◄███▓▒░░ -[ Xatirələr durağı ]- ░░▒▓███►

قوشاچاي (مياندوآب) شاعيرلريندن/ باباعلي جوانمرد

 آذربايجان

آذربايجان وطنيم دير    قوچاق دير ائل لريم منيم

غيرت قاني ايله دولوبدور    وقارلي گؤل لريم منيم

ديل وئرمز خاره گول لريم    وفالي دير بولبول لريم

قاباردا اولسا ال لريم    يورولماز قوللاريم منيم

هر زامان گونشيم چيخار    ظولمتين باغريني سيخار

پولاددان سد اولسا ييخار    جوشغوندور سئل لريم منيم

«جوانمرد»م ياريم ياردير    وطنيم اودلو دياردير

هر فصيلده لاله زاردير    داغ- دره چؤل لريم منيم.

آدام اولماق!

آشيق دهقان فرقلي بير اينسان

آشيق دهقان:

آشيق سس سيز لرين سسيدير

شهامت نشريه سينين ياييلماسينين ايلك گونوندن آذربايجان آشيق صنعتينه ده ير وئرمك و بو يولدا جاندان- اوركدن امك چكنلري يوخلاماق و ائليميزه تانيتديرماق بيزيم اصلي وظيفه لريميزدن اولوب دور. بو يولون اوزوناسيندا بو ساييميزدا آذربايجانين مهم و بؤيوك آشيق لاريندان بيري اولان آشيق «محمد حسين دهقان» ايله دانيشيق آپارميشيق. آشيق دهقاني تانيتديرماق لازيم دئييل و ائليميزين هاميسي بو قوجاماق كيشينين اؤزو و سسي ايله تانيشدير. آشيق دهقان صميميت له بيزيم دانيشماغيميزي قبول ائديب و قيسادا اولمالي اولسا اورك سؤزلريني سيز عزيزلريميزله پايلاشيب دير.

آشيق دهقان، كسينليك له آذربايجانيميزين قالارگي وارليق لاريندان بيريدير. آشيق دهقان، بوتون ميللي و اولوسلار آراسي فئستيواللاردا ايشتيراك ائديب و آذربايجان موسيقيسيني دونيايا تانيتديرماغا اليندن گلني اسيرگه مه ييب دير. آشيق لاتين آمريكا، فرانسه، آلمان، سوئد، آذربايجان جومهوريتي، توركيه و ... اؤلكه لرينده مختلف موسابيقه لرده و فئستيواللاردا قاتيلماقلا اونلارجا قيزيل بويون باغي و لؤوحه لر قازانيب دير. خاطيرلاتماليييك آشيق كئچن ايللرده موسيقي دوكتوراسين آليب دير.

