تیراختور،  بایراملیغین موبارک  اولسون


یازان: حسین واحدی
شكیل:Traxtorchi.ir

اورمو-نون مركز مئیدانی

بورا اورمو-نون مركز مئیدانیدیر. اورمیه نین مهم مئیدانلاریندان بیری. آذربایجانین اوچ بؤیوك شهیدینین هئیكلی بورادادیر. اورمونون قدیم بازارینین باشلانیشی ایسه بوراداندیر. اورمویا یولو دوشنلرین چوخو بو مئیدانی تانیییرلار. بو مئیدانا یولو دوشن قوناقلار، شهیدلر باكری قارداش لاری ایله شهید امینی نین هئیكل لرینین یانیندا یادیگاری شكیل چكیب آپاریرلار. اورمودا اولان بونون خییاوان مراسیم لرینین چوخو بورادان باشلاییر و یا بورادا سونا چاتیر.

هر حالدا ایندی، اورمونون نئچه منطقه سینین اوتوبوس دوراغی (ایستگاهی) ایسه بورادادیر. بورا شهرین لاپ چوخ گئت-گل اولونان یئرلریندن دیر. بورا آنجاق اورمیه نین مركزی دیر!

بیری كوپن- كوپن سسله ییر!

بیری ایسه شهرینه موسافیر آختاریر!!

بیری كؤهنه بیر ساعات الینده ساخلاییب، ساتیر!!

بیری...

آرواد- اوشاق لار ایسه دوراق لاردا دایانیب لار. اونلار اورادا دوردوق لاری زاماندا امنیت ایله دینجلیك ایسته ییرلر. شهریمیز گؤزل دیر، بوندا سؤز یوخدور، بیر آز دقت ائدیب، زحمت چكیلسه، داها گؤزل اولاجاق دیر!

بورا مركزدیر اورمونون لاپ مهم مئیدان لاریندان...

یازان/شكیل: حسین واحدی

علی ضیایی ایله دانیشیقدا:

تئاترا ده یر وئرمه لییك..

غربی آذربایجانین تئاتر دورومونو بیلمك اوچون، اورمیه شهرینین گنج و زحمت چكنلرینین بیری اولان «علی ضیایی» ایله صمیمی دانیشیغیمیزی سیز عزیز اوخوجولاریمیزا تقدیم ائدیریك، اومود ائدیریك بو دانیشیق تئاتر اوچون فایدالی اولسون.

-        اؤزونوزو اوخوجولاریمیزا تانیتدیرین؟

من «علی ضیایی» اورمیه نین سید جاواد محلله سینده دونیایا گؤز آچمیشام و ابتدایی و اورتا تحصیلاتیمی قورتاراندان سونرا تهراندا نمایش قولوندا (ریشته سینده) لیسانس آلمیشام. من 1375 ایلینده نوكلر فیزیك بیلیمی (فیزیك هسته ای) قولونو ترك ائدیب سرباز گئتدیم و نمایش له تانیش اولدوغوم اوچون سربازلیقدان سونرا نمایش قولون اوخوموشام. لیسانسی بیتیرمكدن سونرا اورمیه یه قاییدیب، » نمایشخانه « مؤسسه سین آچمیشام و تئاتر و نمایشه علاقه سی اولانلارا بیر یئر اولماق اوچون بورانی آچماق منیم اؤزومون هدفلریمدنییدی. اورمیه ده بو قولا گئتمك اوچون هئچ بیر مؤسسه یا یول گؤسترن بیر یئر یوخویدو و بودا منی بو مؤسسه سنی آچماغیما ترغیب ائتدی.

