Hikmətli sözlər... /Şəmsi Təbrizi
Hikmətli sözlər... /Şəmsi Təbrizi
![Hikmətli sözlər... [Şəmsi Təbrizi]](http://ray.az/uploads/posts//1304963652_uyumlu-cicekler.jpg "Hikmətli sözlər... [Şəmsi Təbrizi]")
Hər insan üçün bir aşiq olma zamanı vardır , bir də ölmək zamanı.
Ey eşq! Sən elə bir hissən ki, dünya toxları, sənin aclarındır.
Mənə görə aşiq elə olmalıdır ki, qalxınca hər tərəfdə atəşlər alovlansın hər tərəfdə qiyamətlər qopsun.
Cəhənnəm kimi olmalı, cəhənnəmi belə yandırıb yandıracaq bir könül istəməli. Ki o könülün önünə iki yüz dəniz çıxsa, hamısını da yandırsın. Onun tək bir dalğası bilindik dənizlərə daş çıxartsın.
Aşiq odur ki, Allahdan aldığı eşq əmanətini Allaha verər. Eşq məzhəbində hər şey uca Eşqə qurbandır.
Əgər sussan danışmağın daha işıqlıq olar.Çünkü sükutda həm səssizliyin işığı, həm də danışmanın faydası gizlidir.
Dostluq gül olmaqdır yarpağı ilə də tikanı ilə də.
İnsanlar eşq axtarmır, eqoist duyğularına kölə axtarır. Kölə tapır amma eşqi tapa bilmir.
Ey Könül !İndi soruşaram səndən, hansı Eşq daha böyükdür..?Anlatılarak dilə düşənmi,anlatmayıb ürək dələnmi ?
Hər şey insanoğluna fəda ikən insanoğlu isə özünə cəfa olmuşdur.
Gəncliyimdə axtardığımı yaşlılığımda tapdım , neyləyərsən. Ya mən erkən gəldim ya sən gecikdin, neyləyərsən. Qədər!
Əvvəlcə sevgini anlayaq.
Bir an gözlə, arxana dön və unutduqlarını xatırla.. İtirdinsə axtar,qırdınsa üzr istə, qırıldınsa bağışla...Çünki həyat çox qısa.
Musiqinin ritmində bir sirr gizlidir; əgər onu ifşa etsəydim dünya alt-üst olardı.
Hər yolun bir ədəbi vardır. Allahı sevmənin də bir ədəbi vardır.Dərviş yalnız könlü geniş və ruhu səyyah bir sufi demək deyil ki.
Gəl baxaq odla necə oynanar göstərim.Gör baxaq atəşmi səni yandırar, sənmi atəşi?
Allah bir insanı sənin əlinlə ayağa qaldıracaqsa, sən necə əlini uzatmazsan ? Allah səni insanlara sevdirmək istəyir, Allah sənin dağılmış parçalarını yığır. Eşqə nankorluq etmə!!
Şeytanda insandakı xüsusiyyətlərin biri xaric hamısı vardır. Şeytanda əskik olan tək nemət eşq. Şeytanın insan dözə bilməməsi eşqsizliyindəndir.
Allah sənin qapından eşq sarayına bir insan gətirirsə , o insana sən necə mən səni sevmirəm deyə bilərsən?
اینسان بیزلریك می؟
اینسان بیزلریك می؟
 |
دولاندیم، گزدیم بوتون دونیانی. گؤردوم اوندا اولان هر یانی. سونوندا بیر تك اینساندان قورخدوم. اؤز سویون قیران، آرادان آپاران یالنیز اینسانی گؤردوم. هر گون بومبالار سالان، سوچسوز كؤرپه لرین ائوینی ییخان، تكجه اینسانی گؤردوم. دوستونون آیاغی آلتینی قازان، ییخیلارسا آرتیق بیر تپیك ووران، یالنیز اینسانی گؤردوم. قونشوسو آج یاتیب، قارنینی دولدوروب، تكجه اینسانی گؤردوم.
تاریخ لری یارپاق لادیم. یئنه دونیادا اؤز ائوینی ییخان، یالنیز اینسانی گؤردوم!
