حكايه‌جيك‌لر
حكايه‌جيك‌لر/ حسين واحدي
شانس‌سيز اوغرو
گئجه‌نين لاپ او شيرين يوخو گلن زاماني، دووارين ياپيشيغينداكي آغاجدان ديرماشيب ائوين حيطينه آتيلدي. سينه-سينه ائوه ساري گئديب، الين ياپيشاجاغا آتيب قاپينين آچيق اولدوغونو گؤروب، سئويندي!
ايچه‌ري گيرنده، بير كيشي‌نين اوتاقدا يوخودا اولدوغونو گؤردو. آي‌ين ايچه‌ري‌يه دوشن ايشيغيندا ائوي آلت-اوست ائتدي، آما آپارماق اوچون درده ده‌ين بير زاد تاپا بيلمه‌دي. اومودو پوزولوب قاچماق ايسته‌ديگي آن، ائو ييه‌سي يوخولو-يوخولو، “آي باشي داشلي اوغرو گون ايشيغيندا من بو ائوده بيرزاد تاپا بيلميرم، سن، آي ايشيغيندا تاپماق ايسته‌ييرسن؟” دئييب، يورقاني تپه‌سينه چكدي!
گونش ايله گونه‌باخان
ساري ساچلي گونش، گؤيه ديرماشميش داغلارين آرخاسيندا، خوروزون بانلاماسيني گؤزله‌ييردي. آخشامدان، بوغدا تارلاسيندا اولان يالنيز گونه‌باخان ايسه قارا دنه‌لريني گونشين باتان يئرينه توتوب، گونشي گؤرمك اوميدي ايله يوخلاميشدي.
بير آزدان، خوروز، سسي‌ني باشينا آتدي. كند ائولرينين چيراق‌لاري بير-بير ايشيقلاندي. گونش گؤزله‌دييي آني گؤرونجه دوغماغا باشلادي. گونه‌باخان، سئوينجك اولوب، اوياندي. سئودييي گونشي بيرداها گؤره بيله‌جه‌يينه چيچه‌يي چارتلادي…
آرتيق، گونش گؤي اوزونده، هر ياني باخيشي آلتينا آلميشدي. گونه‌باخان، گونش بونون اوچون گليب‌دير دئيه، اوزون اوندان چئويرميردي. او، اوچوب گونشين يانينا گئتمك آرزوسوندايدي.
ياواش-ياواش آخشام گليب چاتيردي. گونش يئره سردييي ساچلاريني داراييب، هؤرمه‌يه باشلاميشدي. گونه‌باخان ايسه گونشين گئتمه‌سيندن اوزولوردو. او، بيليردي بير آزدان گونش باتي‌داكي اوجا داغين آرخاسينا گئديب يوخ اولاجاق‌دير…
گونش، گئتدي! آنجاق هئچ بيلمه‌دي گونه‌باخان‌نين آدي‌دا اونون آديندان آلينيب‌دير. او هئچ بيلمه‌دي، گونه‌باخان بوتون ياشاييشيندا اونون سئوگي‌سي ايله ياشادي!
قورخولوق
آخشام اوستو كئچن گونلره تاي، قارغالار، اوزوم باغينا هجوم چكديلر. كئفلري چكينجه اوزوم يئييب باغي كورلاديلار.
قورخولوق آنلاملي سس‌سيزليك له، باغين اورتاسيندا اونلارا باخيردي. اليندن بير ايش گلميردي، او ساده‌جه اؤز گله‌جه‌ييني دوشونوردو! دونن آخشام، باغ ييه‌سي، باغدان آيريلاندا، «صاباح‌دا گليب گؤرسم قارغالار، باغي كورلاييب، قورخولوغو يئريندن چيخارديب، يانديرجايام» دئميشدي!
بونلاري دوشونه‌رك، قورخولوغون اوره‌يي دولوب، خيمير-خيمير آغلاماغا باشلادي!
سعدي شيرازي‌نين آذربايجان توركجه‌سينده غزلي وارميش
سعدي شيرازي‌نين آذربايجان توركجه‌سينده غزلي وارميش
حاضيرلايان: حسين واحدي
فيلولوگيا[ديل تانيما] علم‌لري دوكتورو، پروفئسور شاميل جمشيدووون “علم و حيات” ژورنا‌لي‌نين 1987-جي ايل 10-جو ساييندا درج ائديلميش “سعدي شيرازي‌نين آذربايجان توركجه‌سينده بير غزلي” يازي‌سيني و همين غزلي تقديم ائدير.