-        خالقیمیزلا، تئاتر و یا نمایشین رابطه سین نئجه گؤرورسونوز، تئاترین جامعه یه ائتگی سی (تأثیری) نه قدردیر؟

عاییله لر ایچینده تئاتر و نمایش یئرینه دوشمه ییبدیر و هله ده چوخلاری اویونچویا (بازیگره)، مشغول ائدیجی گؤزو ایله باخیرلار، اویونچولوق حیسسی بیر ایش دیر و آكادمیك اولدوغو اوچون، قایدالی ساییلیر. تئاتر و اویونچولوق اینسانلارین عقده سین آرادان آپارماسیندا مهم رول اویناییر، جامعه نین دردلرین تئاتر ایله گؤسترمك اولور و بو آرادا تاماشاچیلارلا یاخشی بیر ایلگی قورولسا و باخانلار اؤز دردلرینی اوردا حیسس ائده بیلسه لر، اوركلری بوشالیب، راحاتلاشاجاقلار و بودا جامعه ده جدی توتولمور، بورادا تئاتری مشغول اولماق گؤزونده گؤرورلر، یعنی تئاتر باخماق ایمكانی اولورسا! هفته نین سون گونلری گئدیب نمایشه باخماق و بیر آز گولوب، باشلارین قاتیب ائوه دؤنمك دئمكدیر!

تئاتر پیسكولوژی (روانشناسی) باخیمینداندا یوكسك (عالی) درجه ده یئری وار و نمایش قالیبینده خالقیمیزا چوخ سؤزلری دئیه بیله ریك، باخساق تلویزیون دا  بعضی اؤیرتمه لری (آموزش لری) گاز،برق یا باشقا ارگان لار نمایش قالیبینده خالقیمیزا اؤیره دیرلر و بونون ائتگیسی (تأثیری) باشقا یوللاردان چوخدور.

كولتورل باسقین-ین (تهاجم فرهنگی نین) ، قاباغین آلماقدادا نمایش و تئاترین یوخاری درجه لی رولو وار، بیز اؤز كولتوروموزو دیری ساخلاماق اوچون بو موضوعیا چوخ ده یر وئرمه لیییك، میثال اوچون اورمیه نی دئسك آذربایجان بؤلگه سینین مدنییتینده بؤیوك بیر یئره مالیك دیر و شهرلشمه تاریخینده بو منطقه نین او بیری شهرلریندن داها چوخ قدیم تاریخی وار، حتتا تبریزدنده قاباقدیر و بو سبب اولور بیز كولتوروموزو ساخلاماغا لاپ چوخ زحمت چكك، آما بو مدنییتین قاباغیندا، تئاتر باخیمیندان اورمیه اؤزونه لاییق بیر یئرده دئییل و بو قُولو (رشته نی) یئنیدن دیریلدیب یوكسك یئره چاتدیرمالیییق و بو یولدادا كولتور یاراتما (فرهنگ سازی) اولماییب.

-        اوشاقلارلا تئاترین ایلگیسی نئجه دیر؟

تئاترییلا اوشاقلاریمیزین عقده سین بوشالدا بیله ریك، میثال اوچون بیزیم اؤیره تیم‌ (آموزشی) مؤسسه ده تئاتر درمانلیغی آدیندا كیلاسلاریمیز اولور و بو كیلاسدا اوشاقلارین پیسكولوژی لرینین اوستونده ایشله ییریك و نمایش قالیبینده، بوشلوق اولان یئرلری ترمیم ائدیریك و اویونلا كئچمیشده اولان عقده لر بوشالیر و بودا اوشاغی راحاتلادیر و جامعه ده راحاتجا یاشاییر و بونو یونگول توتماق، كولتوروموزه ضربه وورور.

-        سیزجه عاییله لر بو قونویا نه گؤزده باخیرلار؟

عاییله لر ایچینده تاسفله هله یئرینه دوشمه ییب و نمایش یا تئاتر ایله چوخ تانیش ده ییرلر و بیلیم یوردونا (دانشگاها) گئده نده ده بونو سئچمه یی دوشونمورلر و گئتدیكجه بو دوزه له بیلر.

