منيم اورمو گؤلوم!
منيم اورمو گؤلوم!
گؤلوم نه اولار قورما، سنينله، خاطيره لريم وار، سنينله ياشاميشام، من
سن اولموشام، سنده من!
يوردومون بركتي، آبيريسان سن،نه اولار قوروما..
داريخان گونلريمي،سنين يانينا گليب،سنينله پايلاشميشام،شنليك گونلريمي ايسه گليب سندن آپارميشام،
نه اولار قوروما..
سنينله هاراي چكيب باغيرميشام اينسانلار سيزين هر نه يينيزده وارسا،منيم دوزلو اورمو گؤلوم وار،
نه اولار قوروما..
شهريمه،گونشي سن وئريبسن، سنده گونش باتماييب، باتماياجاق، سن گونشي دوغورسان،..
نه اولار گؤلوم قوروما گؤلوم..
سن قوروسان، بوتون اوشاقليغيم ايته جك! خاطيره لريم پوزولاجاق! شنليك بوردان قاچاجاق!
داريخمالار دام-دوواردان آشاجاق!سنجه آبير-حيثيت مي قالاجاق؟!..
آرخاميز بوشالاجاق،آرتيق هاراي لار اوركلرده ياتاجاق،قارانليقلار شهريمه دولاجاق...آرتيق بوردا گونش ده دوغولماياجاق...!!
نه اولار اورمو گؤلوم قوروما..!
يازان : حسين واحدي
تاپماجالار
تاپماجالار
حاضيرلايان:
حسين واحدي
ادبياتيميزين ان
ماراقلي بؤلوملريندن بيري، تاپماجالاردير. ائليميز، بير-بيرينين بيلگيسين اؤلچمك
ايله مشغول اولدوقلاري اوچون بير- بيره تاپماجا دئيه رلر. آشاغيدا سيز عزيز
اوخوجولاريميز اوچون نئچه تاپماجاني گتيرميشيك. اونلاري اوخويوب، جاواب لاريني
دوشونون. بيلمه ديگينيز زامان، جاوابلارا باخين.
1ـ آرابا گئدر ايزي يوخ، يانار، يانار، كؤزو يوخ؟
2ـ چؤلده داغدي، پامبيق ليقدا آغدي، ائوه گلر، سويا دؤنر؟
3ـ بيري گئدر گلمز، بيري ياتار دورماز؟
4ـ او نه دير، ايشيغي وار، ايستي سي يوخ؟
5ـ آغاجين توتماق اولماز، عطيريندن دويماق اولماز؟
6ـ بير تنديريم وار، ايكي چؤرك توتور؟
7ـ بير داميم وار، تك ديركلي؟
8ـ گوندوز ياتار يووادا، گئجه گزر، اوبادا؟
9ـ نه ائوده دي، نه چؤلده، نه يئرده دي، نه گؤي ده؟
10ـ او نه دي، يئتميش ايكي ديل بيلير؟
11. اليم ايله اكه رم، ديليم ايله بيچه رم؟
12. آخشام آچيلار، سحر ييغيلار؟
13ـ آچماز، اوچماز، يئره دوشسه، بئلي سينماز؟
14ـ بير داميم وار، قاپيسي يوخ؟
15ـ من گئديرم، اودا گئدير؟
-----------------------
جاوابلار يازينين آرديندا ....
توركجه ميزي قوروماق، آناديلي بورجوموزدور
توركجه ميزي قوروماق، آناديلي بورجوموزدور
يازان: حسين واحدي
اولو يارادان، اينسانلاري ياراداندا اونلارين دانيشديقلاري اوچون ديلي پاي وئريب و اينسانلارلا حئيوانلاري فرقلنديريب دير. بيز موسلمانلارين قوتسال كيتابي، قورآن-دا ايسه بو ديل لر تانري-دان بير بَليرتج (نشانه) اولاراق گؤسته ريليبدير. بللي اولدوغو كيمي ديل تانري وريندن، چوخ اؤنملي ساييليب و يوكسك يئره صاحيب دير.