آلدادیریق اؤزوموزو!! حئیوان آدیندان قاچماغا، اینسان آدینی سئچمیشیك. نه بیلیم، اولا بیلر، یازیق حئیوان لارین آدی كورلانماسین دئیه اؤزوموزه اینسان دئمیشیك!
یازان: حسین واحدی
شهید بابا ساعی
شهید بابا ساعی-نی تانییاق
یازان : حسین واحدی
اورمیه اهالی سی نجور اولمالی اولسا گونده، هفته ده و آیدا نئچه سئری شهید بابا ساعی خیاوانیندان كئچیرلر. آمما چوخوموز او آدین كیم اولدوغونو بیلمه ییریك و چوخلاریدا او شهیدی تانیماییرلار. بو قیسا یازیدادا اولمالی اولسا، اؤز وظیفه میز بیلیب آذربایجانیمیز و گؤزل ایرانیمیزین پاك اینسانلاریندان بیری اولان شهید بابا ساعی نین یاشاییشی نی سیز عزیز اوخوجولاریمیزا یازیریق. اومود ائدیریك او شهیدین روحو بیزدن راضی اولسون.
1333- نجو گونش ایلینده، بیر یوخسول و زحمت چكن عاییله ده دونیایا گؤز آچدی. چتین گونلر و فقیرچیلیق ایله اوشاقلیغینی باشا یئتیردی. اؤلكه میزین مین لرجه حسرت ده قالمیش یوخسول اوشاق لارینا تای، قولدور شاه حوكومتینده تحصیل دن دالی قالیر. اونون تانری وئرمیش و طبیعی باجاریقلیغی، یاشامینین ایلكینده یوخسوللوق ایله معاش اوچون ایشله ندی. او ایشچی لیك ایله چرچی لیك (الده ساتیجی لیق) ائتمك له اؤزو ایله عاییله سینین خرجین -آزدا اولمالی اولسا- چیخاردیردی.
شهید بابا ساعی، بعضی یوخسوللوق دان راحاتسیز اولوب یولوندان آزان اینسان لارین ترسینه، یوخسوللوق دان اینجیمه ییب و اؤز باجاریغیندان فایدالاناراق، فقهی و قورآنی علم لرینده تحصیل آلماغی باجاریر. اونون كیلاسیك ساوادینین اولمامازلیغینا باخمایاراق، قورآنین اَن یاخشی درس وئرنی اولدو و ایشینه و سؤزونه عمل ائتدیگی اوچون، سؤز – صؤحبتی دیللر میثالی اولموشدو. بابا ساعی، اورمیه نین اؤزو و كندلرینده مختلیف قورآن جلسه لری قوروردو و اونون یانیندا یئنی یئتمه لری (نوجوان لاری) داغچیلیغادا آپاریردی و اؤز كیلاسلاریندا بؤیوك و دیرلی اینسانلار تربیه ائدیردی. بو اینسانلار سونرالار انقلاب دؤیوشله رینده بؤیوك حماسه لر یاراتدیلار. اونلاردان؛ شهید سردار نادر علیزاده ، شهید رحمان حسن زاده ، شهید محمد خمسه لویی و باشقالارینی آد آپارماق اولار و چوخلاریدا ایندی یاشاییرلار و هر بیری اؤز یئرینده اؤلكه یه قوللوق ائدیرلر.
فوتبالیست ها یئددیجه لیگینین 69-ونجو سایی سی یاییلدی!
تبریزلی شمس نین ائل تباری
تبریزلی شمس نین ائل تباری
بللی اولان آچیق آیدین تاریخ بونو گؤسته ریر کی شمس تبریزی و یا اونون اؤیرنجیسی«مولوی»هر ایکی سی ده آذربایجانلی دیلار و هویت لرینه واقیف اولدوغو حالدا هر واخت تورک اولماغینافخر ائدیب اؤزلرینی آذربایجانین مدنیت و علم مروجی ساییردیلار . هر حالدا بو عالیملر هر زامان قلم الینه آلیب و بیر کیتاب یازاندا بیر پاک اینسان کیمی تانری نین رضاسینا یازیب یارادیردیلار.