XIII [13-جو ميلادي] عصر فارس پوئزياسي‌نين[شعرينين] بؤيوك كلاسيكي مصلح‌ددين شئيخ سعدي شيرازي‌نين اثرلريني آذربايجان اوخوجولاري هميشه بؤيوك ماراقلا اوخويورلار. حتي بير زامان‌لار شاعرين مشهور “گولوستان” كيتابي مكتب و مدره‌سه‌لريميزده درس‌ليك كيمي تدريس اولونموش‌دور. بو ياخين‌لاردا ال‌يازما‌لار خزينه‌سين‌دكي قديم جونگ‌لر و توپلولار اوزرينده آراشديرما‌لار آپاراركن شاعرين XVIII [18-جي ميلادي]عصرده يازيلميش نادير بير غزلي دقتيميزي جلب ائتدي. باشليقدا “كلامي شئيخ سعدي شيرازي” يازيلميش، سون بئيتي “سعدي” تخللوصو ايله قورتاران بو غزل آذربايجان توركجه‌سينده يازيلميش‌دير. اثرين ترجومه و ياخود اوريژينال اولماسيني گؤسترن هئچ بير قئيد و علامت يوخدور.
او قوشلارين گوناهي نه؟
او قوشلارين گوناهي نه؟
يازار: حسين واحدي
وورورسان، چاليرسان، چاپيرسان، هرياني بير- بيرينه قاتيرسان، يئري گؤيه، گؤيو يئره ياخيرسان، مقصدين اؤز هدفينه چاتماق‌دير، بونو ياخشي بيليريك. شيميايي بومبالارلا، اينسانلاري قان‌لارينا بله‌ييرسن، ندن؟
چونكو سن ساده‌جه اؤزونو گؤرورسن، اؤزونو! بونو گؤرمه‌يي، اينانماغي، قبول ائتمه‌يي ده ايسته‌مه‌ييرسن!
هميشه ساواش پئشينده اولورسان، باريش سوزو سنين سؤزلوكونده يوخدور كي. سن، سنه اينان اينسانلارلا بيرگه دونياني محو ائتمه‌يه چاليشيرسان. نييه؟
چونكو سن او بئش گونلوك شاهليق تختيني گؤرورسن. آل دونياني وئرديك سنه. گؤتور تاجي-تختي! سنين اولسون. سن بيزي ايلك گوندن جنت‌دن ائشيگه سالديردين، آلداتدين، ياساقلانميش مئيوه ايله تاماها سالدين. ايندي ايسه قودرت آدي ايله آلداتماغا چاليشيرسان!
آي سيفليس شئيطان! سنه آلدانانلارا واي اولسون! واي!
سن مقصدينه چاتماق اوچون هرنه‌يي اؤزونه پيلله ائديرسن، بونو بيلن-بيلير! بيلمه‌ين لره واي اولسون. آر اولسون اينسان آديني يدك چكيب سنه قوللوق ائدنلر آر اولسون آر.
سن هر نه ائديرسن ائت، آما بير لحظه دوشون گؤرك، او قوشلارين گوناهي ندير؟ اونلار ندن قوربان اولورلار، سنين اينسانلاري هلاك ائتمه‌يينين يولوندا؟
واختين خئير آللاهيم
واختين خئير آللاهيم
يازار:حسين واحدي
سلام آللاهيم، هر واختين خئير اولسون، يئنه اوره‌ييم داريخدي و يئنه سنه گلديم آللاهيم، اوره‌ييم چوخ دولودور، يامان كيمسه سيزله‌ييب، يئنه سؤزلريمي دئمه‌يه كيمسه تاپا بيلمه‌ييرم، ياني دئمك اولار، كيمسه يوخدوركي! آللاهيم دئديگيم كيمي اوره‌ييم چوخ دولودور، چوخ!
اينسانلاردان چوخ داريخميشام، كيمسه‌يه نه قدر ياخشيليق ائديرم، عوضينه پيسليك گؤرورم، نه قدر چاليشيرام بو پيسليك‌لره قارشي اولوب عوض آچام ائده بيلمه‌ييرم و گئت- گئده بو اينسانلار اوره‌ييمي داها چوخ سينديريرلار، آللاهيم نه ائديم، نه ائتمه ييم، قالميشام، اؤزون كؤمك اول، سندن سونرا كيمه گيلئيله‌نيم، كيمه دئييم سؤزومو، كيمه آچيم اوره‌ييمين سوفراسيني؟!
آللاهيم چوخ سئويرم هامي‌يا فايدالي اينسان اولام، ياخشيليق ائدم، الدن توتام، دؤزملو اولام، سينمايام، هرآن ياشايام و ياشاماقدان داد چيخارام، سنه يالواريرام آللاهيم سندن سونرا كيمسه منه يارديم ائده بيلمز.