-        بونا نه یوللارییلا و كیملر یاردیم (كمك) ائده بیلر؟

یاردیم ائتمك اوچون نشریه لر، رادیو – تلویزیون، مسئول لار و.. بئلنچی یاردیملارلا چوخ ایشلر گؤرمك اولار، مثلا، تورك دیلینده اولان «آداخلی» سریالینا باخساز، بو فیلمدن یاخشی استقبال اولونوب و یا بوندان اؤنجه یایینلانان «دومان» ، «آتا» و باشقا توركجه سریال لار، اؤز یئرلرین جامعه ده تاپیبلار و استقبال دا بونلاردان چوخ اولوبدور و بونلار كولتورل باسقین –ین قاباغیندا مهم رول اویناییرلار.

آما تاسف له تلویزیون تئاترا یاخشی ده یر وئرمه ییبدیر و تئاتر اوچون هئچ یاریم ساعاتلیق دا برنامه یوخدور و تئاتر اوچون هفته لیك برنامه اولسا او برنامه ده تئاتر جامعه ده تانینار و تئاترین خبرلری و چتینلیكلرده یاییلار (پخش اولار). بئلنچی ایشله ده گؤزلر تئاترا عادت ائدر و بودا جامعه ده احتیاج اولاراق یئرینه دوشر.

نشریه لرده تئاترا گؤره هئچ اولماسا بیر ستون آییریب بو موضوع یا درین باخمالیدیرلار و من اومود ائدیرم بو گئتدیكجه گؤروله جك.

مسئوللاردا مدیریت ضعفینی آرادان آپارمالیدیرلار و ده ییشیكلیك لر و برنامه سیز ایشلر تئاترین تانینماماسینا ندن (سبب) اولوبدور و اوزون مدت لی برنامه لر ایشلریمیزده یوخدور و بعضن سلیقه لی ایشلر برنامه لری قاباغا آپارمیر.

تازالیقدا دؤولتی بؤلوم لرین حمایتیده آرتیب دیر و »سازمان ملی جوانان« و »حوضه هنری« هره سی آیری – آیری فئستیواللار (جشنواره لر) آچیرلار، آمما دردیمیز بئلنچی ایشلرله حل اولمایاجاقدیر و ایشلریمیزده وحدت اولمایینجا موفق اولمایاجاییق.

تئاتر اوچون نظارت ده ضعیف دیر و بعضی خصوصی اؤیرتمه یئرلرینده اوچ آیا مدرك وئریرلر و بودا دوز ایش دئییل و تئاترا ضربه وورور.

-        تئاتر نجور بیر احتیاج ساییلا بیلر؟

باخین، اینگیلیزجه (انگلیسی) اؤیرنمك نئجه یئرینه دوشوب، چوخلاری چالیشیر بو دیلی اؤیرنسین و اؤزلرینه بیر احتیاج بیلیرلر و گرك جامعه میزده تئاتردا بئلنچی یئرده اولسون، و هامی تئاترین ده یرین بیلسین. بیر مهندیش، دوكتور، بسله ییجی (پرستار) و... خالقیمیزلا داورانیش لارین (رفتارلارین) باجارا بیلسه لر چوخ چتین لیك لر قاباغا گلمز و یا بعضی آتا – آنالار اوشاقلارلا مختلف موقعیت لرده نئجه داورانسینلاری بیلمه ییرلر، یعنی نه زامان حیرصله نیب و نه زامان تشویق ائتسیملر و حیرصله ننده دوغرودان حیرصله نیرلر و بعضن ائله ایشلر گؤرورلر، اوشاقلاردا پیس خاطیره یارانیر و اؤزلریده سونرادان پئشمان اولورلار. تئاتر چون نمایش دیر بوتون داورانیشلار نمایشی دیر و هئچ كیم دوغرودان حیرصلنیب اؤزونده راحاتسیز ائتمیر و بو نمایشی حیرصلنمه یی ده اؤز داورانیشیمیزا گتیرمه لیییك و بونو دوشونسك تئاترا باخماق و بو حیسس لری باجارماق بیزه احتیاج ساییلار.