بو بیر سیرا مغرض لرین الینده بیر بهانه اولوبدورکی تاریخی حقیقت لری مخدوش ائله سین لر، یوخسا بو عالیم لر عاشیق اینسانلاردیلارکی باطین دیلینی بیلیرلر و هریئرده لازیم اولوب میللی هوییت لرینی بیان ائتسین لر اؤزلرینی قید و بنددن قورتاریب و کیملیک لرینی قاباردیب و ئوزه چیخاردیب لار.
عشق میلتی هامی دین لردن آیریدی
عاشیقلر اؤچون عشق میلتی تانری دیر
هر حالدا شمس و مولوی بونا باخمییاراق دیل سیز لرین دیلینی تاپشیریرلار آمما اؤز میلییت وهوییتلرینی بیان ائتمکدن فارغ اولماییرلار.
کیمسه اؤز اصلیندن اؤزاقلاشدی
روزیگار بیرده تاپار اؤز وصلینی
ایکینجی سی عشق و محبت دیلی بیر آدامین میلییتی ایله هئچ بیر پروبلمی یوخدور بیرحالدا کی کئچمیش عالیم و یازیچیلار احیاناًصراحتله، دیل و یوردلارینی بیان ائتمه ییبلر .بو سبب اولماز وقوندارما نسبت یاراتماقلا دئییشیلمز،آمما بو عالیمین وجودی بوتون اینسانلارا عاییدی کی اوندان فایدالانیرلار.
شمس تبریزی بو جومله عالیم لردندی.مولوی «شمس» ین تبارینین باره سینده یازیر: «شمس تبریز شاه ترکان است»کی ایشاره سی شمس ین تورک اولماغینادیر .آمما تورکلرین هانکی طایفاسینا ؟ مولوی بومسئله نیده آیدینلاییب « شمس شاه قبچاق ترکان بود» «شمس،قبچاق تورک لرین شاه ی دیر».
« آذربایجان ادبیات خادیمی حسن زنگیمارلئ »
آزیخ ماغاراسی
آزیخ ماغاراسی
یازان: پروفسور عاریف موصطفی یئو
کؤچوروب دوزنله ین: محمدرضا خیری فام
آزیخ اینسانی یئر کوره سینین ان اسکی ساکین لریندن بیری، واختی ایله ایندی آذربایجان کیمی تانینان توپراقلاردا یئرله شمیشدی.
بو آذربایجانین ان گیزلی ساخلادیغی گیزدیر (سیردیر). آذربایجان یاخود دا کئچمیش سووئتلر بیرلیییندن (شوروی) قیراقدا بو گیزی بیلن چوخ آزدیر.
1968- جی ایلده ممدلی حسین اوو (1994- 1922) سونرادان نئاندئرتال تیپه اؤزل اولدوغو ثبوت ائدیلن اسکی اینسانین آلت چنه سومویونو تاپدی. بو تاپینتی تاپیلان زاماندان بری باتی (قرب) اوزمانلاری طرفیندن سربست (موستقیل) صورتده آراشدیریلمامیش و اونون 000/400- 000/350 ایللیک بیر تاریخینین اولدوغو تصدیق اولونموشدور. آزی دیشلریندن بیری بوتؤو قالمیش، او بیری ایسه قیسما سینمیش بو چنه سومویونون 18 یاشلی قادینا منصوب اولدوغو فرض ائدیلیر( او زامان یاشام اورتا حئسابلا 22-20 یاشا دک داوام ائتدییینه گؤره 18 یاش آرتیق قوجالیق دؤنمی حئساب اولونوردو). چنه سومویونون تاپیلدیغی آزیخ ماغاراسیندا سونرادان پالئولیت و مئزولیت دؤنملرینه داها دوغروسو 5/1 -1 میلیون ایل اؤنجه کی دؤنمه عاید اولان داشدان دوزلمیش امک آلتلری تاپیلمیشدیر.
فرانسیز پالئونتولوقو (فوسیل تانیانی) "لومله" نین فیکرینه گؤره آزیخ ماغاراسیندان تاپیلمیش چنه سومویو آرخئولوگیا (اسکی تانیمی) تاریخینده اسکی لییینه گؤره دؤردونجو یئرده دیر. ان اسکی رئلیکت ایسه ریچارد لیکی و اونون حیات یولداشی ایله اوغلو طرفیندن تانزانیانین اولدووای دوشرگه سینده تاپیلمیشدیر. ایکینجی کنیادا، اوچونجو ایسه فرانسادا تاپیلمیشدیر. کئچمیش سووئتلر بیرلییینده ایسه حسین اووون تاپینتیسی ان اسکی تاپینتی حئساب اولونور.
