اورمو-نون مركز مئیدانی
اورمو-نون مركز مئیدانی
|
|
|||
|
|||
بورا اورمو-نون مركز مئیدانیدیر. اورمیه نین مهم مئیدانلاریندان بیری. آذربایجانین اوچ بؤیوك شهیدینین هئیكلی بورادادیر. اورمونون قدیم بازارینین باشلانیشی ایسه بوراداندیر. اورمویا یولو دوشنلرین چوخو بو مئیدانی تانیییرلار. بو مئیدانا یولو دوشن قوناقلار، شهیدلر باكری قارداش لاری ایله شهید امینی نین هئیكل لرینین یانیندا یادیگاری شكیل چكیب آپاریرلار. اورمودا اولان بونون خییاوان مراسیم لرینین چوخو بورادان باشلاییر و یا بورادا سونا چاتیر.
هر حالدا
ایندی، اورمونون نئچه منطقه سینین اوتوبوس
دوراغی (ایستگاهی) ایسه بورادادیر. بورا شهرین لاپ چوخ گئت-گل اولونان یئرلریندن
دیر. بورا آنجاق اورمیه نین مركزی دیر!
بیری كوپن- كوپن سسله ییر!
بیری ایسه شهرینه موسافیر آختاریر!!
بیری كؤهنه بیر ساعات الینده ساخلاییب، ساتیر!!
بیری...
آرواد- اوشاق لار ایسه دوراق لاردا دایانیب لار. اونلار اورادا دوردوق لاری زاماندا امنیت ایله دینجلیك ایسته ییرلر. شهریمیز گؤزل دیر، بوندا سؤز یوخدور، بیر آز دقت ائدیب، زحمت چكیلسه، داها گؤزل اولاجاق دیر!
بورا مركزدیر اورمونون لاپ مهم مئیدان لاریندان...
یازان/شكیل: حسین واحدی
علی ضیایی: تئاترا دَیر وئرمه لییك
علی ضیایی ایله دانیشیقدا:
تئاترا ده یر وئرمه لییك..
غربی آذربایجانین تئاتر دورومونو بیلمك اوچون، اورمیه شهرینین گنج و زحمت چكنلرینین بیری اولان «علی ضیایی» ایله صمیمی دانیشیغیمیزی سیز عزیز اوخوجولاریمیزا تقدیم ائدیریك، اومود ائدیریك بو دانیشیق تئاتر اوچون فایدالی اولسون.
- اؤزونوزو اوخوجولاریمیزا تانیتدیرین؟
من «علی ضیایی» اورمیه نین سید جاواد محلله سینده دونیایا گؤز آچمیشام و ابتدایی و اورتا تحصیلاتیمی قورتاراندان سونرا تهراندا نمایش قولوندا (ریشته سینده) لیسانس آلمیشام. من 1375 ایلینده نوكلر فیزیك بیلیمی (فیزیك هسته ای) قولونو ترك ائدیب سرباز گئتدیم و نمایش له تانیش اولدوغوم اوچون سربازلیقدان سونرا نمایش قولون اوخوموشام. لیسانسی بیتیرمكدن سونرا اورمیه یه قاییدیب، » نمایشخانه « مؤسسه سین آچمیشام و تئاتر و نمایشه علاقه سی اولانلارا بیر یئر اولماق اوچون بورانی آچماق منیم اؤزومون هدفلریمدنییدی. اورمیه ده بو قولا گئتمك اوچون هئچ بیر مؤسسه یا یول گؤسترن بیر یئر یوخویدو و بودا منی بو مؤسسه سنی آچماغیما ترغیب ائتدی.
- خالقیمیزلا، تئاتر و یا نمایشین رابطه سین نئجه گؤرورسونوز، تئاترین جامعه یه ائتگی سی (تأثیری) نه قدردیر؟
عاییله لر ایچینده تئاتر و نمایش یئرینه دوشمه ییبدیر و هله ده چوخلاری اویونچویا (بازیگره)، مشغول ائدیجی گؤزو ایله باخیرلار، اویونچولوق حیسسی بیر ایش دیر و آكادمیك اولدوغو اوچون، قایدالی ساییلیر. تئاتر و اویونچولوق اینسانلارین عقده سین آرادان آپارماسیندا مهم رول اویناییر، جامعه نین دردلرین تئاتر ایله گؤسترمك اولور و بو آرادا تاماشاچیلارلا یاخشی بیر ایلگی قورولسا و باخانلار اؤز دردلرینی اوردا حیسس ائده بیلسه لر، اوركلری بوشالیب، راحاتلاشاجاقلار و بودا جامعه ده جدی توتولمور، بورادا تئاتری مشغول اولماق گؤزونده گؤرورلر، یعنی تئاتر باخماق ایمكانی اولورسا! هفته نین سون گونلری گئدیب نمایشه باخماق و بیر آز گولوب، باشلارین قاتیب ائوه دؤنمك دئمكدیر!