 اورميه آدليم لاريندان

عليقلي اوغلو اولان علي دهقان، 1289- نجو گونش ايلينده، اورميه ده دونيايا گلدي. ابتدايي تحصيلاتيني «احمديه» مدرسه سينده كئچيردي. ميرزا حسين مجتهد ايله ميرزا ابو تراب مجتهد، اونون جدد لري اولاراق، آذربايجانين عاليم لريندن ساييليرديلار. او 1305 ايلينده اورميه نين پهلوي اورتا اوخولولندان بيرينجي ديپلوم آلانلاردان اولوب، اوزامانين معارف وزارتيندن بيليمسل (علمي) بويون باغي سي آلميشدي. دهقان، تحصيلاتيني رياضي قولوندا (رشته سينده) تئهرانين علوم بيليمگه سينده (دانشكده سينده) و تربيتي علوم درس لرين ايسه تئرانين يوكسك (عالي) اؤيرتمنليگينده (دانشسراسيندا) سون وئريب، ليسانس بيليم بلگه سيني (دانشنامه سيني) آلير. او اينيگيزجه، فرانسه جه ديللرينه تانيشليغي وارييدي. دهقان تبريزين اؤيرتمنليگينين قوروجولاريندان ايدي و 1323- نجو ايلينه كيمي – اون ايل- اورانين رييسي اولور. او، رحمتليك محمد معزي (اورميه نين پهلوي اورتا اوخولوندان تحصيل آلانلاردان ايدي و 1320 دن 1323 كيمي باتي آذربايجانين كولتور -فرهنگ- رييسي اولموشدو) -دن سونرا، باتي اذربايجانين كولتور رييسي سئچيلير و اورميه ده قالديغي زامانا كيمي، كوتله (مردم) و خيريه مؤسسه لرين يارديمي ايله بير باب كيتاب ائوي و كيتاب اوخوما يئري آچير و ايندي اوستانين لاپ قديمي كيتاب ائوي ساييلير. رحمتليك علي دهقان، آذربايجاندا پيشه وري حوكومتي زاماني، تئهرانا گئديب، 1326 ايلينده يوكسك اؤيرتيم اوچون اون نفر له بيرليكده فرانسه يه گئدير. او وطنه دؤنندن سونرا 1329-ونجو گونش ايليننه كيميكولتور وزارتينده، مختلف مقاملاردا چاليشير و 1329 ايلينين خزل (مهر) آييندان تبريزين كولتور رييسي اولوب، 9 ايلين ايچينده چوخلو ديرلي ايشلر اؤزوندن ياديگار قويور. اونلاردان نئچه سي:

ـ يئتميش سگگيز باب كولتورل تيكينتي نين تيكمه سي –مدرسه، كيتاب ائوي و ...

ـ تبريزده، اؤلكه ميزده بيرينجي دفعه اولاراق، كيتاب هفته سينين آپارماسي. بو ايشيي هر ايل دوزنلي (مرتب) آپارماسي، ميللي بير ايشه چئويريلدي.

ـ آذربايجان-نين كولتور تاريخينين چاپ ائتمه سي.

ـ اوستاد شهريارين مقاميني عزيزلنديرمك و تبريزده بير اورتا اوخولا اونون آدينا قويماق و بايرام (اسفند) آيينين اون آلتي سيني شهريار گونو آدلانديرماق.

ـ يئني اوخول لارين آدلارينا، ادبسل (ادبي) و كولتورل (فرهنگي)، شخصيت لرين آديني قويماق – اؤزلليك له مشروطه چاغيندان-.

آدي جانلي قالميش دهقان 1338 ايليندن 1348 ايلينين سونونا كيميتبريزين ميللي كيتاب ائوينين باش يازاني ايدي و ايندي ده دؤرد نوسخه او نشريه دن، آستان قدس رضوي و ارشاد و كولتور وزارتينين كيتاب ائولرينده قاليري. دهقان، 1338 ايلينده گيلان اوستانداري و 1340 ايلينين قويروق دوغان (مرداد) آييندان، 1343 ايلينين قورا بيشيرن (تير) آيينا كيمي دوغو (شرقي) آذربايجان اوستانداري اولموشدو. تبريزين گؤي مچيدينين گونبزي رحمتليك دهقان و اوستاد رضا معمار-ين ايستك و يارديم‌ لاري ايله مرمت اولدو.

رحمتليك علي دهقان دان ياييلميش اثرلريندن؛ «سرزمين من زرتشت» -بو كيتاب ايندي يه كيمي اورميه اوچون چاپ اولونان مهم قايناق لاردان بيريدير- ، «انگلستان و ايران و تعليم و تربيت در آمريكا»، «تعليم و تربيت در كشور استراليا و مدارس يك اتاقه و چند كلاسه»، آد آپارماق اولار.

اونون حاضيرلاييب، چاپينا عؤرو يئتيرمه ين كيتابلاردان ايسه؛ «حكومت يك ساله پيشه وري در آذربايجان»، « تاريخ روابط ايران و روسيه در دوران تلط اسلاوها بر سرزمين روسيه تا فرو پاشي اتحاد جماهير شوروي-حدود6 جلد-»، «رسالة تعليم و تربيت در فرانسه و تربيت ممالك فرانسه»، «تاريخچة وجه تمسية مدارس تبريز»، « فرهنگ آذربايجان»، آد آپارماق اولار.