ممدلی حسین اوو آذربایجانین گونئی ـ باتیسینداکی (جنوب ـ قربینده کی) کیچیک قافقاز سیرا داغلارینین گونئی ـ دوغو (جنوب ـ شرق) یاماجلاریندا یئرله شن آزیخ چایینین یاتاغینداکی آزیخ ماغاراسیندا یئرله شن بو اینسانلاری "آزیخ آنتروپ" آدلاندیرمیشدیر. ماغارا آرازا یاخین اولان فضولی رایونونون (بؤلگه سینین) توپراقلاریندا یئرله شیر. ایندی بو رایون ائرمنیستانین حربی ایشغالی آلتیندادیر. بورادا یاشایان بوتون آذربایجانلیلار همین توپراقلاری 1993- جو ایلدن ترک ائتمیشلر.
حسین اووون یاشامیندا ان چوخ تاسوف لندییی شئیلردن بیری اونون 80 ـ جی ایللرین سونوندان بری ساواش و ساواش تهلوکه سی اوزوندن آزیخ ماغاراسینا گئدیب اورادا اؤز آراشدیرمالارینی داوام ائده بیلمه مه سی ایدی. عؤمرونون سون گونلرینه دک او، فضولی رایونونون ائرمنی ایشغالیندان آزاد ائدیله جه یینه اومیدینی ایتیرمه میشدی.
حسین اوو آزیخ ماغاراسینی 1960 ـ جی ایلده کشف ائتدی. قاراباغ توپراقلاریندا یاشایان اهالی بو ماغارانی تانیییردی. بورانین اژداهالارین یاشادیغی تهلوکه لی بیر یئر اولماسی حاقیندا چوخلو سؤیله ییشلر سؤیله نیلیردی. سانکی ماغارایا گیرنلر اورادان ساغ قاییتمیردیلار ائله بیل حتی بیر دؤنه اورایا گیرن بیر سورو قویونو، اژدهالار دیری ـ دیری یئمیشلر.
آزیخ، قافقاز توپراقلاریندا تاپیلمیش اهنگ داشی ماغارالاری ایچینده ان بؤیویودور و اونون لابیرینت تیپلی دهلیزلری 600 مئتره قدر اوزانیر.
ساحه سی 800 کوادرات (مربع) کیلومئتر اولان ماغارادا سککیز ایری دهلیز واردیر. بو دهلیزلردن بعضی لرینین گونبز شکیللی تاوانلارینین هوندورلویو (اوجالیغی) 25 ـ 20 مئتره دیر. ماغارا بویو استالاکتیت و استالاقمیت سوتونلارینا راست گلمک اولار.
ماغارا دا اورتا پالئولیتین (داش دؤنمینین) چئشیدلی دؤنملرینه عایید 14 مئتر قالینلیغی اولان 10 معدن قاتین تاپیلماسی حسین اووو بئله بیر سونوجا گتیرمیش کی، ماغارادا یاشام اونلارلا مین ایل سوره سینده سورموشدور.
ممدلی حسین اووون ان نادیر تاپینتیلاریندان بیری ده پریمیتیو داش آلتلر ایدی. آرخئولوژی باخیمیندان بو آلتلر چای داشی مدنیتینی تمثیل ائدیر. ماغارا قورو چای چایینین حووزه سینده یئرلشدییینه گؤره حسین اوو بو دؤنمی قوروچای مدنیتی آدلاندیرمیشدیر. بو مدنیتین 5/1 میلیون ایللیک تاریخی اولان بیرجک ائکویوالنتی تانزانیانین اولدووای دوشرگه سینده تاپیلمیشدیر. بیلگین قوروچای مدنیتینین 000/730- 1/500/000 ایللیک تاریخه یییه اولدوغونو تصدیق ائتمیشدیر.