بوتون ديللر گؤزل دير و يئرينده هاميسينا دَير وئريب اونلاري قورويوب ساخلاماق بيز اينسانلار اوچون آغير گؤرَودير(وظيفه)–دير. بونون يانيندا هر اينسانين اؤز آنا ديلي داها فرقلي و اؤنملي ساييلير. اينسان اؤز آنا ديلينده دويغولاريني اوزه چيخاريب، اونلاري ياشادير. آنا ديليني بيلمه ين اينسان ايسه اؤز آنا ديلينده اولان دويغولاردان اوزاق قالاراق، اؤزگه دويغولاري ايله ياشاياجاق دير!
اينديكي چاغيميزدا آنا ديلينين يانيندا، هر اينسان دونيانين باشقا ديللريندن، بير- ايكي سيني ايسه باجاراندا، دونيايا نئچه آچي-دان و نئچه يؤن-دن باخا بيليب و نئچه اينسان ساييلير. آمما آنا ديلين بيلمه ين ايسه، اون ديل بئله بيلسه ده، ظولوم آلتيندا ياشايير. آنا ديلي بير اينسانين وارليغي ساييلاراق اونو بيلمه ين اينسان، اؤز وارليغيندان اوزاق دوشه رك، آنا ديلينده اولان بوتون دويغولار ايله گؤزلليك لردن محروم قالير.
دونيانين او بيري اينسانلارينا تاي بيزم ده، اؤز آنا ديليميز واردير. بيزيم آنا ديليميز اولان توركجه (آذربايجان توركجه سي)، دونيانين گوجلو، گؤزل، قايدالي و دَيرلي ديللريندن ساييلاراق، ياشاماقدادير. بيز ايسه اونو ياشاتماليييق. اؤنجه اؤلكه ميزين قانونوندان فايدالاناراق، اونو اوخول-لار ايله بيليم يوردلاردا ديري ساخلاماق ان واجيب اولان دير و بودا رؤيالاردان اوزاق قالان بير زاد دئييل دير. ايسلامي اؤلكه ميزده بو ايمكان وار و تئز-گئج ياراناجاق دير و بو ايشله تانري وَريندن وئريلن پاي-ا يييه (صاحب) چيخاجاييق.
اونون يانيندا اينديكي دورومدا، يئتيري (رسانه)-لرين هاميسيندا، اؤزلليك له راديو-تلويزيون دا، توركجه ميزي تميز و دوزگون دانيشماق ايله، ديليميزه بير آيري يارديم ائده بيله ريك. تأسفله بو ايكي يئتيري (رسانه) ده، اؤزلليكله اوستاني شبكه لرده (آذربايجان تورك لري ياشايان اوستان لارين شبكه لرينده) توركجه ميزه هر ديلدن بير آز قاتيب يئني بير ديل ياراديب لار و يقين اولاراق كوتله نين ده (مردم) دانيشيغيندا تأثير قويولور.
گؤزل توركجه ميز راديو-تلويزيون دا دوغرو-دوزگون و تميز دانيشيلسا، يوزده-يوز كوتله نين ده دانيشيغي دوزگون توركجه اولاجاق دير. جمله نين سونوندا تكجه بير توركجه فعل گتيرمه يه، توركجه دانيشماق دئمزلر!! گركليدير بونا چوخ دقت ائديب ديليميزين آرادان گئتمه سينه يارديم ائتمه يك. اينديكي وضعيت ده توركجه كيتاب لار ايله نشريه لردن ايسه فايدالانا بيله ريك. بو ايشله هم اونلار آياق اوسته قالار همده توركجه ميز ياشايار.
اؤزوموز ايسه دانيشيغيميزا دقت ائتمه ليييك، نه زامانادك ديليميزه خور گؤز ايله باخا جاييق؟ ندن توركجه دانيشاندا جمله ميزين چوخونو باشقا ديلده دئييريك، بودا كيلاسمي؟ منجه كيلاس و افتخار، توركجه ميزي دوزگون دانيشماقدادير. پيس عادت لريميزدن بيري عددلري، بويالاري و... باشقا ديلده دئمك دير. تورك، توركجه!! دانيشاندا اؤلكه ده ياشايانلارين هاميسي نه دانيشديغيني آنلايا بيلير و اودا توركجه ميزه هر ديلدن قاتماسي ندني (سببي) دير. همن آدام باشقا ديلده دانيشاندا چاليشير هم تميز، همده لهجه سيز دانيشسين!! و بيري بيلمه دن آيري بير ديلين كلمه سين او ديله قاتاندا، ايش گولمه يه چكير!