آرتیق دئسك، تئاتر احتیاج دیر، تفریح و باش قاتما دئییل، قونشو اؤلكه لرده مثلن آذربایجان جومهورییه تینده «آرشین مال آلان» و «مشدی عیباد» ، نمایش لری خالق ایچینده اؤزلرینه یئر آچیبلار و حتتا دانیشیقلاریندادا تأثیر قویوبدور و یا آوروپادا «شكسپیر» نومایش لرین میثال وورماق اولار.

حتتا فرانسه نی دئسك، بو اؤلكه ده تئاتر عاییله لر ایچینده یاخشی بیر حیسس یارادیب و دئیلر لر فرانسه لینین هفته سونو تكجه ایكی دولاری اولسا، بیر دولارین تئاتر اوچون آییراجاقدیر.

تئاتر جانلی (زنده) اولدوغو اوچون تأثیری تلویزیوندان داها قاباقدیر، چون تئاتردا اویونچویلا، باخانلار اوز – اوزه و نفس – نفسه دیرلر و هر نه جانلی دیر و حتمن ده تأثیری یوخاری اولاجاق دیر و منجه عاییله لر تئاتری اؤزلرینه احتیاج بیلمه یینجه، تئاتر یئرینه دوشمه یه جك.

-        تئاتر، اوخویانلار بیزیم اوستاندا نه چتینلیكلرله اوز – اوزه دیرلر؟

تئاتر اوخویانلار اوچون ایش زمینه سی اوستانیمیزدا یوخدور و بودا، اونلاری تهرانا یا باشقا شهرلرده ایش تاپیلان شهرلره گئتمه لرینه ندن (سبب) اولور، ائله ایش گؤرمه لیییك، بئلنچی اینسانلاریمیز درس لرین قورتاراندان سونرا اؤز اوستانیمیزا قاییتسینلار.

-        سونوندا نه دمك ایسته رسینیز، بویورون؟

یئری وار، كئچمیشده تئاترا زحمت چكنلرینده آدلارین آپارام، البته چوخونون آدی یادیمدا دئییل آما هر حالدا یادیمدا قالانلاردان؛ آغالار غلامرضا عزیزی، جلیل آغداشی، جلال ذوالقدر، خسرو دستگیر، رحمتلیك بهمن احمری، رحمتلیك شهریار جعفر دوست ،... و ایندیكی نسیل دن، پدرام رحمانی، بابك لطفی، حامد اسماعیل وند، كریم علی خواه (كریم بی، فجر فئستیوالینا كیمی ایش آپاریب دیر) و... بو عزیزلریمیز و آدلاری یادیمدا اولمایان چوخلو عزیزلر، تئاتردا  و اؤیرتیمده (آموزش ده) زحمت چكیب و چكیرلر.

سونوندا سیزدنده بو موضوع یا ده یر وئردییینیزه گؤره تشككور ائدیرم و اومود ائدیرم، بو دانیشیق  بو موضوعنون جامعه ده یئر تاپماسینا، بیر باشلانیش اولا.

دانیشیغی آپاران: حسین واحدی

قولونجولو عبد الرحمان طیار، آذربایجان-ین آدلیم ایله گوجلو شاعیری، 1304-ونجو گونش ایلینده بؤیوك و تانینمیش «قولونجو» كندینده، بیر اكینچی عاییله ده دونیایا گؤز‌آچیب دیر. اوستاد طیار 16 یاشیناجان قولونجودا اكینچیلیك ایله مشغول اولموشدور. ابتدایی تحصیلاتینی انزل ماحالینین تكجه  مدرسه سی اولان «قوشچو مدرسه»-سینده كئچیرتمیشدی. تحصیلاتینین قالانین قونشو اؤلكه، توركیه ده كئچیریر و سونرالار، اوروس لار، آذربایجانی اشغال ائتدیكدن سونرا آتاسینین امری ایله ایرانا دؤنور. بو اشغال سونا چاتدیقدان سونرا بیر داها توركیه یه قاییدیر.  تحصیلاتی بیتیردیكدن سونرا وطنه قاییدیب، عسگرلین ایسه قورتاریب، 26 یاشیندا 1330-دا ائوله نیر. اوستادین 14 اوغلو و 9 قیزی واردیر.