تئاتر پیسكولوژی (روانشناسی) باخیمینداندا یوكسك (عالی) درجه ده یئری وار و نمایش قالیبینده خالقیمیزا چوخ سؤزلری دئیه بیله ریك، باخساق تلویزیون دا بعضی اؤیرتمه لری (آموزش لری) گاز،برق یا باشقا ارگان لار نمایش قالیبینده خالقیمیزا اؤیره دیرلر و بونون ائتگیسی (تأثیری) باشقا یوللاردان چوخدور.
كولتورل باسقین-ین (تهاجم فرهنگی نین) ، قاباغین آلماقدادا نمایش و تئاترین یوخاری درجه لی رولو وار، بیز اؤز كولتوروموزو دیری ساخلاماق اوچون بو موضوعیا چوخ ده یر وئرمه لیییك، میثال اوچون اورمیه نی دئسك آذربایجان بؤلگه سینین مدنییتینده بؤیوك بیر یئره مالیك دیر و شهرلشمه تاریخینده بو منطقه نین او بیری شهرلریندن داها چوخ قدیم تاریخی وار، حتتا تبریزدنده قاباقدیر و بو سبب اولور بیز كولتوروموزو ساخلاماغا لاپ چوخ زحمت چكك، آما بو مدنییتین قاباغیندا، تئاتر باخیمیندان اورمیه اؤزونه لاییق بیر یئرده دئییل و بو قُولو (رشته نی) یئنیدن دیریلدیب یوكسك یئره چاتدیرمالیییق و بو یولدادا كولتور یاراتما (فرهنگ سازی) اولماییب.
- اوشاقلارلا تئاترین ایلگیسی نئجه دیر؟
تئاترییلا اوشاقلاریمیزین عقده سین بوشالدا بیله ریك، میثال اوچون بیزیم اؤیره تیم (آموزشی) مؤسسه ده تئاتر درمانلیغی آدیندا كیلاسلاریمیز اولور و بو كیلاسدا اوشاقلارین پیسكولوژی لرینین اوستونده ایشله ییریك و نمایش قالیبینده، بوشلوق اولان یئرلری ترمیم ائدیریك و اویونلا كئچمیشده اولان عقده لر بوشالیر و بودا اوشاغی راحاتلادیر و جامعه ده راحاتجا یاشاییر و بونو یونگول توتماق، كولتوروموزه ضربه وورور.
- سیزجه عاییله لر بو قونویا نه گؤزده باخیرلار؟
عاییله لر ایچینده تاسفله هله یئرینه دوشمه ییب و نمایش یا تئاتر ایله چوخ تانیش ده ییرلر و بیلیم یوردونا (دانشگاها) گئده نده ده بونو سئچمه یی دوشونمورلر و گئتدیكجه بو دوزه له بیلر.
- بونا نه یوللارییلا و كیملر یاردیم (كمك) ائده بیلر؟
یاردیم ائتمك اوچون نشریه لر، رادیو – تلویزیون، مسئول لار و.. بئلنچی یاردیملارلا چوخ ایشلر گؤرمك اولار، مثلا، تورك دیلینده اولان «آداخلی» سریالینا باخساز، بو فیلمدن یاخشی استقبال اولونوب و یا بوندان اؤنجه یایینلانان «دومان» ، «آتا» و باشقا توركجه سریال لار، اؤز یئرلرین جامعه ده تاپیبلار و استقبال دا بونلاردان چوخ اولوبدور و بونلار كولتورل باسقین –ین قاباغیندا مهم رول اویناییرلار.
آما تاسف له تلویزیون تئاترا یاخشی ده یر وئرمه ییبدیر و تئاتر اوچون هئچ یاریم ساعاتلیق دا برنامه یوخدور و تئاتر اوچون هفته لیك برنامه اولسا او برنامه ده تئاتر جامعه ده تانینار و تئاترین خبرلری و چتینلیكلرده یاییلار (پخش اولار). بئلنچی ایشله ده گؤزلر تئاترا عادت ائدر و بودا جامعه ده احتیاج اولاراق یئرینه دوشر.
نشریه لرده تئاترا گؤره هئچ اولماسا بیر ستون آییریب بو موضوع یا درین باخمالیدیرلار و من اومود ائدیرم بو گئتدیكجه گؤروله جك.