ديليميزين آرادان گئتمه سي ائله بو عددلر ايله بويالار و جمله ميزده تكجه توركجه بير فعلي ايشلتمك دن باشلايير، نه زامانا كيمين، بير-بيريميزه، واز گئچ نه اولاجاق -دئيه جه ييك؟ دوروم بئله گئديرسه، ساباح ديليميزدن قورو بير آد قالار!!
ديليميزي قوروماق ايسته ييريك سه، بوتون دَيرلي يازيچيلاريميز، تميز و توركجه قيرامئرينده يازماليديرلار. ان اؤنملي سي، كه/كي، اگر، چونكي، آيا و... كلمه لريني قوللانماق لا ديليميزه آغير بير ضربه وورماغا داوام ائديريك. آمما اونلاري ديليميزدن آييرماق لا ديليميز داها گؤزللشه جك دير. بو ايش ايسه يازيچيلاريميزين وظيفه سيني آغيرلادير. اونلار توپلومون آيديني اولاراق، ديليميزي جانلي و تميز ياشاديب، ساخلاماسي اوچون داها چوخ چاليشيب، زحمت چكمه ليديرلر.
ديليميزي ياشاتما، يئرلرين بيري ايسه اينترنت دير. وبلاگ لار ايله سايت لاريميزدا توركجه ميزه اؤزل يئر وئريب اونو قوللانماق لا بير آيري يارديم ائده بيله ريك.
بو قيسا يازيدا ايسته ييم آنا ديليميزي قوروماغي خاطيرلاتماق دير و هر بير آذربايجان توركونه اؤز ديليني قوللانماق و اونو ياشاديب گله جك نسيل لريميزه ساخلاماق، آنا ديلي بورجودور. اومود ائديرم ديليميز ياشام بويو ياشاياجاق دير.
نوروز يوخسا اوغوز؟
نوروز يوخسا اوغوز؟
يازان: بهرام اسدي
نوروز بايرامي ائللريميزين آراسيندا اسگي زامانلارين يادگاري اولاراق هله ده داوام ائتمكدهدير. بو بايرام طبيعتين جانلانماسي و چؤل-چمنين يئنيدن ديريلمهسيايله علاقهداردير و بونونلا اويغون ائل آراسيندا مختلف دبلر و رسملر يارانيبدير. طبيعت جانلانيرسا و اؤز دونون دگيشيرسه ائللريميز ده بو بايرامدا اؤز دونلارين دگيشيرلر و كيچيكلي - بؤيوكلو تزه پالتار گئييرلر و اؤزلرين طبيعتايله اويغون ائديرلر. آذربايجان و عموم حالدا تورك ائللرينين بو دون دگيشمهلري يالنيز پالتاردا دگيل اونلارين معنوياتيندا دا اؤزون گؤسترير و دئمك قبيلهلريميز هم جسمي هم ده معنوي پالتارلارين دگيشيرلر و بوتون داورانيشلاريندا بو بايرامين تأثيري آيدين گؤرونور.
بايرامدا كوسولولر باريشير. اوزاق دوشنلر يادا دوشور و كين - كدورتلر گؤتورولور و بو معنوي پالتارين دگيشمگينه بير تظاهردور. بايرامدا بؤيوكلر ايله گؤروشمك واجب ساييلير بو ايسه ائللريميزين آراسيندا بؤيوكلره اولان حؤرمتين قاباريق بير تظاهرودور. اسگي تورك ائللري آنجاق قوجالار و آغ ساققاللارين رأيي و نظري ايله اداره اولونارميش .
