ياغيش اولماق ايسته ييرم، اورمو گؤلومه
ياغيش اولماق ايسته ييرم، اورمو گؤلومه
يازان: حسين واحدي
ياغيش ياغاندا، اوره ييم سيخيلاردي، دئمك اولار دونيا بيله مه دارالاردي، ندني، گونش اولاندا فوتبال اويناماغا واخت تاپارديق اولا بيلردي! نه يسه نه بيله يديم بير گون ائله بو ياغيش حسرت اولاجاقدير بيزه! گونشه، دايان، آزجا ياغيش ياغماغا زامان وئر دئمك ايسته ييرديم، بولودلار قاچين گونش دايانيب، سيز ياغاسيز، آغلايين، واخت قورتولماقدادير، آماندير ياز – ياي – گوز(güz) – قيش دئمه يين، آنجاق ياغيش ياغديرين...
سئومك آنلاميني بو دويغولار منه وئرديلر. هئچ نه يي يارادانيمدان سونرا بو قدر سئوه بيلمه ميشديم، هئچ نه يي بو قدر دوشونمه ميشديم، هئچ نه يه بو قدر نيسگيل ائتمه ميشديم...
يارادانيم! سن، ايشيق وئرن كيتابيندا هر ندن چوخ، «من، باغيشلايان و ياخشيليق ائده نم» دئييبسن و منده بونا اينانيرام، سن سونسوز سئوگيندن و اوجسوز – بيجاقسيز ياخشيليغيندان بيزه باغيشلاياجاقسان، بيليرم...
ياغمور، نه اولار دايانمادان، ياغ، بوتون كدريمي سن آلماليسان، سئوگيمي منه قايتارماليسان، جانيما جان قاتماليسان...
ياراداينم، بولودلار، ياغمور، اينسانلار، يارانيش لار و بوتون جانلي و جانسيزلار دويون و آنلايين منيم اورمو گؤلومو...
يارادانيم؛ بوتون سئوگينله قورو سئوگيمي. ياغ ياغيش؛ هئچ دايانما، گؤلوم سني گؤزله يير. گونش؛ چيخما هئچ. بولودلار؛ يولو آچين، گلين يوردوما، آغلايين، اؤلو اورمو گؤلومه!!
آشنايى با زبان تركى خراسانى
كيتاب تانيتيمى (آشنايى با زبان تركى خراسانى)
حسين واحدى/ نئچه واخت بوندان قاباق، خوراسان توركلريندن اولان، عزيز اسماعيل سالاريان-ين وبلاگيندان، بير دگرلى كيتاب ايله تانيش اولوب، اونو يازان ايله علاقه قوروب، كيتاب لار اليمه يئتيشدى. منيم اوچون خوراسان توركلرين دن بيلگى اله گتيرمك چوخ ماراقلى ايله دگرلى ايدى. بو كيتابين آدى «آشنايى با زبان تركى خراسانى» دير. كيتاب، عزيز قارداشيم، اوستاد «جلال قلى زاده مزرجى» بگين الى ايله يازيليب دير.
قلى زاده جنابلارى، كيتابى ساده و آخارلى ديلده، آلتى بؤلومده يازيب دير. ايلك بؤلوم ده، ديل ايله يازماغين ايلگيسيندن سؤز گئديب. ايكينجى بؤلوم ايسه، تورك ديلينين كئچميشى ايله خوراسان توركجه سيندن يازيليب دير. اوچونجو بولوم ده، ساده ديلده قايدالار آچيقلانيب دير. دؤردونجو بؤلوم ده، سؤزجوك لر يئرلشيبلر. بئشينجى بولوم ده ايسه، ائيلمليك لر (مصادر) ايضاح ائديليب دير. سون بولوم ده، خوراسان توركجه سينده اولان بعضى آتا-بابا سؤزلريندن اوخوجولار اوچون اؤرنك گتيريليب دير.
يئرى وار «قلى زاده» جنابلاريندان بو تايسيز و دگرلى ايشى اوچون اؤز تشككورومو بيلديرب، بو عزيز قارداشيما اللرين وار اولسون دئيم. بو كيتابى، خوراسان دا، «دامينه» ايله «واسع» يايين ائولريندن، باشقا شهرلردن ايسه يازيچى ايله بيرباشا ايلگى قوروب، پست واسطه سيله، الده ائده بيلرسينيز.