مسئوللاردا مدیریت ضعفینی آرادان آپارمالیدیرلار و ده ییشیكلیك لر و برنامه سیز ایشلر تئاترین تانینماماسینا ندن (سبب) اولوبدور و اوزون مدت لی برنامه لر ایشلریمیزده یوخدور و بعضن سلیقه لی ایشلر برنامه لری قاباغا آپارمیر.
تازالیقدا دؤولتی بؤلوم لرین حمایتیده آرتیب دیر و »سازمان ملی جوانان« و »حوضه هنری« هره سی آیری – آیری فئستیواللار (جشنواره لر) آچیرلار، آمما دردیمیز بئلنچی ایشلرله حل اولمایاجاقدیر و ایشلریمیزده وحدت اولمایینجا موفق اولمایاجاییق.
تئاتر اوچون نظارت ده ضعیف دیر و بعضی خصوصی اؤیرتمه یئرلرینده اوچ آیا مدرك وئریرلر و بودا دوز ایش دئییل و تئاترا ضربه وورور.
- تئاتر نجور بیر احتیاج ساییلا بیلر؟
باخین، اینگیلیزجه (انگلیسی) اؤیرنمك نئجه یئرینه دوشوب، چوخلاری چالیشیر بو دیلی اؤیرنسین و اؤزلرینه بیر احتیاج بیلیرلر و گرك جامعه میزده تئاتردا بئلنچی یئرده اولسون، و هامی تئاترین ده یرین بیلسین. بیر مهندیش، دوكتور، بسله ییجی (پرستار) و... خالقیمیزلا داورانیش لارین (رفتارلارین) باجارا بیلسه لر چوخ چتین لیك لر قاباغا گلمز و یا بعضی آتا – آنالار اوشاقلارلا مختلف موقعیت لرده نئجه داورانسینلاری بیلمه ییرلر، یعنی نه زامان حیرصله نیب و نه زامان تشویق ائتسیملر و حیرصله ننده دوغرودان حیرصله نیرلر و بعضن ائله ایشلر گؤرورلر، اوشاقلاردا پیس خاطیره یارانیر و اؤزلریده سونرادان پئشمان اولورلار. تئاتر چون نمایش دیر بوتون داورانیشلار نمایشی دیر و هئچ كیم دوغرودان حیرصلنیب اؤزونده راحاتسیز ائتمیر و بو نمایشی حیرصلنمه یی ده اؤز داورانیشیمیزا گتیرمه لیییك و بونو دوشونسك تئاترا باخماق و بو حیسس لری باجارماق بیزه احتیاج ساییلار.
آرتیق دئسك، تئاتر احتیاج دیر، تفریح و باش قاتما دئییل، قونشو اؤلكه لرده مثلن آذربایجان جومهورییه تینده «آرشین مال آلان» و «مشدی عیباد» ، نمایش لری خالق ایچینده اؤزلرینه یئر آچیبلار و حتتا دانیشیقلاریندادا تأثیر قویوبدور و یا آوروپادا «شكسپیر» نومایش لرین میثال وورماق اولار.
حتتا فرانسه نی دئسك، بو اؤلكه ده تئاتر عاییله لر ایچینده یاخشی بیر حیسس یارادیب و دئیلر لر فرانسه لینین هفته سونو تكجه ایكی دولاری اولسا، بیر دولارین تئاتر اوچون آییراجاقدیر.
تئاتر جانلی (زنده) اولدوغو اوچون تأثیری تلویزیوندان داها قاباقدیر، چون تئاتردا اویونچویلا، باخانلار اوز – اوزه و نفس – نفسه دیرلر و هر نه جانلی دیر و حتمن ده تأثیری یوخاری اولاجاق دیر و منجه عاییله لر تئاتری اؤزلرینه احتیاج بیلمه یینجه، تئاتر یئرینه دوشمه یه جك.
- تئاتر، اوخویانلار بیزیم اوستاندا نه چتینلیكلرله اوز – اوزه دیرلر؟
تئاتر اوخویانلار اوچون ایش زمینه سی اوستانیمیزدا یوخدور و بودا، اونلاری تهرانا یا باشقا شهرلرده ایش تاپیلان شهرلره گئتمه لرینه ندن (سبب) اولور، ائله ایش گؤرمه لیییك، بئلنچی اینسانلاریمیز درس لرین قورتاراندان سونرا اؤز اوستانیمیزا قاییتسینلار.