ممدلی حسین اوو آزیخ ماغاراسی ساکین لرینین ماغارایا کؤچمزدن اؤنجه داش آلتلری دوزلتمک یئتنه یینه (قابلیتینه) یییه اولدوقلارینی سانیردی. باشقا ماغارالاردا اولدوغو کیمی آزیخ ماغاراسیندا دا 45 چئشیدلی چئشیده (نووه ـ نوعا) عاید حئیوان سوموکلری تاپیلمیشدیر. بو چئشیدلرین بعضی لرینین آرتیق کؤکو کسیلمیشدیر. اودون مئیدانا گلمه سیندن سونرا بو سوموکلرین چوخو، گؤرونور کی، یاندیریلمیشدیر.
تاپینتیلار گؤستریر کی، ماغارا آییلاری و چئشیدلی چئشیدلره عاید ماراللار ماغارا ساکین لرینین ان چوخ اوولادیقلاری حئیوانلار اولموشدور. ماغارا آییسینین آزیخ ساکینلری اوچون قوتسال حئساب اولوندوغو گومان ائدیلیر. بئله کی آشئل قاتیندا یئرله شن اوجاق یئرینه یاخین بیر سیغیناجاقدا بیر- بیرینین یانینا دوزولموش آیی کلله لری تاپیلمیشدیر. کلله لرین هامیسی عین شکیلده کسیلمیشدی.اونلارین هئچ بیرینده آلت و اوست چنه سوموکلرینین اولمادیغی، یاخود چئشیدلی شکیلده زده لندییی آیدینلاشمیشدیر. بعضا یارییا بؤلونموش چنه سوموکلری خاچ عمله گتیریر، بعضا ایسه خاچ گرافیک شکیلده تکرار اولونور. کلله لرین بیرینده ایسه خاچ شکیللی چاپیق تاپیلمیشدیر.بئله بیر فئنومئنین (تاپینتی- پدیده) همین دؤنمه عاید باشقا رئلیکتلرله ده ایلگیلی مؤوجود اولماسی فاکتی تاریخده ایندیه دک بللی اولموشدور. دؤردونجو قاتدا تاپیلان ان اؤنملی تاپینتیلاردان بیری اودون یارانماسی تاریخینه عایددیر. اوو چالیشمالاری ایله ایلگیلی اینسانلار یئرده چالالار قازماقلا صونعی اوجاقلار یارادیر و اونلاری یاریم دایره وی داش مانع لرله چئوره له ییردیلر (احاطه ائدیردیلر).
اوجاق یئرینین تاپیلدیغی چالالار اونجا دا درین دئییل و اونلاردان یالنیزجا قیدا (یئمک) حاضیرلاماق اوچون یوخ، هم ده اودو قورویوب ساخلاماق اوچون قوللانیلدیغی (ایستفاده ائدیلدییی) گومان ائدیلیر.
ماغارادا یاشایان اسکی اینسانلارین یاشامیندا اونلاری باشقا جانلیلاردان آییران اؤنملی دییشیکلیکلرین باش وئردییینی ثبوت ائدن بو فاکت حسین اووون آزیخلا ایلگیلی سون تاپینتیسی ایدی.
1973- 1972 – جو ایللرده چئشیدلی استراتیقرافیک قاتلاردا بئش اوجاق تاپیلمیشدیر. اوجاق یئرلریندن بیری30 سانتی مئتر قالینلیغی اولان آیپارا شکیللی دیوارلارلا چئوره لنمیشدیر. بو دیوار چئوره ده کی یاشاییش ساحه سینی قیغیلجیمدان (اود پارچاسیندان) قوروماق اوچون تیکیلمیشدی. بونلار بشریت تاریخینده ایلک تیکینتی و ایلک اوجاق یئری ساییلیر.
تیکینتی ائرامیزدان (میلاددان) اونجه 000/500- 000/700- جی ایله عاید اولدوغو گومان ائدیلیر. ماراقلی فاکت لاردان بیری ده اوجاق یئرلرینین عین یئرده چئشیدلی دؤنملرده مؤوجود اولماسیدیر. بو، ماغارا ساکین لری آراسیندا گلنکلرین اوزون مودت سورمه سینی ثبوت ائدن اؤنملی بیر بلگه دیر.