رحمتلیك اوستادین اؤز دئدیگینه گؤره، مجازی سئوگی دن، حقیقی سئوگی یه چاتاندان سونرا شعر دئمه گه باشلاییب دیر. اوستادین بوتون شعرلری توركجه دیر. اونون اثرلریندن، «اینجلی صدف» ، «اورمو گؤلو منظومه سی» ، «گونوموز آیدین» و ... آد آپارماق اولار.

اوستاد دده كاتیب، اؤز آنا دیلی توركجه دن سونرا، فارسجا، عربجه و كوردجه دیللرینی باجاریب، روسجا و آشورجا دیللری ایله ده تانیش ایدی.

بو بؤیوك و دَیرلی اوستادین عرفانی شخصیتی وارییدی و «قورآن كریم»-ی تفسیر ائده بیلیردی. او قوجالیق چاغلاریندا ایسه مطالعه و چالیشماق دان ال چكمه ییب، «هر گون بیر بیلیم سل(علمی) سؤزو و یا اؤزگه دیللریدن بیر كلمه اؤیرنمه سم، دینج یاتا بیلمرم» - دئیردی.

رحمتلیك دده كاتیب، 1387-ینجی ایلین بایرام(اسفند) آیینین ایكی سینده، دونیاسین دَییشیب، اؤز آنا یوردو قولونجودا، توپراغا تاپشیریلدی.

او اوستاددان بیر شعر:

 آپارار

سئل گاهلاردا بوستان اکمه             گول واختیندا سئل آپارار

کیشی لیگین هیبتینی                    چوخ دانیشان دیل آپارار

معلول اولماز بلا علت                  غیرتسیزه چکمه غیرت

احسان اوسته قویسان منت             ثوابینی یئل آپارار

اثر قویار سؤزون دوزو                 سَكسنی،دوخسانی،یوزو

دوستا خایین باخان گؤزو               سورمه باتار میل آپارار

دده کاتیب حقه اینان                     حق سؤزله رین ائیله بیان

قوجا کیشی آلسا جوان                  خرجی باتار ائل اپارار

آشیق دهقان فرقلی بیر اینسان

آشیق دهقان:

آشیق سس سیز لرین سسیدیر

شهامت نشریه سینین یاییلماسینین ایلك گونوندن آذربایجان آشیق صنعتینه ده یر وئرمك و بو یولدا جاندان- اوركدن امك چكنلری یوخلاماق و ائلیمیزه تانیتدیرماق بیزیم اصلی وظیفه لریمیزدن اولوب دور. بو یولون اوزوناسیندا بو ساییمیزدا آذربایجانین مهم و بؤیوك آشیق لاریندان بیری اولان آشیق «محمد حسین دهقان» ایله دانیشیق آپارمیشیق. آشیق دهقانی تانیتدیرماق لازیم دئییل و ائلیمیزین هامیسی بو قوجاماق كیشینین اؤزو و سسی ایله تانیشدیر. آشیق دهقان صمیمیت له بیزیم دانیشماغیمیزی قبول ائدیب و قیسادا اولمالی اولسا اورك سؤزلرینی سیز عزیزلریمیزله پایلاشیب دیر.

آشیق دهقان، كسینلیك له آذربایجانیمیزین قالارگی وارلیق لاریندان بیریدیر. آشیق دهقان، بوتون میللی و اولوسلار آراسی فئستیواللاردا ایشتیراك ائدیب و آذربایجان موسیقیسینی دونیایا تانیتدیرماغا الیندن گلنی اسیرگه مه ییب دیر. آشیق لاتین آمریكا، فرانسه، آلمان، سوئد، آذربایجان جومهوریتی، توركیه و ... اؤلكه لرینده مختلف موسابیقه لرده و فئستیواللاردا قاتیلماقلا اونلارجا قیزیل بویون باغی و لؤوحه لر قازانیب دیر. خاطیرلاتمالیییك آشیق كئچن ایللرده موسیقی دوكتوراسین آلیب دیر. 