قلى زاده جنابلارينين ايميل ايله تئلفون سايى سى:
qolizadehmezerji@yahoo.com
09379081183
Urmiyə başqa baxışdan... اورميه باشقا باخيشدان
شكيللر: حسين واحدى
şəkillər: Hüseyn vahidi
 |
اورميه- (جامع) جمعه مسجدى |
تراختور-ون يئنى ماهنى سين يوكله يين
تراختور-ون يئنى ماهنى سين يوكله يين
گل-گل، محمد رضا رحيم پور-ون سسى ايله
Tiraxtur yığmasının yeni mahnısın yükləyin
oxuyan: Məhəmməd riza rəhim pur
  |
بو ماهنى نى همراه اول ده پيشواز آهنگ سئچمك اوچون ماهنى كودو:
- آدى: گل گل تراختور
- اوخويان: محمدرضا رحيم پور
- كد: 30362
اوشاق لاريميز و آذربايجان ناغيل لاري
حسين واحدي
هاميميزين اوشاق ليغيندا، ناغيل خاطيره لري واردير و بؤيوك اولدوغوموزدادا او گون لري خاطيرلاياندا گؤزل دويغوسال آن لار (لحظه لر) ياشاديريق. او دؤوراندان الوان خاطيره لريميز قالير و بو خاطيره لرده او زامانين ناغيل لاريندان آلينيب دير. عيبرتلي و فايدالي ناغيل لاريميز اينديده قولاق لاريميزدا سسلنمكده دير. آمما اينديكي اوشاق لار بئلنچي ناغيل لاردان اوزاق قاليبلار.
آتا- آنالاريميزدان اوشاق ليق لاريندان سوروشاندا، او زامانين تندير داملاريندان، كورسو باشيندان و ناغيل سؤيله مه لريندن دئيه جكلر و او گون لردن سؤز آچماق دا، اونلارا ياخشي لحظه لر يارادير.
چئشيتلي ائشيتملي آذربايجان ناغيل لاري، گئتديكجه اونودولوب گئتمكده دير و نسيلدن نسيله گلن او عيبرتلي ناغيل لار كولتوروموزون بير بؤلومو اولاراق، اونودولوب گئديرسه كولتوروموزده آرادان گئده جك دير. ايندينين اوشاق لاري باتي (غرب) اؤلكه لرين ناغيل لارينين بير- بير آدلارين ساييب قهرمان لارين دئييرلر و بو ايش گئتديكجه اوشاق لا اؤز كولتورونون آراسيندا آرا آچيب اؤزگه كولتورونه ياخينليق دويغوسونو ياراداجاق دير.
قاباقجالار عاييله نين بؤيوك آتا يوخسا آناسي، اوشاق لاري بير يئره ييغيب اونلارا ناغيل سؤيله رديلر. اوشاق ايسه او ناغيل لاردا اؤزونو ناغيلين قهرمان لارينين يئرينه قويوب درين بير خييالا جوماردي. آنجاق بو ناغيل لار اؤزوموزون ايديلر و قهرمان لاريدا بيزيم قهرمان لارييديلار. زيرناچي ناغيلي، پيس پيسه لي پوسته خانيم، قوردون ناغيلي، گؤزل فاتما ايله ساري اينك، تولكو ايله قارغا، يالانچي چوبان، ... و مين لرجه بئله گؤزل ايله ائشيتملي ناغيل لاريميز اؤز يئرلرين، بيزيم كولتوروموز ايله غريبه اولان و ساواشجيل باتي ناغيل لارينا وئريرلر.
تلويزيون ايله راديودادا بو ناغيل لار اؤز يئرلرين ايتيريب لر و يئرلرينه يابانجي اؤلكه لرين كارتون لارين گونو گوندن داها چوخ ياييرلار. اوستاني شبكه لر بو قونودا اؤنملي رول اويناييرلار و آنا ديليميزده اولان ناغيل لارين كارتون لارين توركجه ده دوزلديب اوشاق لاريميزا گؤسترمكده كئچميشدن قالان گؤزل ناغيل لاريميزيدا ديري ساخلايا بيله جكلر.
آتا- آنالار ايسه بو ناغيل لار ايله تانيش اولوب اونلاري گله جك نسيل لره تاپشيرماليديرلار. بونلارين يانيندا اوشاق لار باخچالاري ( مهد كودك لري) داها مهم نقش ايفا ائديرلر. اوشاقلارين چوخو اوشاق واختي بو يئره گئديرلر و اورادا رسمي ديليميزين يانيندا اوشاق لارين آنا ديللرينين ديري قالماسي و كئچميشدن قالان كولتوروموزو ديري ساخلاماليديرلار و فايدالي و تجروبه لي آذربايجان ناغيل لارين سؤيله مكله گله جك نسيل لره بؤيوك قوللوق ائده بيلرلر.