- سونوندا نه دمك ایسته رسینیز، بویورون؟
یئری وار، كئچمیشده تئاترا زحمت چكنلرینده آدلارین آپارام، البته چوخونون آدی یادیمدا دئییل آما هر حالدا یادیمدا قالانلاردان؛ آغالار غلامرضا عزیزی، جلیل آغداشی، جلال ذوالقدر، خسرو دستگیر، رحمتلیك بهمن احمری، رحمتلیك شهریار جعفر دوست ،... و ایندیكی نسیل دن، پدرام رحمانی، بابك لطفی، حامد اسماعیل وند، كریم علی خواه (كریم بی، فجر فئستیوالینا كیمی ایش آپاریب دیر) و... بو عزیزلریمیز و آدلاری یادیمدا اولمایان چوخلو عزیزلر، تئاتردا و اؤیرتیمده (آموزش ده) زحمت چكیب و چكیرلر.
سونوندا سیزدنده بو موضوع یا ده یر وئردییینیزه گؤره تشككور ائدیرم و اومود ائدیرم، بو دانیشیق بو موضوعنون جامعه ده یئر تاپماسینا، بیر باشلانیش اولا.
دانیشیغی آپاران: حسین واحدی
باغبان قیزی / اوستاد علی نشانی
دَیرلی اوستاد علی نشانی بی، 1332-ینجی گونش ایلینده بیر قالارگی شعر دئییب دیر. سونرالار بو شعر خالق ماهنی سی ایله دیللر ازبری اولوبدور. اوستا اؤزو بو شعره گؤره بئله دئییب دیر:
باغبان قیزی منیم مایل اولدوغوم بیر قیزایدی. اونون آتاسی گول باغبانی اولدوغونا گؤره من شعریمده اونا «باغبان قیزی» آدی قویدوم جاوانلیق و ان گوجلو و ایمانچی زامانلاریم ایدی. بزازلیق ایشینه مشغول ایدیم. نهایت همین قیز منه قسمت اولمادی. بو شعریم بسته كار آهنگ ساز» موسیقی معلمی اسماعیل شاكری وسیله سی ایله ماهنیا تبدیل اولدو. اورمیه رادیوسوندا و خلق آراسیندا مجلسلرده بیر زامان اوخونوب دوام ائتدی.تهران رادیوسوندان آذربایجان اوخویانی مرحوم مصطفی پایان وسیله سی ایله اوخوندو و بیر خالق ماهنیسی كیمی دیللره دوشدو.
باغبان قیزی
ای خومار باخیشلی باغبان قیزی
چادراسی سورمه یی گولو قیرمیزی
گؤزون خومارلادیر گؤیده اولدوزو
آمان باغبان قیزی، جان باغبان قیزی
یاناغی قیرمیزی، جان باغبان قیزی
بازاردا ساتدیغیم شالدی قوماشدی
گؤردوم باغبان قیزین دیلیم دولاشدی
باخدیم گردنبنده گؤزوم قاماشدی
آمان باغبان قیزی، جان باغبان قیزی
یاناغی قیرمیزی، جان باغبان قیزی
من ده بیر اوغلانام صاف و صادقم
ثروت آختارمیرام حوسنه عاشیقم
جمالین گؤرمگه خیلی شایقم
آمان باغبان قیزی، جان باغبان قیزی
یاناغی قیرمیزی، جان باغبان قیزی
خوش بئجریب آتان گوللردن سنی
یاخشی ائشیتمیشدیم دیللردن سنی
ایسته سم آلاردیم اللردن سنی
آمان باغبان قیزی، جان باغبان قیزی
یاناغی قیرمیزی، جان باغبان قیزی
باهار1332
حاضیرلایان: حسین واحدی
تیراختور سئوگیسی
تیراختور سئوگیسی
یازان: حسین واحدی
نئچه ایل بوندان اؤنجه، یولداشیم ایله بیرلیكده، كیتاب آلماق اوچون، اورمودان تبریز گئتدیك. اومو گؤلونو گمی ایله كئچدیك. (او زامان كؤرپو قورتولماییب، اورمو گؤلو ایسه سولویدو!)
ایكی ـ اوچ ساعاتدان سونرا تبریزه یئتیشدیك. گون اورتایادك ایسته دیگیمیز یئرلره گئدیب، ایشلریمیزی بیتیردیكدن سونرا، بیر آز یئمك یئییب، اورمویا قاییتماغی دوشوندوك. ساعات مئیدانینا یئتیشدیكده، ایچی تیراختور یانداشلاری ایله دولو اولان اوتوبوسلار ایله شوشه لریندن قیرمیزی بایراق لارین ائشیگه چیخماسی بیزیم ماراقیمیزی اؤزلرینه چكدیلر. بوندان- اوندان سوروشاندان سونرا، بوگون تیراختورون بیرینجی لیگ ده اویونو اولدوغونو آنلادیق. (او زامان تیراختور اوستون لیگ ده دئییل دی). یولداشیم لا بیرلیك ده استادیوما گئتمك قرارینا گلدیك. اوچ كیشی، آیری یانداش ایله بیرلیكده بیر تاكسی توتوب، استادیوما ساری یولا دوشدوك.