تاريخي و جغرافي جهتدن باخيليرسا طبيعت ايله علاقهدار ايل بايرامي يا خود نوروز بايرامي بوتون تورك ائللرينين آراسيندا مختلف مراسملر ايله كئچيريليبدير و كئچيريلير. ايندي گؤرهك نهدن اونون آدي فارسجادير؟ نوروز يئني گون دئمكدير و فارس اساطيرينه گؤره بو بايرام جمشيد شاه-ين آذربايجانا اولان سفري زاماني يارانيبدير و همين فارس اسطوره سينده ده بو بايرامين آذربايجاندا يارانديغينا دامغا وورولور و تأييد اولور. بس، آذربايجاندا و تورك ائللرينده يارانان بير بايرامين آدي فارسجا اولماسي نئجه اولار ؟
بورادا تورك اساطيرينه باخماغيميز گركير: تورك و آذربايجان اساطيرينده نوروز بايرامي دگيل اوغوز بايرامي گؤرسنير و بو بايرام آذربايجان توركلرينين افسانهلره قوووشموش و پيغمبرلشميش اولو حكمداري اوغوز اوغلونون يادگاري كيمي قيمتلنير.
آذربايجان اساطيرينده اوغوز اوغلونون بايرامي مطرح اولور و اوغوز اوغلو بو گون آغير و اوزون بير قيشدان قورتولور و بو قورتولماقدا اونا بركتلر اوز گتيرير و اوغوز اوغلو بو بركتلري و خئيرلري خاطرلاتماق ايچون يئمك - ايچمك وئرير و چال - چاغير يولا سالير او گوندن اوغوز طايفالاري همين گونو خاطرلاييرلار و بو گونون اوغوز بايرامي اولدوغو بورادان يارانير. سونرالار قونشو ملتلر و او جمله دن فارس خلقي (و فارس اساطيرينه باخساق جمشيد شاه آذربايجانا گلرك) اوغوز ائللرينين بو بايرامين گؤرور، بگنير و اؤز خلقي آراسينا آپاراراق اونو اؤز ديلينه اويغون اولاراق نوروز آدلانديرير.[1]
[1] اوغوز اوغلونون ماجراسين ايل آخير چرشنبه لر كتابي - صحيفه 57 آذر نشر -باكي 1993 ده اوخويا بيلرسينيز.
: قايناق
آختاريشلار و آراشديرمالار كتابي- چاپ: ۱۳۸۵ - انتشارات ياز
شهامت نشريه سي- اورميه- 91ينجي ايلين بايرام اؤزل سايي
يئددي بركت سوفراسي
يئددي بركت سوفراسي
|
|
 يئني ايل قوتلو اولسون
 |
: ايل بايراميندا سوفرالارا دوزولن يئددي بركت
1. گؤي بركتي ايله آيدينليق : قورآن ايله گؤزگو
2. سو بركتي: سو ايله باليق
3. يئر بركتي: بوغدا/مرجيمك
4. حئيوان بركتي: بوياديلميش يومورتا
5. آغاج بركتي:آلما/اييده
6. آل وئر بركتي: سيككه
7. گؤيرمك بركتي: گؤيرتيحاضيرلايان/ شكيللر: حسين واحدي
تيراختور بايرامليغين موبارك اولسون
تيراختور بايرامليغين موبارك اولسون
يازان: حسين واحدي
شكيل:Traxtorchi.ir
بو گون تيراختور ييغماسي، كرج ده سايپا ييغماسي ني بير- صيفير يئندي. بو اويون قار آلتيندي اويناندي. تيراختور يانداش لاري تيراختورون آلقيشيندان بير آن اولسون دئيه ال چكمه ديلر. قار آلتيندا 90 دقيقه تيراختور ييغماسيني آلقيشلايان يانداشلار سونوندا اؤز اؤدول لرين تيراختورون اودماسي ايله آلديلار. تيراختور، بو اودماغي ايله بوتون آذربايجان ليلارا بؤيوك بير پاي وئرررك، بو ايلده سون اويون لارين اويناديلار. ايندي تيراختور 52 امتياز ايله 2-نجي سيرادا دير. اومود ائديريك يئني گونش ايلينده، تيراختور قهرمان اولوب، هاميميزي سئوينديرسين.