ـ آشیق، اؤزونوزو اوخوجولاریمیزا تانیتدیرین لوتفن.

منیم كیچیك آدیم «محمد حسین» و سوی آدیم (شهرتیم)، «دهقان» -دیر. 1313/12/10 –دا اورمیه نین ایگدیر كندینده آنادان اولموشام. اوشاقلیغیمدان آشیقلیغا علاقه تاپمیشدیم. آتام بو ایشیمله موخالیفییدی و 3-4 سازیمیدا سیندیرمیشدی. آمما آنام آشیق اولدوغومدا منه چوخ یاردیمجی اولوبدور. اوشاقلیق واختی، آشیق لار كندین قهوه خاناسینا گلنده آنام لا بیرلیكده قهوه خانانین آرخا پنجره سیندن گیزلیجه اونلارا قولاق آساردیق.

ـ اوستادلارینیز كیم لر اولوب لار؟

منیم اصلی و بؤیوك اوستادیم اوولده آنام اولوب دور. آنامدان، «قولام حیدر»، «سیدی» و «احمد ایبراهیم» داستانلارین اؤیرنمیشم. 14 یاشیمدان مجلیسلره قاتیلاردیم. كدولاردان اؤزومه ساز قاییریب، چالاردیم و اوشاق لیغیمدان الیمده ساز اولدوغو اوچون، سونرالار رحمتلیك آشیق «درویش» ایله بیرلیكده، رحمتلیك آشیق «فرهاد»-ین یاینیا گئدیب، آشیقلیغین اوصول لارینی اوندان اؤیرنمیشم. دئدیگی سؤزلرین باشینی یازیب، قالانین ازبر ائدردیم.

آشیق فرهاد، قدیم قاپاندا، كئچه چیلر كوچه سینده اولاردی و سونسوزویدو. تاسف له آشیق فرهاد رحمتلییین قبیریندن صاحاب چیخیلماییب و آغا قبیرینده پوزولوب آرادان گئدیب دیر و كیمسه صاحاب چیخماییب دیر.

ـ آشیق نئچه نفر شاگیردینیز اولوب دور؟

منیم 22 نفر شاگیردیم اولوب دور. بعضی لری حوضوری و بعضی لری ایسه كاسئتلریمله منیم شاگیردیم اولوبلار. اونلاردان، آشیق بولود ساعد، آشیق حئیدر نیرومند، آشیق هیدایت، آشیق حمید عباسزاده، آشیق علی قره آغاجی،آشیق محمد، آشیق باهار،آشیق آللاه وئردی، آشیق مناف و... آد آپارا بیلرم.

ـ آلدیغینیز میدال لاردان و لؤوحه لردن اوخوجولاریمیزا دئیه سینیز.

منیم یوزلرجه تقدیر لؤوحه واریمدی. اونلارین چوخون وزیرلردن اؤزللیكله اسلامی ایرشاد وزیریندن آلمیشام. منیم توركیه، فرانسه، آلمان، ایرانیمیزین اؤزوندن، تندیس و میدالیم وار. افتخاری دیپلم، دوكتورا و گواهینامه م واردی. دوكتورانی و داورلیك كارتیمیدا كرماندان آلمیشام.

ـ یاشاییش نیزین فیلمینیده، چكیبلرمی؟

بلی، منیم یاشاییشیمی تقریبا 22 ایل بوندان اؤنجه تئهرانین حوضه هنری سی، آتا- آنام ساغ اولان زامان فیلمه چكیبلر. اوندان سونرا اورمیه-ده ده تازالیق دا بو ایش باشلانیب و آز قالیر قورتولا. همده آذربایجان جومهورییتینده ده بو ایش باشلانماق اوزره دیر. اورمیه ده فیلم وحدت تالاریندا چكیلنده اینه سالماغا یئر یوخویدو، او زامان آتام ایله آنامدا ساغییدیلار و چوخلو یئرلردنده فیلمیمی چكیب لر.