استادیوما یاخینلاشدیقجا، یول داها باساراق اولوردو. استادیومون اؤز یولونون باشلانیشی باغلانمیشدی و بیزده تاكسی دن دوشوب، دره- تپه ایله اؤزوموزو بیرینجی دؤنه اولاراق گؤردویوموز "یادگار امام" استادیومونا یئتیردیك. استادیومون چوخو دولموشدو. بیلئط آلیب ایچری گیرمه یی باجاردیق. اورگیمیزده سئوینج الیندن یئر یوخویدو!
اویون باشلانمیشدی و تیراختور نه قدر یورویوردو، رقیبین باغلی قاپیسینا توش گلیردی. بوتون استادیوم بیرلیكده "یاشاسین آذربایجان"، "یاشاسین تیراختور" دئییردی. گؤزلریمدن سئوینج سویو داشیب-آشیردی!
ایكینجی یارینین اورتالاریندایدیق. گونش گئتمك ایسته ییردی. بیز ایسه اورمویا قاییتماغا گئجیكمیشدیك. استادیومو ترك ائدیب، اؤزوموزو ترمینالا یئتیریب، اورمویا قاییتدیق. نئچه ساعاتدان سونرا اورمویا چاتیب، ائولریمیزه دؤندوك. ائوده تلویزیونون ایدمان خبرلرین گودوب، تیراختورون اودما خبرین ائشیدنده داها چوخ سئویندیم...
ایندی، او ایلدن 5-6 ایل كئچیر. آزی اون دؤنه ایلك گئتدیگیمیز استادیوما گئتمیشیك. تیراختور اوستون لیگ گلیب و رقیب لرین آمانین كسیب. بوتون آذربایجان تیراختور اولوب. بوتون استادیوم لار تیراختور یانداشینین آیاغی آلتیندا قالیب. رقیب لرین اوره گی، قورخودان پارتلامایا قرار وئریب. كوچه لرده دووارلار تیراختور آدی ایله بزه نیب. اورمودا، تبریزده، زنگاندا، اردبیل ده و ...، هر یئرده آذربایجانلی واراوره گینده تیراختور سئوگیسی یارانیب و تیراختورو یاشادیر...!
- بو یازی، فوتبالیست ها نشریه سینین 73-ونجو ساییسیندا چاپ اولوبدور.
اورمیه - هر زامان والیبال!
اورمیه ده هر یئرده والیبال اویونلاری!
شكیللر: مهر خبر آژانسی
اسفندیار اصغر خانی
شاعیرلر مجلسینین سون نشانلاریندان "علی نشانی"
شكیل لر: حسین واحدی
شاعیرلر مجلسینین سون یادیگارلاریندان بیریسی ده بو گون اورمو شهرینده یاشایان قوجامان شاعیریمیز اوستاد علی نشانی اولموشدور . بو آغ ساققال شاعیریمیز گونش ایلی 1305 ینجی ایل آذربایجان جمهوریتینین قازاق شهرینده دوغولموشدور . تقریبا 17 یاشیندان شعر دئمه یه باشلایان علی نشانی 1312 ینجی ایل بو تای آذربایجانا آتلایب ؛ اورمو شهرینده مسکونلاشمیشلار . گنج شاعیرین ایلکین شعرلری گئچمیش شوروی لرین یوردوموزا باسقین ائتدییی ایللر اورمودا نشر اولان " اورمیه " گونده لیینده چاپ اولوردو . آنجاق سونرالار علی نین شعرلرین " شاعیرلر مجلسی " توپلوسوندا گورمک مومکون اولور . 1324-1324 ینجی ایللر شاعیر علی نشانی نین شعرلرینه آذربایجان ؛ وطن یولوندا و بیر سیرا باشقا گونده لیک لرده راست لاشماق اولار . اونون شاعیرلیینین ان قیزغین چاغلاری ائله میللی حوکومت چاغلاری ایدی . نه یازیق کی بو حوکومت بیر ایلین عرضینده زاوالا گلدی . علی نشانی نین ده بیر چوخلاری کیمی ایستی آشینا سانکی سویوق سو قاتیلدی . میللی حوکومت دن سونرا اودا بیر چوخلاری کیمی یاخالانیب ایرانین اورتاسیندا یئرلشن یزد شهرینه تبعید اولونور . او چتین فضادا شاعیره شعردن باشقا نمنه ذوق وئره بیلردی ؟ اوئله بونا گوره ده شعرلرینین بیرینده او آغیر ایللر و گونلری بئله یاد ائدیر :