رحمتليك علي دهقان، 1381-ينجي گونش ايلينين اوغلاق (دي ماه) آييندا، دوخسان ايكي ياشيندا تئهراندا، دونيا ايله ويداعلاشيب، دونياسين دَييشير. اونو كرج شهرينين امامزادا طاهير، مقبره سينده توپراغا تاپشيريبلار.

حاضيرلايان: حسين واحدي

سن... من...

سن بير گولونج،

من بير دوداق.

سن كپنك،

من ده باغ.

سن جئيرانسان،

من اويلاق.

سن قاراسان،

منده آغ.

سن قاياسان،

منده داغ.

سن من-سن،

منده سن،

بيز سئوگي ييك،

شمع اولوب،

بير گه ياناق،

عشق اولاق!

شعر: حسين واحدي

***

اويلاق: مأوي (ياشام يئري)

قارا: بورادا كؤلگه آنلاميندا دير

رحمتليك عابباس بارز-ين وفاتي موناسيبتينه

دوغوم ايلي: 1300

اؤلوم ايلي: 1390/8/24

يولداشليق!

گونش چيخدي، بيري وارييدي، يوخودان دوردو، يئمه يين يئدي، راديو دينله دي، ماشينين يودو، يول لارا چيخدي، شهردن قاچدي، دينج يئر تاپدي، بير چاي قيراغي، اوجا بير آغاج، كولگه سي واردي، يولداشليق ائتدي، آغاج كؤلگه سين وئردي، يوخويا باتدي، دينج جه ياتدي، سونرا اوياندي، يئمه يين يئدي، آغاج ديبينه زيبيلين تؤكدو، دوغا باخيردي، قوش لار اوخوردو، آغاج كولگه ساليردي، بيري بيچاغين تاپدي، آغاجي اويدو، ياديگار قويدو، آغاج آغلادي، بيري بيلمه دي، وفاسيز چيخدي، دوستونو ييخدي، ييغيشدي گئتدي،‌ائوه يئتيشدي، گونش ده باتدي، بيري ده ياتدي..

بورا اورمو گؤلودور!!

بو هاوايي شكيل قيروو آييندا سالينيبدير (90/8)

گؤره سن بو گؤزل تانري نعمتيني دوشونن اولاجاق مي؟

 ايشسيز

يولوندا گئديردي و دام- دووارا باخيردي، بيري دئييردي- بيري گولوردو، بيري ساواشيردي، بيري ماشينيندا ماهني آچميشدي و سسين اوقدر چوخالتميشدي، ائله بيل اؤزگلره ايسته نيلن ماهني لاريني يايير! بيري هاراي چكيردي گلين آپارين يئرآلمانين اوچ كيلوسو ايكي مين تومن! آيخان ايسه كدرلي گئديردي، بيردن گؤزو بير كاغيذا چارپدي: ايكي نفر ساده ايشچي، قوتو باغلاماق اوچون ايسته ييريك و آشاغيدا تئلفون نومره سي ايله آدرسيني يازميشدي.

سئوينيب تئز كاغيذي دوواردان قوپارتدي و آپاريب ائودن يازديقلاري تئلفون سايي سينا زنگ آچدي. بير خانيم تئلفوندا دانيشيب و ساباحيسي گون آيخان- ا واخت وئردي. سحر تئزدن آيخان سئوينه- سئوينه يوخودان اويانيب ايشچي آختاران بيلديريشي وئرن شيركته ساري يوللاندي. آيخان شيركته كئچيب ايداري قيسمه تينه گئتدي، ايچري گيريب اورداكي آداما: «ايش اوچون گلميشم» دئدي. آدام هئچ نه سوروشمادان: «پارتين وار؟» دئدي و آيخان يوخ جوابي وئرديينده كيشي: حيرصله نيب :« آخي نه يه بيزيم واختيميزي توتوبسان  قاييت گئت » دئدي!

 يازان: حسين واحدي