ماغارانین آشئل دؤنمینه عاید دؤردونجو قاتیندا اولدوقجا ماراقلی بیر تاپینتی تاپیلمیشدیر. بو قاتدا اینسان یاشاییشیندان خبر وئرن هئچ بیر تاپینتی تاپیلمامیشدیر. چوخ گومان کی، ماغارانین ساکینلری اورانی بیر مودت موعین ندنلره گوره ترک ائتمیش و سونرالار یئنی دن اورایا قاییتمیشلار.
بونون ندنی، البته کی، سورو اولاراق قالیر. بئله بیر تاپینتی باشقا ماغارالاردا دا تاپیلمیشدی. بلکه ده ماغارانین اوست قاتلاری سؤکولوب داغیلمیش و اینسانلار اورایا گیرمه یی تهلوکه لی حئساب ائتمیشلر و یاخود بلکه ده بیر قضا باش وئرمیشدیر. بعضی آرخئولوقلار بئله حئساب ائدیرلر کی، بوزلاشما دؤنمیندن سونرا ایقلیم مولایم لشمیش و اینسانلار ماغارانین ایچریسینده قالماغا احتیاج دویمادیقلارینا گؤره آچیق دوشرگه لرده یئرله شمیشلر.
آذربایجان اوشاق ناغیل لاریندان / تولكو و حاجی لئیلك
آذربایجان اوشاق ناغیل لاریندان
تولكو و حاجی لئیلك
گونلرین بیر گونو بیر حاجی لئیلك ایله بیر تولكو قارداشلیق ائدیردیلر. اونلار بیر یئرده چیخیر، بیر یئرده گزیردیلر. بیر گون تولكو حاجی لئیله یه دئدی:
ـ قارداش، آخشام بیزه قوناق گلرسن؟
حاجی لئیلك او گون آخشامادك چؤرك یئمه دی، اؤزونو تولكونون قوناقلیغینا ساخلادی. آخشام حاجی لئیلك قارداشلیغی تولكونون ائوینه گلدی. تولكو دوردو بیر قازان دووغا بیشیردی. بیر بوشقابا تؤكدو، سوفره یه گتیردی. یئمه یه باشلادیلار. حاجی لئیلك هر دفعه دیمدیگینی اوزادانا آنجا بیرجه دوگو گؤتوره بیلیردی. او، بئش- آلتی – دوگو گؤتورمه میش تولكو دووغانی تامام یالاییب قورتاردی.
حاجی لئیلك آج قالدی. اؤز- اؤزونه دئدی: « یاخشی، آی تولكو، عوضینی سندن چیخارارام».
حاجی لئیلك او گئجه ساباحادك آجیندان یاتا بیلمه دی، قارنینی اوووشدورا- اوووشدورا قالدی.
بیر نئچه گون كئچدی. بیر گون حاجی لئیلك ده دووغا بیشیریب، قارداشلیغی تولكونو قوناق چاغیردی. حاجی لئیلك دووغانی بیر بارداغا تؤكوب سوفره یه قویدو. سونرا اوزو دیمدیگینی سالیب بارداقداكی دووغانی تامام ایچدی، تولكو آنجاق بارداغین قیراغینا تؤكولنلری یالادی. او، گئجه آج- آجینا یاتدی. سحر تئزدن دئیینه- دئیینه اؤز ائوینه گلیب دئدی: «سندن منه قارداش اولماز، من سنی یئییم، سنده تاماشا ائله».
بیر موددت كئچدی. تولكو اوره ییندن آجیغینی چیخارتمادی. بیر سحر تئزدن تولكو، حاجی لئیله یین یانینا گلیب دئدی:
ـ قارداش، اوره ییم برك داریخیر، دور گئدك گؤی چمنده بیر آز گزك.
حاجی لئیلك راضی اولدو. هر ایكی سی بیر- بیرینه قوشولوب، بیر چمنه چاتدی. تولكو دئدی:
ـ قارداش، گل بو چمنده بیر آز یاتاق.
یاشیل چمنده اوزاندیلار. تولكو اؤزونو یالاندان یوخویا ووردو. حاجی لئیلك، یوخویا تزه جه گئتمیشدی، تولكو بیردن یئردن قالخدی، حاجی لئیله گین بوغازیندان توتماق ایسته ینده، حاجی لئیلك اویانیب دئدی:
ـ قارداش نه ائله ییرسن؟
ـ تولكو دئدی: سنی یوخودا گؤرموشدوم، اونا گؤره سنی اؤپمك ایسته دیم.