نیم فرسخ راه مازاری پیاده می روم
هی زپایم در می آید گیوه های پاره ام
صبح تا شب جای آجیل می خورم افغان و غم
قوت بازو ندارم تا بیدنجیر بشکنم
اشتران تیمار کنم یا بار سنگ بالا زنم ؟
=+=
گوشت پشتم خرد کرده لنگه های بیت من
پوست دستم زخم کرده چوب بیل بارکن
بارها در روز کارم بر سر چاه است من
منبع اصطبل را از آب باید پر کنم
اشتران تیمار کنم یا بار سنگ بالا زنم ؟
=+=
صبح نصفی نان سنگگ می خورم شام همچنان
ظهر نصفی نان خالی آب داغ چار استکان
دو تومن کفشم شود یا پیرهن یا خرج نان
مزد شاگردی است این یا حلم اشتر کندنم
اشتران تیمار کنم یا بار سنگ بالا زنم ؟
=+=
دیگر آیا بهتر از این بگذرد دنیای من ؟
این همه نعمت فرو پاشیده پیش پای من
گوله های لرد مازاری شده خرمای من
مختصر ننشینم از جا بر خزم کاری کنم
اشتران تیمار کنم یا بار سنگ بالا زنم .
تابستان 1326
علی نشانی نین شعرلری ان گنج چاغلاریندان مراقلا اوخونموش حتی میللی حوکومت دوورو درس لیک کیتابلارادا یول تاپمیشلار . اورنک اولاراق قوجا باغبان شعری مکتب اوشاقلارینین بیرینجی کیلاس دا اوخونان درس کیتابلاریندا چاپ اولموشدور . همین شعردن ئئجه دیر ایکی کوبلئت اوخویاق ؟
قوجا باغبان ایشله دایانما بیر آن
ایشله ین ال باغچا گورر بار گورر
بو بللی دیر سعی ائیله سه باغبان
آلما گورر ؛ هئیوا گورر ؛ نار گورر
=+=
باهاردان یارانیر هر لاله هر گول
مرامه یئترسن غم ائتمه کونول
چون هر زامان قیشین سونوندا بولبول
لاله لی سونبوللر بیر باهار گورر ...
گؤزل اورمو
گؤزل اورمو (اورمیه)
اورمو دئینده یام- یاشیل باغلار گؤز
اؤنونده سیرالانیرلار، گؤزللیك لر گؤسته ریشه چیخیرلار، اورمو آدی گلنده دوزلو
اورمو گؤلو آنی لارا گلیر، گونشین دوغماسی و یایدا اوزمك. اورمودان سؤز آچاندا
آذربایجان یئنی بیر جان تاپیر، چون كاظیم خان لار اونون آرخاسیندا دایانیب لار،
حئیدرخان لار ایسه دؤرد نال آت چاپیرلار، یاغی لار اوتانیب قاچیرلار، اورمو آدی
دیلده سسلننده باكری لر اؤنه چیخیرلار، دوشمن لر ایسه باجادان یوخ اولورلار، اورمو
آدی، صفی الدین اورموی نی یوخلاییر و آشیق فرهادلار سازلاری ایله گؤزل ماهنی لار چالیب
اوخویورلار، اوخومالاریندا كور اوغلولاری چنلی بئلده آذربایجان اوغروندا دوشمن
اؤنونده ساواشا چاغیریرلار، اورمو بو اولو آدی خاطیرلایاندا، بوتون آذربایجان
دینجه لیر، هامی اورمویا گؤوه نیر، اورمو آدی شیرین تورك دیلینی و او دیلده دئییلن
لای- لای لاری قولاق لارا اوخودور و اورمو هله یاشاییر، یاشادیر و آذربایجانا جان
وئریب یاشادیر..
