتادیر.»
آتا، گوجدور، باشا تاج، قلبه فرحدیر. او حورمت دیر، كیشیلیكدیر، تومجه لره (جمله لره) گلمه ین بیر دیریلیک دیر.
آتا شرفدیر، شؤوكتدیر، زیروه دیر، ربّ دیر. آتا بیزی دونیایا پای وئرن ان قیمت لى ملک دیر.
آتا، آتادیر...
منی آختارما
" منی آختارما "
شعر: على مرادى
منی آختارسان اگر؛
یوللارا بیرده باخارسان؛
قارپاپاق داغلاری آردیمجا آشارسان؛
زیروه لردن سووشارسان؛
تاپماسان اوردا منی؛
گونشین آچماسینی گوزله ییرم؛
اولدوزون باتماسینی؛
قارا چارشاب گئجه ده؛
...؛
یالقیز اگلشمیشم آنجاق گینه ساحیل قیراغیندا؛
منی آختارسان اگر!!!
آشیق صبور شریفی: آشیق ائلینكیدی، ائل آشیقیندی
آشیق صبور شریفی:
آشیق ائلینكیدی، ائل آشیقیندی
دانیشیق: حسین واحدی
رحمتلیك آشیق درویشین، شاگیردلریندن بیری اولان، آشیق صبور شریفی، اورمیه نین ، دادلی سسی اولان آشیق لاریندان بیریدیر. بو ساوادلی و باجاریقلی آشیقین توكانیندا دانیشیق اوچون قوناق اولموشدوم. آشیق صمیمیت له قارشیلاییب. خوش صحبت لیغی ایله سورولاریما جاواب وئریردی. باشقا آشیق لاریمیزا تای دویغوسال و اؤز صنعتینه عاشیق اولان، آشیق صبور ایله دانیشیغیمیزین، اؤزتین (ماحصل ین) بوتون آشیق صنعتینه ماراقلی اولانلارا تقدیم ائدیرم.
ـ آشیق، اؤزونوزو اوخوجولاریمیزا تانیتدیرین.
من، آشیق صبور شریفی، 1334-ونجو گونش ایلینده، اورمیه نین تورپاق قالا كندیدنه دونیایا گلمیشم. آتا- بابالی بو كندده نیك. شیرعلی آدیندا تورپاق قالالی قوچاق ایگیدین تؤره مه له ریندنم. شیرعلی، اورمویا هجوم ائدنلرین قاباغیندا قورخمازجاسینا دایانان بیر ایگید ایدی. ایندی ایسه مزاری تورپاق قالانین قبریستانلیغیندا ثبت اولوب، قالیر.
اوشاقلیق نیسگیلی
اوشاقلیق نیسگیلی
یازان: حسین واحدی
اون ایكی یاشیم اولان چاغ لارییدی. یاشام چوخ سیخینتی لی یدی. آتام بیر ایشچییدی. كیرا ائوده اوتوروردوق. آتام یاشام كئچیرمه خرجلرین عهده سیندن گلمه سی اوچون ایشده اولمایان گونلر خونچادا سیگار ساتیردی. آتام، خونچانی چرخین اوستونه قویوب گئدنده یولداشلاریمین یانیندا اوتاناردیم. بیلمه ز ییدیم آتام، بیزیم اوچون او ایشلری ائدیر.
یای گلیب چاتمیشدی. اوخول لار تعطیل اولموشدو. آتام، من ائوین بؤیوك اوغلان اوشاغی اولدوغوم اوچون، منیده اؤزو ایله سیگار ساتماغا آپاریردی. چرخین (جوت تكر) قاباغیندا اوتورماق لذتی، سیگار ساتماق دان گلن اوتانجی اؤزو ایله آپاریردی. اسینتی اوزومه ووردوقجا، آتامین نفسی باشیمین آرخاسینا دَیمه ایله بیرگه، لذت داها گؤزل اولوردو، منیم اوچون. نئچه گؤن بیرلیكده، بو آنلاری یاشاتدیق. سونرا من تك باشیما بو ایشه آرد وئردیم. بیر ثابیت یئر، تاپیب بویان- اویان گئتمك دن راحات اولموشدوق. یانیممدا بیر، باشماقچی دا، وارییدی. من دووارین یانیندا خونچامی قورموشدوم. او ایسه اوز- اوزومده باشماقچیلیق ائدیردی. بعضن بیر- نئچه آرابا اوستونده ساتیجیلیق ائدن گنج ده بیزیم یانیمیزا گلیردیرلر.