آديني كيشي قويدوم ...
آديني كيشي قويدوم ...
يازان: حسين واحدي
نئچه واخت دير، فيكريمي قارما- قاريشيق ائديب دير. هر يئرده اولورام بو فيكيري، باشيمدن آتا بيلمه ييرم. هردن اؤز- اؤزومله، سنين بو ايش ايداره سينين قانونونو اساسيندا آلديغين آيليق ايله كئچينمك راحات دئييل. بونلار نه اومود ايله چاليشيرلار؟! اولمايا باشلاريني مي آلداديرلار؟!!
ايش ايداره سينين قانونوندا تعريف اولونموش حدديندن نئچه قات آشاغي پول وئرمك آيليق مي دير؟ نه دير؟ بونلاري ايشله دنلرين اينصافينا نه گليب دير؟!! سونرا باخيب، اينصافين اولماديغيني گؤروب، هئچ نه يي دوشونمورم!
سؤز، بو قادين خالقيندان گئدير. آدلاري قادين دير دئيه، ايسته ديك لري معاشي وئريرلر. اوشاق لار باخجاسيندا، بازار-دا، ساتيش توكانلاريندا، مطبوعات دا، ...! هاردان دوشدو (كيشي لردن نئچه قات آز) آيليق وئريلير. بير ساده حئساب- كيتاب لا، او پول، گئت- گل پولو ايسه اولمايير! هاردا قالسين بير ياشاييش هزينه لرين ايداره ائتسين. عاييله لر ايسه بو ايش ده سوچلو گؤرونورلر. او پوللارا ايشله مه مك، ايشله مكدن داها صرفه ليدير. اونلاري بو پول ايله چاليشديرانلارا نه دئمك اولار؟ آدلاريني نه قويماق اولار؟ نه دئيك اونلارا؟! يالنيز «گئت خوش اول، آديني كيشي قويدوم!» -دئييرم.
كورسو باشي لاريني اينديده يارادا بيله ريك
كورسو باشي لاريني اينديده يارادا بيله ريك
بايرام گلير ياز گلير، ائليميزه نغمه گلير، ساز گلير...
كئچميشلرده، بايرام لاردا، شنليكلرده و گئجه اوتورمالاريندا، ائل- اوباميز، بير يئره ييغيشيب، بيرليكده، باياتي لار، ناغيل لار، تاپماجالار ... سؤيله ييب، زامان كئچيرَرميشلر. قديم لرده، اينديكينه تاي، راديو- تلويزيون، بيلگي سايار، اينترنت دن، ... خبر يوخويدو. آخشام اولدوقدا قهوه خانالاردان آشيق لارين سازلارينين سسي، گؤزل داستان لاري ايله بيرگه خاطيره لي چاغلار يارادارديلار. ائولرده اوشاقلي- بؤيوكلو صميميت له، بير- بيرلري ايله دانيشيب، ياشاييش لاريندان لذت آپارارديلار.
بؤيوكلر، اوشاقلارا، كئچميش دن، تاريخ دن سؤيله ييب، عيبرتلي ناغيل لار ايله حيكايه لر دئيرديلر. ياشلي لارين چوخو اينديده او، ياددان چيخمايان كورسو باشي لارينين خاطير ه لريني، ايندينين بوتون ايمكانلاري ايله دگيشمزلر.
كورسو باشي، بيزيم فولكلوروموزدا اؤزونه مخصوص بير يئري واردير. بير يئره ييغيشماقلار، اويونلار، دانيشيق لار و.... هر زامان قالارگي اولوب لار.
اينديكي چاخيميزدا، آخشام اولدوقدا، ائولرين چوخوندا، آتا، تلويزيونون خبرلرين ايزله يير. آنا، ائوينه، اؤزونه نه آليب، نه قاليري دوشونور. اوشاق ايسه، بيلگي ساياردا اويون اوينايير! نه كئچميش دن خبر وار، نه تاريخ دن، نه فولكلوردان!