حاجی لئیلك اونون حیله سینی باشا دوشدو. اؤز- اؤزونه دوشوندو.
ـ « یاخشی، گؤرك كیم كیمی اؤلدورر».
او، تولكویه دئدی:
ـ قارداش، داها یاتمیرام، گل منیم قانادلاریمین اوستونه مین، هاوایا قالخاق، بیر آزدا گؤیده گزك، سونرا گلیب آرخایین یاتاریق.
تولكو حاجی لئیله گین قانادلارینین اوستونه میندی. حاجی لئیلك هاوایا قالخدی. بیر چوخ قالخاندان سونرا سوروشدو:
ـ قارداش نئجه گؤرونور؟
ـ خیرمان بویدا.
حاجی لئیلك بیر آزدا قالخیب سوروشدو:
ـ قارداش ایندی نجور گؤرونور؟
ـ تولكو دئدی:
ایندی هئچ گؤرونمور؟
ـ حاجی ائیلك دایانیب دئدی:
قارداش داها قانادلاریم آغریییر، دوش بیر آز دینجه لیم.
تولكو یالواریب دئدی:
ـ آی قارداش باشینا دؤنوم، قوربانین اولوم، من نه تهر دوشوم؟ آماندی منی آشاغی ایندیر.
حاجی لئیلك دئدی:
ـ قانادلاریم آغریییر، دوشمه سن سنی یئره سالاجاغام.
تولكو چوخ یالواریب، یاخاردی، گؤزلرینین یاشینی تؤكدو، آمما حاجی لئیله یی اوره یی یومشالمادی. حاجی لئیلك اونو توللاییب دئدی:
ـ حیله چی تولكو، بو منی یوخودا اؤپدویونون عوضیدیر.
تولكو یئره دوشوب، شیل- كوت اولدو. حاجی لئیلك ده بالالارینین یانینا گلیب، كئف له گون كئچیردی.
حاضیرلایان: حسین واحدی
قایناق:
آذربایجان اوشاق ناغیل لاری/ معصومه اژدری
اوشاق / Uşaq
اوشاق
بیر اوشاق آغلاییرسا
آسیادا
آفریقادا
دونیادا
او اوشاق بیزیمدیر.
آغلایان اوشاقلار گولورسه
آسیادا
آفریقادا
دونیادا
او دونیا هامیمیزین دیر.
اورهان موراد
تراختور چوخ یاشا
یورو تیراختور!
نئچه گون اویونا قالاندان، اوره ییمه تیراختورونون اودماق قوشو قونموشدو. هر یئرده جومعه گونونون اویونوندان سؤز كئچیردی. هامی تیراختورون اودماسینی ایسته ییردی. اؤز- اؤزومه، بیردن اودوزساق نه ائده جه یم، دئییردیم. آمما اوره ییمین اوستونه قوناق اودما قوشو، منی بو قیدی-ویدیدان قورتاریردی.
جمعه گلیب یئتیشدی. سحر تئزدن یوخودان دورموشدوم. اوره ییم چوخ اسیردی. بوتون دوشنجه م، تیراختورون اویونونون یانیدایدی. سحر یئمه یین یئیر-یئمز، تیراختوردان خبر آلماغیم اوچون، گئتدیب بیلگی سایاریمی آچیب، اینتئرنئته باش چكدیم. اومود وئریجی خبرلری گؤروب ده، داها چوخ سئویندیم.
گون اورتادان سونرا گلیب چاتمیشدی. اوچونجو كانالدا تیراختور-پیروزی اویونونون باشلانماسیندان اؤنجه حاضیرلیق لار و دانیشیق لار آپاریلیردی. ایستادیوم دا كئچن ایللره گؤره یانداش آزییدی! آپاریجی چالیشیردی تئهرانلی پیروزی یانداشلارینی استادیوما چكسین! اولسون، عیبی یوخ، نه قدر یانداش چوخ اولسا، تیراختور اوچون یاخشی اولار، اودماق بیزه چوخ یاپیشار، دئییردیم.
... اویون باشلانمیشدی، كئچن كی تئهران اویونلارینا تای، تیراختور یانداشلارینین سس لرین كسمیشدیلر! اونلاری گؤرمه یه ده حسرت چكیردیك. هم سسیمیزدن همده اؤزوموزدن قورخورلارمی، دئییردیم... عیبی یوخ!!