ناغيل لاردا ايسلامي و ايراني (هر بولگه ده اؤز ديل لرييله) كولتوروموزه يئر آييريب بو روحيه ني اوشاق لارا وئرمه لييك. ناغيل عؤمور وار كن اوشاغين ذهنينده قالير و اوشاق اؤزون او ناغيل لار ايچينده ياشادير. چوخلو اوشاق لار نصيحتدن قاچارلار و بونا گؤره چوخلو سؤزلري ائله بو ناغيل لارلا اوشاق لارا دئيه بيله ريك و اوشاغا نصيحتيده ناغيل عونوانيندا چاتديرا بيله ريك.
اينسان اوغلو، ائشيديرسنمى؟
اينسان اوغلو، ائشيديرسنمى؟
يازان: حسين واحدى
اى اينسان اوغلو، نه ائديرسن، نه يى دوشونورسن؟ نه يى كيمه وئرمك ايسته ييرسن؟ نه يى كيمدن آليرسان؟ اؤزونه دؤن، اينسان اول! اينسان ياشا! آدينى اينسان قويوبسان، باريشى ايسه يالنيز كاغيذ اوسته يازيرسان!
بورا فلسطين دير، گؤزل بير اؤلكه، باريش ايسته يير، اينسان اوغلو گؤروسنمى؟ بورا ايسه قاراباغ دير. جننتين بير بوجاغى. يئنيدن چيچكلنمك ايسته يير. اؤز وارليغى آذربايجان لا، بيرگه ياشاماق ايسته يير، اينسان اوغلو سورگون لرى گؤرورسنمى؟ كؤرپه لرى، ياشلى لارى، قادين لارى،گؤرورسنمى؟
بورا عيراق دير، بورا، افغانستان، بورا كئشمير، بورا آفريقا، بورا اورتا دوغو، بورا دونيا دير. اينسان لار باريش ايچينده ياشاماق ايسته ييرلر. اينسان اوغلو آنلاييرسانمى؟
ياشام
ياشام
يازان: حسين واحدى
ياشام(1) گؤزلدير.
اينسانلار اونو، چيركينلشديرمك ايسته ييرلر.
ياشام، سئوگي دير.
اينسانلار نيفرت آختارماق ايسته ييرلر.
ياشام آخار سو كيمى دير، ترسينه يئريش ائتمك اولماز.
اينسانلار ترسينه يول گئتمك ايسته ييرلر.
ياشام تيكانلي بير قيزيل گول كيميندير.
اينسانلار اونو قيزيل گولسوز، بير تيكان ائتمك ايسته ييرلر.
ياشام، سسي خوش بير بولبولدور.
اينسانلار اونو، لش يئين، ائتمك ايسته ييرلر.
ياشام، ياكاموز كيمي دير.
اينسانلار اونو قارالاماق ايسته ييرلر.
ياشام، باريش دير.
قارداشليق دير.
بيرليك دير.
اينسانلار، اوندا، آيريليق لا، دوشمنليك آختاريرلار.
ياشام، ياشاماق دئمك دير.
اينسانلار ايسه اؤلومو ايسته ييرلر.
اينسانلار ايسته ييرلر...
------------------------------------------------------------------------
(1) ياشام: ياشاييش، ياشاماق
AzConvert
Az
convert بيلگى سايار آراجى ايله، لاتين اليفباسى نى، عرب اليفباسينا و
ترسينه چئويره بيلرسينيز. بونون يانيندا كريل اليفباسيدا واردير. اومود
ائديرم يارارلاناجاقسينيز.
AzConvert
is a free open source transliterator for Azerbaijani language.
Transliteration
- Latin script --> arabic script
- Arabic script --> Latin script
- Cyrillic script --> Latin script
Download
Linux and Mac users can checkout the SVN repository and build the sourcecode themselves using Qt tools.
فتحي آوشار، سارايي
شكيل ايله يوراج (yorac /گزارش) : حسين واحدى
آتا
آتا
يازان: حسين واحدي
هر بير اينسانين آرخاسي، قوللاريميزين توم گوجو، اورگيميزين اورگي،كرال لار- كرالي، آتادير.
گئجه- گوندوزون يوخ ائدير. عايله سي ايسه شن ياشايير. جننت ايسه آنالاريندير!
آتا، بوتون دونيانين پاديشاهيدير. دونيانين كؤكو بيزيمده اولسا، «يئنه سولطان آتادير.»
آتا، گوجدور، باشا تاج، قلبه فرحدير. او حورمت دير، كيشيليكدير، تومجه لره (جمله لره) گلمه ين بير ديريليك دير.
آتا شرفدير، شؤوكتدير، زيروه دير، ربّ دير. آتا بيزي دونيايا پاي وئرن ان قيمت لى ملك دير.
آتا، آتادير...