آرا- بیر آتام ایسه منه باش چكیردی. گون اورتا واختلاری منی یانینا سالیب، بیزه یاخین اولان مئیداندا، اوجوزلو بیر یئمك یئییب خونچا باشینا دؤنوردوك. بئله واخت لار خونچانی باشماقچی یا تاپشیریردیق. همبرگری چوخ سئوردیم. آنجاق پولوموز اوندان دا اوجوز یئمك لره چاتیردی.
آتام گلمه یَن گونلرین بیرینده گون اورتا واختی قارنیم سس سالماغا باشلامیشدی. خیاوانین او بیری الینده بیر ساندویچ توكانی واریدی. جیبیمده كی پوللارا باخیب، اورا گئتمه یی دوشوندوم. خونچانی باشماقچی یا تاپشیردیم.
مئیدانا ساری یولا دوشدوم. اؤز یانیمدا، «باشماقچی ساندویچ توكانینا، گئتمدیگمی آنلاماسین»- دئدیم. بیر آز مئیدانا ساری گئدندن سونرا آرخاما باخیب خیاوانین او بیری الینه كئچدیم. یالنیش بیر ایش گؤرن لره تای، قورخا- قورخا ساندویچ توكانیندان، ایچری گیریب بیر همبرگر تاپشیریقی وئردیم. صندل ده اوتوروب، همبرگرین حاضیرلانماسین گؤزله دیم. بئش دقیقه دن سونرا همبرگر ماسا باشینا گتیریلدی. سئوینه- سئوینه دونیانین ان لذتلی یئمه ییدیر، دئیه یئمه یه باشلادیم. ساندویچ قورتولاندان سونرا خونچا باشینا دؤندوم.
او گوندن سونرا، آرا-بیر بو ایشی یئنه ائتدیم. آنجاق آتاما نیسگیل ائتمك اوره ییمه دولدو. ندن اونلا بیر لیكده گئده بیلمه ییرم. «اقتصادی دوروموموز خوش اولسایدی، بئله گونلری ده گؤرمزدیم.»- اؤز- اؤزومه دئییردیم. داها همبرگرلرده لذت یوخویدور. او اوجوزلو اَت دورمك لرین داها چوخ سئویردیم.
اوچ آی گؤز یوموب آچانا قورتولدو. داها آتام بو ایشه آرد وئرمه دی. منده اوخولا دؤندوم. آنجاق آتام لا بیر لیك ده سیگار ساتماق اوتانجیندان راحات اولموشدوم. محلله اوشاق لاری ایله اوخولا گئدیردیك- اویناییردیق و یاشام سوروردوك.
ایندی، او ایللردن چوخ كئچیر. آنجاق بو اوشاقلیق نیسگیلی بیرعؤمور من له قالیب دیر.
وارلیق لارین دانان قونشو
وارلیق لارین دانان قونشو
یازان: بهرنگ منتخبی
گون باتان چاغیندا ائوه یئتیشدی. قاپینی آچیب، ایچه ری یه كئچدی.
- خانیم، من گلدیم!
خانیم مطبخین قاپیسیندان باخیب دئدی:
- یورولمیاسان. کوتویون چیخارت، چای دمله میشم، گتیریم ایچ!
آتاسینین سسین ائشیدن اوشاق، اویونجاقلارین اوتاقدا قویوب، مبل اوستونده اوتوران آتاسینا ساری قاچدی.