ـ بیمه نیزدن و امكلی اولدوغونوز نئجه اولوبدور؟

بیمه دئییلم، هنرمندلرین دفتریندن امكلی اولموشام. اینقیلابدان اؤنجه بیمه یدیم و اینقیلابدان سونرا گئتدیكجه بیمه میز كسیلدی. منی بوتون فئستیوال لارادا هنرمندلرین دفتری چاغیریب دیر.

ـ گلیرینیز آشیق صنعتیندن اولوبمو یوخسا باشقا یئردن؟

منیم آتا- بابادان كندیمیزده یئریمیز اولوب و اكینچیلیكله مشغول اولموشام و گلیریمین چوخو بو یولدان اولوبدور. آشیق لیقداندا گلیریم اولوبدور و الیمه گلنی یئنه ده باغ-باخچایا وئرمیشم و تانریدان راضی یام.

ـ سؤزلرینیز و آشیق هاوالارینی چاپ ائدیبسیزمی؟

یوخ من كیتاب چاپ ائتمه میشم. 77 هاوامیز وار و هامیسین من ازبرم و هامیسیده یازیلیب همده CD –لری واردیر. هامیسین بیر-بیر چالیب اوخویا بیله رم.

ـ آشیق صنعتینده ان چوخ هاوالاری بیلن سیزسینیز، گله جك نسیل لره بونلاری نئجه یادیگار قویاجاقسینیز؟

منیم 142 كاسئت و اللی یه یاخین سی دیم واردیر و هامیسی ضبط اولوب ساخلانیلیب دیر. علاقه سی اولانلار بونلاری آلیب فایدالانا بیلرلر. بیزیم دؤولتیمیزده هنرمندلرین اثرلرین ساخلاییب، گنج لره گؤستریب هاوالاری اونلارا اؤیرتمه لیدیرلر و بو ایشله آشیق لارین اثرلری قالارگی اولاجاق دیر.

ـ آشیق صنعتی نی اورمیه ده و اوستانیمیزدا نئجه گؤروروسونوز؟

آشیق لار چالیشیر و یاشاییرلار، آمما آرخالاریندا دوران یوخدور. بعضن اذیت اولورلار و آشیق صنعتی یاشایاجاق دیر و گرك حمایت اولوناق و بونو یاشاداق.

ـ اورك سؤزونوز؟

مسئول لاردان ایسته ییرم بو صنعت دن صاحاب اولوب، گله جك نسیل لره ساخلاسینلار. منیم یئتمیش یئددی یاشیم وار و هر كیمسه یه تای بیر گون بو دونیادان كؤچه جه یم، آمما بو صنعت قالمالیدیر. بو بیزیم آنا دیلیمیزدیر، بیز دیلسیزلرین دیلیییك، سسسیزلرین سسی ییك، ائلین سؤزون دئییریك، اوركده قالان سؤزلری دئیه نیك، ائل سئونی سئویریك و ائل دئیه بیلمه ین سؤزلری دئییریك. بو صنعت (هنر) دیر، معریفت دیر، حقیقت دن دانیشان دیر، ایسلامیتی ساخلایان صنعتیدیر. آشیق، عالیم و عاریف ایسلامی ساخلامالیدیرلار. اؤزگه لرین كولتورنون قاباغیندا دورماق اوچون اؤز صنعتیمیزی قورومالیییق. رادیو- تلویزیوندادا بو صنعتی یاییب ساخلامالییق. اوندا اؤز موسیقیمیز اولان یئرده گنج لریمیز اؤزگه موسیقی اوخوتمازدیلار و اؤز كولتوروندن فایدالانارلار. سیزدنده منی یوخلادیغینیز اوچون تشككور ائدیرم.

*دانیشیغی آپاران: حسین واحدی

فوتبالیست ها نشریه سینین 74-ونجو سایی سی یاییلدی

آذربایجان ایدمانینین تكجه حمایه ائدن نشریه سینین یئنی ساییی سی یاییلدی. بو نشریه نی یولداشلارینیزا تانیتدیریب و آلماق ایله آذربایجان ایدمانیندان حمایه ائدین.