كؤرپه لر، اؤز لاي-لاي لاريميزي ائشيتمك يئرينه، چين لي لرين، جور به جور سسلي اويونجاقلاري ايله اويناييب و ياتيرلار!
اوشاق لار اؤز حماسي و آدليم قهرمان لاريميزين آدلارين بيلمه دن، اؤزگه لرين كارتون لار ايله فيلم ايله بوي آتيرلار. مدرسه چانتالاري، دفترلري و ... خاريجي كارتون لارين شخصيت لرينين شكيل لري ايله دولوبدور! بيزيم اؤز كولتوروموز يوخدورمو؟ ، سوالي هئچ كيمين دوشونجه سينه گلمير، ائله بيل؟!
زاماني دالي قايتارا بيلمه سك ده، اؤز كولتور ايله دب لريميزي ساخلاماغا و گله جك نسيل لره تاپشيرماغي هر زامان ائده بيله ريك. كورسو باشي لاريني، ايندي ده ياراتماق اولار، ائولره شنليك، صفا و صميميتي ايندي ده، قاتا بيله ريك. اؤز كولتوروموزو، دب لريميزي، عادت- عنعنه لريميزي اينديده ياشادا بيله ريك.
بو گؤزل گونلرده، بيرده قاييديب اوشاق اولارديم يئرينه، اوشاق ليغيميزي ايندي يه گتيرك!
يازان: حسين واحديشكيل: Mehr
http://huseynvahedi.mihanblog.com/post/183
آي اينسان اوغلو، وارليغيم دير بو ديل ...
آي اينسان اوغلو، وارليغيم دير بو ديل ...
يازيرام، اوخويورام.گؤزل توركجمده. آليرام چاپ اولان كيتابلاريني، يازيلان، اوخومالي درگي لريني، دئييرم كوتله يه، سيزده اوخويون، يازين، چاليشين توركجمه، آنجاق بير يول ايله ياشادين توركجه ميزي! سئونلر سئوينيب، يولداش اولوروق، سئومه ين لر ايسه دئييرلر: دلي دير بوش وئرين گئتسين، واختيني بوشونا آپارير، ايشي- گوجو يوخدور!! دئييرم؛ آي اينسان اوغلو، وارليغيم دير بو ديل، ياشاديرام اونو، دلي دئييلم كي!!
يازان: حسين واحدي
اورمو-نون مركز مئيداني
اورمو-نون مركز مئيداني
|
|
|||
|
|||
بورا اورمو-نون مركز مئيدانيدير. اورميه نين مهم مئيدانلاريندان بيري. آذربايجانين اوچ بؤيوك شهيدينين هئيكلي بورادادير. اورمونون قديم بازارينين باشلانيشي بورادادير. اورمويا يولو دوشنلرين چوخو بو مئيداني تانيييرلار. بو مئيدانا يولو دوشن قوناقلار، شهيدلر باكري قارداش لاري ايله شهيد اميني نين هئيكل لرينين يانيندا ياديگاري شكيل چكيب آپاريرلار. اورمودا اولان بونون خيياوان مراسيم لرينين چوخو بورادان باشلايير و يا بورادا سونا چاتير...
هر حالدا ايندي، اورمونون نئچه منطقه سينين اوتوبوس دوراغي (ايستگاهي) ايسه بورادادير. بورا شهرين لاپ چوخ گئت-گل اولونان يئرلريندن دير.
بورا آنجاق اورميه نين مركزي دير! بيري كوپن- كوپن سسله يير! بيري ايسه شهرينه موسافير آختارير!! بيري كؤهنه بير ساعات الينده ساخلاييب، ساتير!! بيري...
آرواد- اوشاق لار ايسه دوراق لاردا دايانيب لار. اونلار اورادا دوردوق لاري زاماندا امنيت ايله دينجليك ايسته ييرلر. شهريميز گؤزل دير، بوندا سؤز يوخدور، امما بير آزجا بعضي مسئله لر حل اولونسا داها گؤزل اولاجاق دير!
بورا مركزدير اورمونون لاپ مهم مئيدان لاريندان...
يازان/شكيل: حسين واحدي