- آتا سلام
کیشی اوغولو باغرینا باسیب و اونون اوزوندن اؤپدو.
- سلام اوغول
اوشاق، آتاسینا باخیب دئدی:
- آتا جان، آشاغیداکی تزه قونشوموز، بیر آغ ماشین آلیب. بویوک دی، آدینی بیلمیرم، آمما نومره سی بیزیم ماشیندان فرقلی دیر. دئدیگین كیمی هر شهرین اؤز نومره سی وار و بیزیم شهرین ماشینلارینین نومره سی 17-27 اولمالیدیر؟ آتا! ندن بو فرقلی دیر؟
خانیم چای سینی سی الینده، کیشی یه یاخینلاشدی و كیشی ایله اوشاغا باخدی.
- بو سورغولار ندیر سن سوروشورسان؟ آتانین یورولماغین گؤرمه ییرسن؟
کیشی باشین یوخاری توتوب، خانیما باخیب دئدی:
- اللرین آغریماسین.
سونرا اوزون، اوشاغا چئویریب سؤیله دی:
- نازلیم، من بو یئنی قونشوموزو تانیمیرام، آمما ایمکانلی دیر، اونلار باشقا بیر شهردن گلیب لر. اولا بیلر ماشین لارینین نومره سینین فرقلی اولماسیدا اودور.
نئچه گون كئچدی. بیر گون کیشی ایش باشینا گئدرکن، گؤردو تازا قونشولاری، خانیمی ایله دانیشیرلار. کئف احوال ائله مک ایله تانیشلیق قاپیسین آچماق اوچون تئز پیلله لری ائندی. بونلار کیشی نی گؤرنده اؤز دیللرین دئییشیب و اوخولا گئدن اوشاغینان دا باشقا بیر دیلده دانیشدیلار. کیشی بیر آه چکیب، هئچ باشین قووزامادی و تئز پیلله لری ائندی. یولدا، ماشینین ایچینده، اوغلو سوروشان سورغونو بیر داها ذهنیندن کئچیرتدی و باشا دوشدو اوغلونا یالنیش جواب وئریب. کیشی، سورغونون دوزگون جوابینا ال تاپمیشدی! فیکیر ائله دی اوغلویلا باشقالاری اوخوماق و بیلمک اوچون، جاوابی ماشینین دال شیشه سینده یازدیرسین! اونا گوره ده آخشام، ماشینی ائوه گتیرنده بئله بیر یازی دالیندا یازیلمیشدی:
وارلیق لارین دانماغا باشقا بیر شهرین نومره سی ایله ماشین آلان آداملار!!
تاپماجالار
تاپماجالار
حاضیرلایان:
حسین واحدی
ادبیاتیمیزین ان
ماراقلی بؤلوملریندن بیری، تاپماجالاردیر. ائلیمیز، بیر-بیرینین بیلگیسین اؤلچمك
ایله مشغول اولدوقلاری اوچون بیر- بیره تاپماجا دئیه رلر. آشاغیدا سیز عزیز
اوخوجولاریمیز اوچون نئچه تاپماجانی گتیرمیشیك. اونلاری اوخویوب، جاواب لارینی
دوشونون. بیلمه دیگینیز زامان، جاوابلارا باخین.