یازان: حسین واحدی
قریب حسن(ع) ایمامزاداسی-اورمیه
قریب حسن(ع) ایمامزاداسی-اورمیه Qərib Həsən (ə) imamzadası - Urmiyə |
 |
| غریب حسن(ع) ایمامزاداسی-اورمیه / 1390.1.19 Qərib Həsən (ə) imamzadası- urmiyə / 2011 شكیل: حسین واحدی şəkil: Hüseyn vahidi
|
ائلین اونودولماز آشیغی، آشیق درویش
ائلین اونودولماز آشیغی، آشیق درویش
توز باسیب ائشیتمیر صدفلی سازین
گلمیر قولاغیما او خوش آوازین
قاریشدی تورپاغا صؤحبتین سؤزون
یانیرام سنده كی كامالا درویش
اورمیه نین آدلیملاری كیتابیندان رحمتلیك آشیق «درویش»- ین یاشامی نی اوخویوب قورتولاندان سونرا اوره ییمی غم باسیب اوركدن آه چكدیم. ندن بئلنچی بیر اینسانلاریمیز اونودولوبلار؟!! بونا گؤره ماراقلاندیم آشیغین كندینه گئدیب، قبرینی زییارت ائدم. یولداشلاریمین بیریله بو قونویو آرایا قویوب اونون كندینه گئتمه یی قرارا گتیردیك.
قراریمیز جومعه گونونه یدی و زامانین اوچدوغونا گؤره بو گون تئزلیكله گلیب چاتدی، گون اورتادان سونرا «كوردلر» كندینه ساری یوللاندیق، كند اورمیه نین چی چست یولونون 5 كیلومترلییینده یدی،كنده یئتیشیب، اورادا یاشایانلاردان قبیرسانلیغین یولونو سوروشدوق، نئچه دقیقه دن سونرا كنددن آزجا ائشیكده اولان قبیرسانلیغا یئتیشدیق، تورپاقلی بیر یول و سس سیز بیر آخیرت ائولری.. آخیرته قاووشانلارا بیر فاتیحه وئرندن سونرا، ته له سه رك تئز قبیرلری بیر- بیر آختاریب یازیلارینا دیققت ائدیردیك، آما رحمتلیك درویش-ین قبیرینی تاپا بیلمه دیك. اورالاردان كئچن بیر چوباندان آشیغین قبیرینی سوروشدوق و كاشكی سوروشماسایدیق! ، چوبان او كندین یاشایانلاریندان اولاراق آشیغین قبیرینی تانیمیردی!!
نئیله مك دئمه آشیق ائله اؤز كندینده ده قریبییمیش.گؤی ده بو قریبلییه دؤزه بیلمه ییردی و آغلاماق ایسته ییردی.. اومودلریمیزی پوزمایاراق،بیرینین یولدان كئچمه سینی گؤزله ییردیك،او آندا بیر پیكان قبیرسانلیغا ساری گلدی،دئمه تانری یئتیردی! بیزیم یانیمیزا یئتیشه نده اوندان آشیغین قبیرینی سوروشدوق و شوكورلر اولسون سوروجو قبیری تانییرمیش و اونو بیزه گؤسته ره رك اؤزوده بیزیمله قبیرین یانینا گلدی، اللی یاشیندا اولان او معرفتلی بی (یاری جینابلاری) بیزه حورمتله یاناشیب، آشیغا فاتیحه گؤندرندن سونرا آزجا اونون یاشامینی بیزیم اوچون آچیقلادی و سورولاریما جاواب وئردی.
رحمتلیك آشیق درویشین قیساجا یاشامیندان بئله دئمك اولار:
آشیق درویش فرهاد اوغلو 1309 – نجو گونش (شمسی) ایلینده اورمیه نین «كوردلر» كندینده دونیایا گؤز آچمیشدیر. او ده یرلی اوستاد آشیق فرهاد كیمی آذربایجانین سنتی موسیقی سینین آدلیملاریندان ساییلیر. آشیق درویشین گؤزل، ایستی و صمیمی سه سینه گؤره آشیق فرهادین شاگیردی اولموشدور. درویش چالان ساز سه سی جانلارا كئچیب و گؤزل سه سیله اونودولموش اثرلره جان باغیشلاییردی. بو اونودولماز اوستاد 1372 ـ نجی ایلین قویروق دوغان(مورداد) آیینین دوققوزوندا، گؤزلرین دونیایا یوموب،اؤز دوغوم یئری اولان «كوردلر» كندینده تورپاغا تاپشیریلدی. آشیغین تشییع-ی جنازه سینده اینه سالماغا یئر یوخویموش و بو اونون خالق ایچینده نه قدر سئویملی اولدوغونو گؤسته ریردی.