اومود وئر منه، گؤزل حيات، صالح اؤولاد، غم‌سيز ياشات، اوغور يارات، اينسانليغي- باريشي چوخات، آللاهيم- آللاهيم، آنجاق فقط سندن ايسته‌ييرم، گؤزل حيات، گؤزل حيات.
ياغيش
ياغيش
يازار:حسين واحدي
آيين‌شايين، هاوا چاخدي. بولودلار ديسكينيب آغلادي.
Yağış
yazar: Hüseyn vahidi
خاطيره‌لري سرميشم ياغيشا
خاطيره‌لري سرميشم ياغيشا
گولناره ايلهام‌دان منثور شعر
كؤچورن: حسين واحدي
يادلاشماق‌دان قورخدوقجا قورخولاري يادلاشديرديق...
زاماني عقرب‌لردن اوغورلاديق.
گوناه يازماغا باشلاديق هر ساعتيميزا.
بير واخت بوغازيميزدا دوگونله‌ييب آزادليق‌دان محروم ائتديگيميز سؤزلري آزادليغا قوووشدوردوق.
داها هيجانلانيب تيترمه‌دي اللريميز. يوخ، عادي‌لشمه‌ديك. سئوگي‌نين آديني قويدوق ساده‌جه.
ساغول‌لاريميزين عؤمرو قيسالماغا باشلادي. هله‌ليك‌سيز بيتيرديك هر تئلئفون زنگيني. چوخ خبيس اولدوق. سالامات قال سؤزونو ده قييماديق بير-بيريميزه.
سوسا‌راق آييرديق بيزي.
لال سوكوت‌لاري سونونجو اوميدلر بيلديك.
ايندي ياغيش ياغير. من ايسه خاطيره‌لريميزي او ياغيشين آلتينا سرميشم.
زامان قازان‌ديريرام اونلارا، عؤمرونو اوزاتديغيمي سانيرام بلكه.
بير واخت سيخيب قوروداجاغام اونلاري... سون داملاسينا قدر...
هله‌ليك...
زامانين ايچينه آتيرام سني...
زامان‌سيز گلن بختيم...
آموزش زبان تركي آذربايجاني با اس ام اس همراه اول
اوروجلوق بايرامينيز موبارك اولسون
عالم گؤزل
عالم گؤزل...
يازار: حسين واحدي
تانريم،
منه دينجليك وئر، سئومك، الدن ياپيشماق، اؤز گوونج، يولداشليق، باريش سئورليك و بوتون گؤزليك‌لري وئر...
بوتون اينسانلاري سئومك ايسته‌ييرم، باريشي، گؤزل‌لييي اونلارلا پايلاشماق ايسته‌ييرم...
عزيز تانريم، نه گؤزل اولار بئله ياشام،
يولداش اولوب، باريش ايچينده ال- اله وئريب سئوينج له ياشاياق...
اوشاقلاري سئوك، سينيرلاري قالديراق، اوركلره ايشيق ساچاق، كيمسه‌يه ضرر وئرمه‌ييب، الدن توتاق، بير-بيريميزه گولمك يئرينه، بيرگه گولك، سئوينجي بوتون گؤيه، يئره سه‌رك...
عالم گؤزل، حيات گؤزل، سئونلرين گؤزلرينده...
"صباحي" ايلليك اؤيكو اؤدولو
"صباحي" ايلليك اؤيكو اؤدولو(بيرينجي ايل-1392)
SABAHI SHORT STORY AWARD :2013
اؤدول: بير ميليون تومن (بيرينجي اؤيكو اوچون)
(ايلك اون اؤيكو اوچون ياديگارليق هديه و تقدير لؤوحه سي وئريله‌جك.)
- اثرلرين گؤندرمه مؤهلتي: 31 شهريور 1392
- ياريشمانين سونوجو اعلان ائديلن گون: 1 آذر 1392
- اثرلر آذربايجان توركجه‌سينده و عرب اليفباسيندا يازيلمالي دير.
- هر يازيچي بير اثر گؤندره بيلر.
- اثرلرين ايندي‌يه‌دك باشقا يئرده (كيتاب، درگي، سايت) چاپ اولونماماسي گركلي دير.
- حيكايه لر word دا تايپ اولونوب بو آدرسه گؤندر مه لي دير: sabahi.odulu@gmail.com
- اثرله بيرليكده اؤزونوزدن بير قيسا بيوگرافي گؤندرين.(شكيلينيز، تيلفون نومره نيز اونوتولماسين)
- ايلك اون حيكايه بير كتابدا چاپ اولونوب ياييلاجاق.
آرتيق بيلگي اوچون بوراني تيكلايين