... گـــــــــــــــــل ... تیراختور 1 پیروزی 0 ، اكبرپور زهرین تؤكدو. اوره ییم یئریندن چیخماق اوزره یدیر. ائوده هامی سئوینج پایلاشیردی. هامی دئییردی من بیلیردیم بوگون بیزیم گونوموز اولاجاق. یئنه مغرور اولماییردیم. دئییردیم: فوتبال دیر، اودوزادا بیله ریك، آمما یئنه او سؤیله دیگیم اومود قوشو، اوره ییمی راحاتلادیردی... و سونوندا آذربایجان اوددو...
تیراختور، چوخ گؤزل اویون آپاردی. بوتون تیراختور یانداشلاری سئوینج ایچینده یدیلر. او تایدان ماشین سازینیندا اودماغینین خبری داها چوخ آذربایجان فوتبال سئورلرین سئویندیردی و بو گون بیزیم گونوموز اولدو.. فوتبال دیر، هر نه اولا بیلردی، آمما بوگون یانداش لار تیراختورو یالقیز قویمادیق لاری اوچون یئنه بیز اودموشویدوق... یورو تیراختور، بیز قهرمانلیق ایسته ییریك.
یازان: حسین واحدی
كؤچمن قارانقوش
كؤچمن قارانقوش
سون باهار گلمك اوزره دیر. یولداشلاریم دئییر: قالدیغیمیز یئردن باشقا یئره گئده جه ییك. آتامدان سوروشاندا: هاراگئده جه ییك؟ من تانیمادیغیم یئرلردن سؤز آچیر.
هردن اؤز- اؤزومه ائله داریخیرام! دئییرم نه اولار ائله بو یام-یاشیل یئرده قالیب یاشایاق. آمما آتام دئییر: بیر آیین ایچینده بورادان گئتمه سك هامیمیز سویوقدان اؤله ریك. قارانقوش لار ایسی یئرده یاشایارلار. ائلیمیزین بؤیوگو دئییب: ایكی گوندن سونرا اورمو گؤلونون یانینا گئده جه ییك. آتام دئییر، اورمو گؤلو، چوخ گؤزلدیر و اورادا آیاقلاری اوزون فیلامینقولار، ساری جئیرانلار، قوچ لار و... یاشاییرلار.
ایندی چوخ ماراقلی اولموشام تئزلیك له قالدیغیمیز یئردن اورمو گؤلونو گؤرمه یه گئدم... كؤچمك گونو گلیب یئتیشمیشدی و یولداشلاریم ایله بیرلیكده بیر قیراقدا اوچماغا حاضیر اولموشدوق، ائلین بؤیوگونون اوچماغی ایله هامیمیز گؤیه ساری یوللاندیق، شهرلرین اوستوندن كئچنده اوشاق لارین هامیسی بیزه ال ساللاییردیلار و ائله بیل اونلار بیزیم له بیرگه اوچماق ایسته ییرلر...
یول چوخ اوزونویدو، آمما هئچ یورولماق بیلمه ییردیم، یالنیز اورمو گؤلونه چاتماق ایسته ییردیم، بؤیوكلو-كیچیكلی داغلاری، اورمانلاری، شهرلری آشیب گئدیردیك. گئتدیگیمیز یئره آز قالیردیق، آتام، آنام ایله بیر لیك ده یانیمدا اوچوردولار و من چوخ سئوینیردیم.
... اوزون یولجولوقدان سونرا، آرزیسین چكدیگیم یئره یئتیشمیشدیك، آمما اورمو گؤلو... اورمو گؤلو من آرزیسین چكن دئیلمیش، چوخ آغلادیم بورا گلدیگیمه، بورا چؤلدن باشقا بیر زاد دئییلمیش، آتام یانیما گلیب، آغلاما قیزیم بورا سولو بیر گؤلویدو، قوروماسینین ندنین بیلمه ییرم، سنی آپاراجاغام گؤزل «وان» گؤلونه، دئییرلر اورا چوخ سولو و گؤزل دیر... سن آغلاما، گؤزل قیزیم ...
یازان: حسین واحدی