1ـ آرابا گئدر ایزی یوخ، یانار، یانار، كؤزو یوخ؟
2ـ چؤلده داغدی، پامبیق لیقدا آغدی، ائوه گلر، سویا دؤنر؟
3ـ بیری گئدر گلمز، بیری یاتار دورماز؟
4ـ او نه دیر، ایشیغی وار، ایستی سی یوخ؟
5ـ آغاجین توتماق اولماز، عطیریندن دویماق اولماز؟
6ـ بیر تندیریم وار، ایكی چؤرك توتور؟
7ـ بیر دامیم وار، تك دیركلی؟
8ـ گوندوز یاتار یووادا، گئجه گزر، اوبادا؟
9ـ نه ائوده دی، نه چؤلده، نه یئرده دی، نه گؤی ده؟
10ـ او نه دی، یئتمیش ایكی دیل بیلیر؟
11. الیم ایله اكه رم، دیلیم ایله بیچه رم؟
12. آخشام آچیلار، سحر ییغیلار؟
13ـ آچماز، اوچماز، یئره دوشسه، بئلی سینماز؟
14ـ بیر دامیم وار، قاپیسی یوخ؟
15ـ من گئدیرم، اودا گئدیر؟
تاپماجالارین جاوابی، یازینین آردیندا
سولدوز شهرینده قاراپاپاقلارین نوروز بایرام شنلیک لری
سولدوز شهرینده قاراپاپاقلارین نوروز بایرام شنلیک لری
یازان: اسفندیار سپهری نیا
شكیل: سولدوز- یئددی گؤز Sulduz - Yeddi göz
سولدوز شهری باتی آذربایجانین تاریخی و ان گؤرکملی بؤلگه لریندن بیری دیر و سؤزسوز کی رحمتلیک شهید چمران دئمه لی آذربایجانین دروازه سی سایئلیر. بو شهرده یوزه هشتاد خالقی تورک و قاراپاپاق ائلی دیر و باشقا ائللر و طایفالاردا سئوگی و سایقی لا یاشاییرلار. سولدوز اهالیسی و اؤزللیک له قاراپاپاقلاری بیر آی یاز فصلینه قالان یعنی ایسفند آییندا اؤزلرینی نوروز بایرامی نا حاضیرلاییر لار.
كور اوغلو ایله دلی حسن
كور اوغلو ایله دلی حسن
كؤچوروب حاضیرلایان: حسین واحدی
گونلرین بیر گونو كور اوغلو قیر آتا مینیب چنلی بئلین اته گینده كی یولا چیخمیشدی. بیر دسته یاراقلی-آتلی نین گلدیگی نی گؤردو.آتلیلارین قاباغیندا گلن اوغلانین اوزوندن ایگید لیك یاغیردی. آتلی لار كور اوغلونو آرایا آلدیلار. كور اوغلو،ایشین آخیرین گؤزله دی. اوغلان آتی دوز كور اوغلونونقاباغیندا ساخلادی. سونرا بیر كور اوغلویا، بیر اونون آتینا باخیب دئدی:
ـ دئ گؤروم كیمسن؟ بو یئرلرده نه گزیرسن؟
ـ كور اوغلو دئدی:
ـ یولدان كئچه نم.
ـ اوغلان دئدی:
ـ دوش آت دان! بو آت منه چاتاجاق.
ـ كور اوغلو دئدی:
ـ یولونو دوز گئت. یوخسا یاخشی اولماز.
ـ اوغلان بو سوزدن غضب لندی. حیرص له آتینین باشینی چكیب دئدی:
ـ گؤرونور، سن منی تانیمیرسان. منه دئلی حسن دئیرلر.
كور اوغلو ، دلی حسن-ین چوخ ایگید اولدوغونا باخیب، اونونلا ووروشماق ایسته مه دی. دلی حسن، كور اوغلو، اوندان قورخور، ائله بیلدی. اونون دسته سی كوراوغلویا هوجوم ائله دی. كور اوغلو ایله قیرآت اونون دسته سینی پرن-پرن ائله دی.
دلی حسن له كوراوغلو چوخ ووروشدولار. آخیردا، كوراوغلو اوجادان باغیریب، چكیب دلی حسنی یئره چیرپدی. الینی قیلینجا آپاراندا، دلی حسن آه چكدی، كور اوغلویا دئدی:
ـ من، كیم منه غالیب گلسه اونونلا دوست، قارداش اولدوغوما عهد ائله میشدیم. دلی حسن-ین بو سوزلری، كور اوغلونو سئویندیردی. او، دلی حسنی گؤتوروب چنلی بئله گلدی. او گوندن چنلی بئل قوچاق اوغول لارین، ایگیدلرین مسكنی اولدو.