آشیق درویش یاشام بویو (همیشه لیك) آذربایجانین سنتی موسیقی سینی سئورلرین اوره یینده قالاجاقدیر و بو سه س اورمیه اوچون قالارگی بیر سه س اولوبدور. رحمتلیك درویش ایرانین بوتون میللی موسیقی فئستیواللارینا قاتیلب و یوكسك یئرلره ال تاپیب،اؤدول لر قازانیب دیر. او نئچه ایللرده اورمیه رادیو، تلویزیونویلادا ایش بیرلیگی آپاریبدیر. او ده یه رلی اوستاد چوخلو شاگیردلرده موسیقی دونیامیزا تربیه ائدیب دیر، اونلاردان، آشیق اسمعلی (اورمیه – اونون بیرینجی شاگیردی)، آشیق صبور شریفی (اورمیه)، آشیق عبدالله اشرفی (قورد تپه)، آشیق ذكریا ملكی(قولونجو)، آشیق رضا پوینده (سولدوز) و ...آد آپارماق اولار.
آشیق درویش، متین، ویقارلی و عاریف بیر كیشی ایدی، دئمك اولار او خصلت ایله صنعت ده، اصیل و نمونه بیر آشیق و اوزان دیر. رحمتلیك درویش آشیق صنعتینه اؤزونه مخصوص اولان نئچه هاوا یادیگار قویوب. اونلاردان «شكر یازی هاواسی» و «غربتی هاواسی»- نی آد آپارماق اولار. بو هاوالار ایندیده اورمو آشیق لارینین آراسیندا چالینماقدادیر.
سونوندا دئمه لییم بئله نچی اینسانلاریمیزا سایغی گؤسته رمه لییك و اونون شانینده اولان بیر مزارلیق تیكیب هئچ اولماسا آدینا بیر خییاوان یارادیب هئیكلین پاركلارا قویمالییق.
منه یاردیم ائدن، «شكاری» و «یاری» جینابلارینداندا تشككور ائدیرم و اونلارا جان ساغلیغی آرزیلاییرام.
یازیب، حاضیرلایان : حسین واحدی
آشیق لار یاریشینا چاغیریش
فراخوان مسابقه موسیقی آشیقی
فراخوان
در پی برگزاری چهارمین دوره ی جشنواره ی نسلی از آفتاب، حوزه هنری استان آذربایجان غربی به منظور ارج نهادن به آشیق و موسیقی آشیقی در سطح منطقه ای برگزار می کند: (سطح منطقه ای شامل استانهای آذربایجان غربی، آذربایجان شرقی، اردبیل، زنجان، قزوین و کردستان.)
بخشها:
1- مکتب آشیقی اورمیه
2- مکتب آشیقی قره داغ(به علاوه سایر مکاتب در صورت وصول آثار)
3- تکنوازی قوپوز
محورهای برگزاری جشنواره:
1- سسلی سازیم: نگاهی به موضوع دفاع مقدس و بازگویی حماسه های آن دوران از زبان آشیقها
2- ایمان گوجو: نقش عنصر ایمان در روند پیروزی انقلاب شکوهمند انقلاب اسلامی ایران
3- آیدین گونلر: بازگوکننده جنبشهای مردمان مسلمان کشورهای منطقه
4- گونش بولاغی: تمدن اسلامی و گذشته پرافتخار تمدن اسلامی و نقش آن در پی ریزی تمدن جهانی
5- محبت اوجاغی: خانواده و اخلاق در فرهنگ ایرانی و اسلامی و جایگاه آن در موسیقی فولکلور.
مقررات:
1- شرکت در هریک از بخشها به صورت مشترک مجاز است.
2- شکرت کنندگان فقط مجاز به ارائه تنها یک اثر در هر یک از بخشها می باشند.
3- شعر هر اثر می بایست به صورت تایپ شده و یا با خط بسیار خوانا با ذکر نام و مشخصات شاعر ارائه گردد.
4- ارائه فرم شرکت در جشنواره به همراه اثر و دوقطعه عکس 3*4 تمام رنگی الزامی است.
جوایز:
1- مکتب آشیقی اورمیه
نفر اول: 400 هزارتومان
نفر دوم: 300 هزار تومان
نفر سوم: 200 هزار تومان
2-مکتب آشیقی قره داغ و سایر مکاتب
نفر اول: 400 هزارتومان
نفر دوم: 300 هزار تومان
نفر سوم: 200 هزار تومان
3-تکنوازی قوپوز
فقط نفر برتر: 400 هزار تومان
آخرین مهلت ارسال آثار در قالب سی دی و یا دی وی دی: 30 بهمن ماه 1390
آدرس دبیرخانه : اورمیه، خیابان شهید امینی، جنب استانداری، حوزه هنری استان آذربایجان غربی
تلفن: ۳۴۶۲۵۵۱-۰۴۴۱
قایناق 2( حوزه هنری آذربایجان غربی)
